ໃນຕອນບ່າຍວັນທີ 02 ມັງກອນ 2024 ທີ່ຫ້ອງປະຊຸມສະພາປະຊາຊົນແຂວງສະຫວັນນະເຂດໄດ້ຈັດພິທີຖະແຫຼງຂ່າວຂຶ້ນ ໂດຍທ່ານ ພູທອນ ພຸດທະຂັນຕິ ເລຂາທິການສະພາປະຊາຊົນແຂວງ ໃນນາມຫົວໜ້າກອງເລຂາກອງປະຊຸມ, ຕາງໜ້າຄະນະປະຈໍາສະພາປະຊາຊົນແຂວງ ໄດ້ຖະແຫຼງຂ່າວກ່ຽວກັບການດໍາເນີນ

ກອງປະຊຸມສະໄໝສາມັນ ເທື່ອທີ 06 ຂອງສະພາປະຊາຊົນແຂວງ ຊຸດທີ II ຈະໄດ້ໄຂຂຶ້ນໃນຕອນເຊົ້າວັນອັງຄານ, ວັນທີ 09 ມັງກອນ 2024 ແລະ ດໍາເນີນຮອດວັນທີ 12 ມັງກອນ 2024 ເປັນເວລາ 04 ວັນ ເຕັມ ທີ່ຫໍວັດທະນະທຳໄກສອນພົມວິຫານ, ນະຄອນໄກສອນພົມວິຫານ ແຂວງສະຫວັນນະເຂດ.

ໃນກອງ​ປະຊຸມ​ສະ​ໄໝ​ສາມັນ​ ເທື່ອ​ທີ 06 ຂອງ​ສະພາ​ປະຊາຊົນ​ແຂວງ ຊຸດ​ທີ II ຈະ​ໄດ້​ຮັບ​ຟັງ​ການລາຍ​ງານ ພ້ອມ​ທັງພິຈາລະນາ, ຮັບຮອງເອົາ​ບັນຫາ​ສຳຄັນຂອງແຂວງ ດັ່ງ​ນີ້:

ກ. ວຽກອົງການປົກຄອງແຂວງ

1. ພິຈາລະນາ, ຮັບຮອງເອົາ ບົດ​ລາຍ​ງານທ່ານ​ເຈົ້າ​ແຂວງໆ​ສະຫວັນ​ນະ​ເຂດ ກ່ຽວ​ກັບ ສະພາບການຈັດຕັ້ງປະຕິບັດແຜນ​ພັດທະນາ​ເສດຖະກິດ​-ສັງຄົມ, ​ແຜນ​ງົບປະມານ​ແຫ່ງ​ລັດຂອງແຂວງ ປະຈຳປີ 2023 ແລະ ທິດທາງແຜນ​ການ ປະຈໍາປີ 2024;
2. ຮັບຟັງການລາຍ​ງານ ​ຈາກຫົວໜ້າພະແນກແຜນການ ແລະ ການລົງທຶນແຂວງ ກ່ຽວ​ກັບ ການ​ຈັດຕັ້ງ​ປະຕິບັດແຜ​ນພັດທະນາ​ເສດຖະກິດ-ສັງຄົມ ປະຈຳປີ 2023 ແລະ ທິດທາງແຜນ​ການ ປະຈໍາປີ 2024;
3. ຮັບຟັງການລາຍ​ງານ​ ຈາກຫົວໜ້າພະແນກການເງິນແຂວງ ກ່ຽວ​ກັບ ການ​ຈັດຕັ້ງ​ປະຕິບັດ​ແຜນງົບປະມານແຫ່ງລັດ ປະຈຳປີ 2023 ແລະ ທິດທາງແຜນ​ການ ປະຈໍາປີ 2024;
4. ຮັບຟັງການລາຍງານ ຈາກທ່ານຮອງເຈົ້າແຂວງສະຫວັນນະເຂດ ກ່ຽວກັບ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍ ການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ໄລຍະ 03ປີ ຜ່ານມາ (2021-2023);
5. ຮັບຟັງການລາຍງານ ຈາກທ່ານຫົວໜ້າກອງບັນຊາການ ປກສ ແຂວງ ກ່ຽວກັບ ການຈັດຕັ້ງປະຕິບັດວາລະແຫາງຊາດ ວ່າດ້ວຍ ການແກ້ໄຂບັນຫາຢາເສບຕິດໄລຍະ 03 ປີ ຜ່ານມາ (2021-2023).

ຂ. ວຽກອົງການກວດສອບ ປະຈໍາພາກກາງ ແລະ ອົງການກວດກາລັດແຂວງ

1. ພິຈາລະນາ, ຮັບຮອງເອົາບົດລາຍງານ ຂອງອົງການກວດສອບ ປະຈໍາພາກກາງ ກ່ຽວກັບ ການຈັດຕັ້ງປະຕິບັດແຜນການການເຄື່ອນໄຫວວຽກງານກາງສະໄໝ ຂອງແຜນການ 5 ປີ (2021-2025) ແລະ ທິດທາງແຜນການທ້າຍສະໄໝ ຮອດປີ 2025; ການເຄື່ອນໄຫວວຽກງານ ປະຈໍາປີ 2023 ແລະ ທິດທາງແຜນການ ປະຈໍາປີ 2024; ບົດລາຍງານຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2022;
2. ພິຈາລະນາ, ຮັບຮອງເອົາບົດລາຍງານ ຂອງອົງການກວດກາລັດແຂວງ ກ່ຽວກັບ ການຈັດຕັ້ງປະຕິບັດແຜນການເຄື່ອນໄຫວວຽກງານກາງສະໄໜ ຂອງແຜນການ 5 ປີ (2021-2025) ແລະ ທິດທາງແຜນການທ້າຍສະໄໝ ຮອດປີ 2025; ການເຄື່ອນໄຫວວຽກງານ ປະຈໍາປີ 2023 ແລະ ທິດທາງແຜນການປະຈໍາປີ 2024; ບົດລາຍງານຜົນການ ກວດກາ ຕາມຜົນການກວດສອບ ປະຈຳປີ 2022;

ຄ. ວຽກການສ້າງ ແລະ ປັບປຸງນິຕິກໍາໃຕ້ກົດໝາຍ

1). ການປະເມີນການຈັດຕັ້ງປະຕິບັດນິຕິກໍາໃຕ້ກົດໝາຍ ຈໍານວນ 04 ສະບັບ ຄື:

1.1. ຂໍ້ຕົກລົງຂອງທ່ານເຈົ້າແຂວງໆສະຫວັນນະເຂດ ວ່າດ້ວຍການຄຸ້ມຄອງເຂດສະຫງວນທາງຫຼວງ ໃນແຂວງສະຫວັນນະເຂດ ສະບັບເລກທີ 2019/ຈຂ.ສຂ, ລົງວັນທີ 11 ພະຈິກ 2019;

1.2. ຂໍ້ຕົກລົງຂອງທ່ານເຈົ້າແຂວງໆສະຫວັນນະເຂດ ວ່າດ້ວຍ ການຄຸ້ມຄອງການບໍລິການ, ຮ້ານອາຫານ, ຮ້ານກິນດື່ມ ແລະ ຮ້ານບັນເທີງ ສະບັບເລກທີ 2142/ຈຂ.ສຂ, ລົງວັນທີ 25 ພະຈິກ 2020;

1.3. ຂໍ້ຕົກລົງຂອງທ່ານເຈົ້າແຂວງໆສະຫວັນນະເຂດ ວ່າດ້ວຍການສົ່ງເສີມ, ການຄຸ້ມຄອງ ວິສະຫະກິດ ຂະໜາດນ້ອຍ ແລະ ກາງ ສະບັບ​ເລ​ກທີ 2043/ຈຂ.ສຂ, ລົງ​ວັນ​ທີ 16 ພະຈິກ 2020;

1.4. ຄໍາສັ່ງຂອງທ່ານເຈົ້າແຂວງ ວ່າດ້ວຍການເພີ່ມທະວີການຄຸ້ມຄອງວຽກງານອາຊີບ-ພາຫະນະພິເສດ ສະບັບເລກທີ 0306/ຈຂ.ສຂ, ລົງ​ວັນ​ທີ 05 ກຸມພາ 2018.

2). ພິຈາລະນາ, ຮັບຮອງການສ້າງ ແລະ ປັບປຸງນິຕິກໍາໃຕ້ກົດໝາຍ ຈໍານວນ 02 ສະບັບ ຄື:

2.1. ຂໍ້ຕົກລົງຂອງທ່ານເຈົ້າແຂວງໆສະຫວັນນະເຂດ ວ່າດ້ວຍ ການຄຸ້ມຄອງກອງທຶນສັງຄົມສົງເຄາະແຂວງ (ສະບັບປັບປຸງ);

2.2. ຂໍ້ຕົກລົງຂອງທ່ານເຈົ້າແຂວງໆສະຫວັນນະເຂດ ວ່າດ້ວຍ ການມີສ່ວນຮ່ວມຂອງສັງຄົມ ຕໍ່ການສຶກສາກ່ອນໄວຮຽນ ແລະ ສາມັນສຶກສາທົ່ວແຂວງສະຫວັນນະເຂດ (ສ້າງໃໝ່).

ງ. ວຽກອົງການໄອຍະການປະຊາຊົນແຂວງ ແລະ ສານປະຊາຊົນແຂວງ

1. ພິຈາລະນາ, ຮັບຮອງເອົາບົດລາຍງານ ຂອງອົງການໄອຍະການປະຊາຊົນແຂວງ ກ່ຽວກັບ ການຈັດຕັ້ງປະຕິບັດການເຄື່ອນໄຫວວຽກງານ ປະຈຳປີ 2023 ແລະ ທິດທາງແຜນ​ການ ປະຈໍາປີ 2024;
2. ພິຈາລະນາ, ຮັບຮອງເອົາບົດລາຍງານ ຂອງສານປະຊາຊົນແຂວງ ກ່ຽວກັບ ການຈັດຕັ້ງປະຕິບັດການເຄື່ອນໄຫວວຽກງານ ປະຈຳປີ 2023 ແລະ ທິດທາງແຜນ​ການ ປະຈໍາປີ 2024;

ຈ. ວຽກສະພາປະຊາຊົນແຂວງ

1. ພິຈາລະນາ, ຮັບຮອງເອົາບົດລາຍງານ ຂອງສະພາປະຊາຊົນແຂວງ ຊຸດທີ II ກ່ຽວກັບ ການຈັດຕັ້ງປະຕິບັດການເຄື່ອນໄຫວວຽກງານ ປະຈຳປີ 2023 ແລະ ທິດທາງແຜນ​ການ ປະຈໍາປີ 2024;
2. ຮັບຟັງການປະກອບຄໍາເຫັນ ຈາກອົງການແນວລາວສ້າງຊາດແຂວງ ຕ່າງໜ້າອົງການຈັດຕັ້ງມະຫາຊົນ ຕໍ່ກັບການປະຕິບັດໝ້າທີ່ ຂອງສະພາປະຊາຊົນແຂວງ ຊຸດທີ II.
3. ຮັບຟັງການປະກອບຄໍາເຫັນ ຂອງຄະນະປະຈໍາສະພາປະະຊາຊົນແຂວງ ຕໍ່ບົດລາຍງານຂອງອົງການປົກຄອງແຂວງ, ອົງການກວດສອບ ປະຈໍາພາກກາງ, ອົງການໄອຍະການປະຊາຊົນແຂວງ, ສານປະຊາຊົນແຂວງ ແລະ ການປະເມີນການຈັດຕັ້ງປະຕິບັດນິຕິກໍາໃຕ້ກົດໝາຍ ຈໍານວນ 04 ສະບັບ.

ໃນ​ໄລຍະ​ດຳ​ເນີນ​ກອງ​ປະ​ຊຸມ ສະພາ​ປະຊາຊົນ​ແຂວງໄດ້​ຈັດ​ຕັ້ງໜ່ວຍງານຮັບຜິດຊອບ​​ໂທລະ​ສັບ​ສາຍດ່ວນ ໂດຍບໍ່ເສຍຄ່າ ຕາມໝາຍເລກໂທລະສັບ 041 156 ເພື່ອ​ຮັບ​ເອົາ​ຄຳ​ຄິດ​ຄຳ​ເຫັນ ​ແລະ ຄຳ​ສະ​ເໜີ​​ໂດຍ​ກົງ ຈາກ​ປະຊາຊົນໃນນາມຜູ້ມີສິດເລືອກຕັ້ງ​ ແລະ ພາກສ່ວນຕ່າງໆ ທີ່​ຈະ​ສົ່ງຄໍາສະເໜີ​ໄປ​ຍັງ​ກອງ​ປະຊຸມ ເຊິ່ງບັນດາ​ທ່ານ​ສາມາດ​ສົ່ງ​ຄຳ​ຄິດ​ຄຳ​ເຫັນ ດັ່ງກ່າວ ໄປ​ຍັງ​ກອງ​ປະຊຸມພາຍໃນໂມງລັດຖະການ.