(ສປນວ) ໄລຍະແຕ່ວັນທີ 18 – 21 ຕຸລາ 2022, ຄະນະສະມາຊິກ ສະພາແຫ່ງຊາດ ປະຈຳເຂດເລືອກຕັ້ງທີ 1 ນວ ທີ່ເປັນກຳມະການສັງກັດ ກຳມາທິການ ວັດທະນະທຳ-ສັງຄົມ ສະພາແຫ່ງຊາດ ທີ່ລົງເຄື່ອນໄຫວເຮັດວຽກຮ່ວມກັບ 5 ພາກສ່ວນ ຄື: ພະແນກແຮງງານ ແລະ ສະຫວັດດີການສັງຄົມ, ພະແນກສຶກສາທິການ ແລະ ກິລາ, ສູນພັດທະນາສີມືແຮງງານ, ບັນດາບໍລິສັດຈັດຫາງານ ແລະ ວິທະຍາໄລມິດຕະພາບ ວຽງຈັນ-ຮ່າໂນ້ຍ ເຊິ່ງນຳພາຄະນະໂດຍ ທ່ານ ບຸນທາມ ພຸດທະວົງສາ ຮອງປະທານ ຄະນະສະມາຊິກ ສະພາແຫ່ງຊາດປະຈຳເຂດເລືອກຕັ້ງທີ 1 ນວ. ຈຸດປະສົງຂອງການລົງເຮັດວຽກຄັ້ງນີ້ ແມ່ນເພື່ອຕິດຕາມກວດກາ ແລະ ຊຸກຍູ້ການສ້າງວິຊາຊີບ, ການພັດທະນາສີມືແຮງງານ ແລະ ການສ້າງວຽກເຮັດງານທຳຂອງປະຊາຊົນ ເພື່ອແກ້ໄຂໄພວ່າງງານ ຢູ່ນະຄອນຫຼວງວຽງຈັນ.

ໃນວັນທີ 21 ຕຸລາ 2022, ຄະນະດັ່ງກ່າວ ໄດ້ລົງເຮັດວຽກຢູ່ທີ່ວິທະຍາໄລມິດຕະພາບ ວຽງຈັນ-ຮ່າໂນ້ຍ ໂດຍການຕ້ອນຮັບຂອງ ອາຈານ ແສງອາລຸນ ວົງພູທອນ ຜູ້ອຳນວຍການ ວິທະຍາໄລມິດຕະພາບ ວຽງຈັນ-ຮ່າໂນ້ຍ ແລະ ຄູອາຈານ ຈໍານວນໜຶ່ງ. ໃນການລົງເຄື່ອນໄຫວຄັ້ງນີ້ໄດ້ຮັບຟັງການລາຍງານ ກ່ຽວກັບສະພາບ ລວມຂອງວິທະຍາໄລ ເຊິ່ງໃນສົກປີ 2021-2022 ມີນັກສຶກສາໄດ້ຮັບໃບປະກາດສະນີຍະບັດ 297 ຄົນ, ຍິງ 129 ຄົນ ໄດ້ 100%; ໃນນັ້ນ, ມີນັກສຶກສາຮຽນດີ-ຮຽນເກັ່ງ ໄດ້ຄະແນນ 3.20 ຂຶ້ນໄປ 73 ຄົນ, ຍິງ 37 ຄົນ ເທົ່າກັບ 24,57%. ນອກຈາກນັ້ນ, ໄດ້ມີການປັບປຸງຫຼັກສູກ ຊັ້ນກາງ, ຊັ້ນສູງ ໃຫ້ເປັນໂມດູນ ໃນສາ ຂາວິຊາຊີບ 06 ສາຂາຄື: ສາຂາວິຊາບໍລິຫານເຄືອຂ່າຍຄອມພິວເຕີ, ສາຂາວິຊາອອກແບບ ແລະ ພັດທະນາເວັບໄຊ, ສາຂາວິຊາອອກແບບ ກຣາຟິກ ແລະ ສື່ສິ່ງພິມ, ສາຂາວິຊານັກພັດທະນາຂຽນໂປຼແກຼມນຳໃຊ້, ສາຂາວິຊາຊ່າງສ້ອມແປງອຸປະກອນເທັກໂນໂລຊີ ແລະ ການສື່ສານ ແລະ ສາຂາວິຊາການຂາຍອຸປະກອນການສື່ສານ. ພາຍຫຼັງຮັບຟັງການລາຍງານທາງຄະນະໄດ້ມີຄຳເຫັນຊີ້ນຳ, ມີຄຳເຫັນແລກປ່ຽນ ແລະ ຮັບເອົາບາງບັນຫາ, ຂໍ້ຫຍຸ້ງຍາກຂອງວິທະຍາໄລ ເພື່ອຈະນຳສະເໜີຕໍ່ພາກສ່ວນກ່ຽວຂ້ອງພິຈາລະນາແກ້ໄຂ ແລະ ໃນຕອນທ້າຍ ກໍໄດ້ສະແດງຄວາມຍ້ອງຍໍຊົມເຊີຍຕໍ່ບັນດາຄູອາຈານທີ່ໄດ້ເອົາໃຈໃສ່ປະຕິບັດໜ້າທີ່ໃນການສິດສອນດ້ວຍຄວາມຫ້າວຫັນ ແລະ ບັນລຸຕາມຄາດໝາຍທີ່ວາງໄວ້.