(ສພຊ) ໃນວັນທີ 7 ກຸມພາ 2023 ສະຫະພັນກຳມະບານສະພາແຫ່ງຊາດ ນຳໂດຍສະຫາຍ ອໍາໄພ ຈິດມານົນ ປະທານຄະນະບໍລິຫານງານສະຫະພັນກໍາມະບານສະພາແຫ່ງຊາດ, ກໍາມະການຄະນະພັກສະພາແຫ່ງຊາດ, ຮອງປະທານກໍາມາທິການກົດໝາຍ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ອວຍພອນກອງບັນຊາການທະຫານແຂວງບໍລິຄຳໄຊ ຕ້ອນຮັບໂດຍສະຫາຍ ພົນຈັດຕະວາ ຈວງຈັນ ລາດສະວົງ ຄະນະປະຈຳພັກແຂວງ, ເລຂາຄະນະພັກ, ຫົວໜ້າການເມືອງກອງບັນຊາການທະຫານແຂວງບໍລິຄຳໄຊ ພ້ອມດ້ວຍອ້າຍນ້ອງທະຫານທັງໝົດ ຈຳນວນ 110 ສະຫາຍ ຍິງ 29 ສະຫາຍ.

ໃນພິທີຕ້ອນຮັບທີ່ມີຄວາມໝາຍສຳຄັນດັ່ງກ່າວ ຕາງໜ້າຄະນະກອງບັນຊາການໄດ້ກ່າວຕ້ອນຮັບ ແລະ ລາຍງານການເຄື່ອນໄຫວວຽກງານ, ຜົນງານທີ່ຍາດມາໄດ້ໃນໄລຍະຜ່ານມາ. ພ້ອມກັນນັ້ນ, ປະທານຄະນະບໍລິຫານງານສະຫະພັນກຳມະບານສະພາແຫ່ງຊາດ ຕາງໜ້າໃຫ້ຄະນະພັກ, ຄະນະນຳ ສະພາແຫ່ງຊາດ ໄດ້ກ່າວຂອບໃຈໃນການຕ້ອນຮັບຄະນະກຳມະບານສະພາແຫ່ງຊາດຢ່າງອົບອຸ່ນ ແລະ ຍັງໄດ້ຝາກຄວາມຢ້ຽມຢາມຖາມຂ່າວ, ຄວາມຄິດຮອດຄິດເຖິງ, ຄວາມເປັນຫ່ວງເປັນໃຍ ມາຍັງບັນດາສະຫາຍ ຄະນະພັກ, ຄະນະນໍາ ນາຍ ແລະ ພົນທະຫານ ທຸກທົ່ວໜ້າ ແລະ ຜ່ານບັນດາສະຫາຍໄປຍັງນາຍ, ພົນທະຫານ ທີ່ປະຈໍາການຢູ່ເຂດທຸລະກັນດານ, ຫ່າງໄກສອກຫຼີກ ທີ່ປະຕິບັດໜ້ທີ່ເປັນຮົ້ວປ້ອງກັນຊາດ-ປ້ອງກັນຄວາມສະຫງົບ ແລະ ຊົມເຊີຍຜົນສຳເລັດການຈັດຕັ້ງປະຕິບັດ ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຢ່າງຖືກທິດ, ໝາກຜົນແຫ່ງຄວາມບຸກບືນສູ້ຊົນ, ຄວາມມານະອົດທົນ, ເດັດດ່ຽວໜຽວແໜ້ນ ແລະ ຄວາມສາມັກຄີເປັນປຶກແຜ່ນຂອງ ຄະນະພັກ-ຄະນະບັນຊາ, ສະມາຊິກພັກ, ພະນັກງານ-ນັກຮົບຂອງກອງບັນຊາການທີ່ຍາດມາໄດ້ ແລະ ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວຄົບຮອບ 74 ປີ ເພື່ອສະແດງຄວາມຮູ້ບຸນຄຸນ ແລະ ເປັນການປະກອບສ່ວນ ຈາກຄະນະກຳມະບານສະພາແຫ່ງຊາດມອບໃຫ້ ກອງກຳລັງອ້າຍນ້ອງ ເຊິ່ງປະກອບມີເຄື່ອງອຸປະກອນກິລາ, ເຄື່ອງອຸປະໂພກ, ບໍລິໂພກ ລວມມູນຄ່າ 3 ລ້ານກີບ ເພື່ອເປັນກຳລັງໃຈໃນການສືບຕໍ່ຈັດຕັ້ງປະຕິບັດໜ້າທີ່ວຽກງານຕໍ່ໄປ. ພ້ອມກັນນັ້ນ, ທັງສອງຝ່າຍ ໄດ້ສ້າງຂະບວນການກິດຈະກຳກິລາຕີບູນຮ່ວມກັນ ເພື່ອຮັດແໜ້ນຄວາມສາມັກຄີຮັກແພງ ແລະ ເປັນການສ້າງຄວາມມ່ວນຊື່ນຮ່ວມກັນ.