ໃນຕອນເຊົ້າຂອງວັນທີ 13 ມີນາ 2024, ກອງປະຊຸມປະຈຳປີ 2023 ຂອງສະມາຊິກ ສະພາປະຊາຊົນ ນະຄອນຫຼວງວຽງຈັນ ຊຸດທີ II ປະຈຳເຂດເລືອກຕັ້ງເມືອງຈັນທະບູລີ ນວ ໄດ້ດຳເນີນຂຶ້ນທີ່ຫ້ອງປະຊຸມສຳນັກງານອົງການປົກຄອງ ເມືອງຈັນທະບູລີ ໂດຍການເປັນປະທານຂອງ ທ່ານ ບຸນເຖິງ ສຸວັນນະສີ ຫົວໜ້າຄະນະສະມາຊິກ ສະພາປະຊາຊົນ ນວ, ຮອງເລຂາພັກເມືອງ, ປະທານກວດກາພັກ-ລັດ ເມືອງ, ເຂົ້າຮ່ວມໂດຍ ທ່ານ ນາງ ລຳພອຍ ສີອັກຄະຈັນ ກໍາມະການປະຈໍາພັກ ນວ, ຮອງປະທານສະພາປະຊາຊົນ ນວ, ມີບັນດາທ່ານ ຄະນະປະຈຳ, ສະມາຊິກສະພາປະຊາຊົນ ນວ ປະຈຳເຂດເລືອກຕັ້ງເມືອງ, ຕາງໜ້າອົງການຈັດຕັ້ງຂັ້ນບ້ານພາຍໃນເມືອງ ແລະ ພະນັກງານຫຼັກແຫຼ່ງອ້ອມຂ້າງເມືອງ ເຂົ້າຮ່ວມຢ່າງພ້ອມພຽງ.
ໂອກາດດັ່ງກ່າວ, ທ່ານ ນາງ ໄຊສົມບັດ ວົງພັກດີ ຮອງຫົວໜ້າຄະນະສະມາຊິກ ສະພາປະຊາຊົນ ນວ ໄດ້ຂຶ້ນຜ່ານບົດສະຫຼຸບການເຄື່ອນໄຫວວຽກງານ ປະຈຳປີ 2023 ແລະ ທິດທາງແຜນການເຄື່ອນໄຫວ ປະຈຳປີ 2024 ຂອງສະມາຊິກສະພາປະຊາຊົນ ນວ ປະຈຳເຂດເລືອກຕັ້ງເມືອງຈັນທະບູລີ ນວ, ເຊິ່ງໄລຍະຜ່ານມາ ໄດ້ເອົາໃຈໃສ່ປະກອບຄຳຄິດເຫັນໃສ່ຮ່າງກົດໝາຍ ກ່ອນທີ່ຈະນຳເຂົ້າພິຈາລະນາໃນກອງປະຊຸມສະໄໝສາມັນ ເທື່ອທີ 5 ແລະ 6 ຂອງສະພາແຫ່ງຊາດ ຊຸດທີ IX ທັງໝົດ 23 ສະບັບ, ຕໍ່ບັນດາຮ່າງນິຕິກຳທີ່ອົງການປົກຄອງ ນວ ໄດ້ພິຈາລະນາ ແລະ ຮັບຮອງເອົາຮ່າງນິຕິກຳ ຈຳນວນ 02 ສະບັບ ຄື: ຮ່າງຂໍ້ຕົກລົງວ່າດ້ວຍການກຳນົດລາຄາຫົວໜ່ວຍຄ່າຊົດເຊີຍ ທົດແທນຄ່າເສຍຫາຍຂອງໂຄງການກໍ່ສ້າງປ້ອງກັນຕາຝັ່ງເຈື່ອນ ແລະ ພັດທະນາແຄມຂອງ ໄລຍະ 2; ແລະ ຮ່າງຂໍ້ຕົກລົງວ່າດ້ວຍກອງທຶນພັດທະ ນາກິລາ-ກາຍະກຳ ນວ. ນອກຈາກນີ້, ຄະນະສະມາຊິກ ສະພາປະຊາຊົນ ປະຈຳເຂດເລືອກຕັ້ງເມືອງຈັນທະບູລີ ນວ ຍັງໄດ້ເຂົ້າຮ່ວມປະເມີນການຈັດຕັ້ງປະຕິບັດບັນດານິຕິກຳຂອງອົງການປົກຄອງ ນວ ໂດຍສະເພາະ ບັນຫາການຄຸ້ມຄອງສຽງເນືອງນັນ, ການກຳນົດ ແລະ ຄຸ້ມຄອງທີ່ດິນກະສິກຳ ແລະ ປ່າໄມ້; ການຈັດສັນຄວາມບໍ່ເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງ ແລະ ວຽກງານປິ່ນອ້ອມອີກຈຳນວນໜຶ່ງ. ນອກຈາກນີ້, ຍັງໄດ້ຮັບຟັງການລາຍງານຂອງ ທ່ານ ເຈົ້າເມືອງ ແລະ ບັນຫາຫົວໜ້າຫ້ອງການ ຕໍ່ບັນດາຂົງເຂດວຽກງານຕ່າງໆ ເປັນຕົ້ນ: ຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານປະຈຳປີ 2023 ແລະ ທິດທາງແຜນການ ປະຈຳປີ 2024 ຂອງເມືອງ, ການໃຊ້ເງິນຮ່ວງເກີນແຜນ ແລະ ຊີ້ແຈງຄຳສະເໜີຂອງປະຊາຊົນໃນໄລຍະຜ່ານມາອີກຈຳນວນໜຶ່ງ.
ພາຍຫຼັງທີ່ໄດ້ຮັບຟັງການລາຍງານການເຄື່ອນໄຫວວຽກງານໄລຍະຜ່ານມາຈາກແຕ່ລະພາກສ່ວນ, ບັນດາທ່ານຜູ້ເຂົ້າຮ່ວມກອງປະຊຸມ ກໍໄດ້ມີຄຳເຫັນເຈາະຈີ້ມຕໍ່ກັບການຈັດຕັ້ງປະຕິບັດວຽກງານໄລຍະຜ່ານມາ ໂດຍສະເພາະ ບັນດາໜ້າວຽກທີ່ຍັງບໍ່ສາມາດປະຕິບັດໄດ້ຕາມແຜນ ແລະ ວິທີການແກ້ໄຂໃນຕໍ່ໜ້າ ເຊິ່ງແຕ່ລະພາກສ່ວນກໍໄດ້ໃຫ້ການຊີ້ແຈງຕໍ່ກອງປະຊຸມ ພ້ອມທັງຮັບເອົາບາງຄຳຄິດເຫັນ ນຳໄປປັບປຸງແກ້ໄຂໃຫ້ທັນເວລາ.
ໃນຕອນທ້າຍ, ທ່ານ ນາງ ລຳພອຍ ສີອັກຄະຈັນ ກຳມະການປະຈຳພັກ ນວ, ຮອງປະທານສະພາປະຊາຊົນ ນວ ກໍໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສຳເລັດທີ່ຄະນະສະມາຊິກ ສະພາປະຊາຊົນ ນວ ປະຈຳເຂດເລືອກຕັ້ງເມືອງຈັນທະບູລີ ຍາດມາໄດ້. ພ້ອມດຽວກັນນີ້, ກໍໄດ້ເນັ້ນໜັກໃຫ້ຄະນະດັ່ງກ່າວ ສືບຕໍ່ປັບປຸງແກ້ໄຂບັນດາໜ້າວຽກທີ່ຍັງຄົງຄ້າງ ໂດຍສະເພາະແມ່ນ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ທີ່ຍັງບໍ່ສາມາດບັນລຸໄດ້ບາງຄາດໝາຍ, ການແກ້ໄຂຄຳສະເໜີຂອງປະຊາຊົນ ທີ່ເຫັນວ່າຍັງພົບຄວາມຫຍຸ້ງຍາກ, ການເຂົ້າເຖິງຜູ້ມີສິດເລືອກຕັ້ງໃຫ້ໄດ້ຢ່າງທົ່ວເຖິງກວ່າເກົ່າ ແລະ ຍັງເນັ້ນໃຫ້ຄະນະສະມາຊິກ ສະພາປະຊາຊົນ ປະຈຳເຂດເລືອກຕັ້ງເມືອງ ເອົາໃຈໃສ່ຍົກສູງການປະຕິບັດສາມພາລະບົດບາດຫຼັກ ຄື: ດ້ານນິຕິກຳ, ການຕົກລົງບັນຫາສຳຄັນພື້ນຖານຂອງທ້ອງຖິ່ນ ແລະ ການຕິດຕາມກວດກາ ພາຍໃນເມືອງຂອງຕົນ ໂດຍສະເພາະການຈັດຕັ້ງຜັນຂະຫຍາຍແຜນການເຄື່ອນໄຫວວຽກງານ ຂອງສະພາປະຊາຊົນ ແລະ ຄະນະປະຈໍາ ສະພາປະຊາຊົນ ນະຄອນຫຼວງ ໃນແຕ່ລະໄລຍະ ມາເປັນແຜນການເຄື່ອນໄຫວວຽກງານລະອຽດຂອງຕົນ ໂດຍແບ່ງໃຫ້ບັນດາທ່ານສະມາຊິກ ສະພາປະຊາຊົນ ປະຈຳເຂດເລືອກຕັ້ງເມືອງ ແຕ່ລະທ່ານ ຈັດຕັ້ງປະຕິບັດ, ມີການປະຊຸມປະຈຳເດືອນ ເພື່ອສະຫຼຸບຕີລາຄາການເຄື່ອນໄຫວວຽກງານ ແລະ ວາງແຜນການເຄື່ອນໄຫວໃນຕໍ່ໜ້າຮ່ວມກັນ ຈຶ່ງຈະຮັບປະກັນເຮັດໃຫ້ການປະຕິບັດພາລະບົດບາດ, ສິດ ແລະ ໜ້າທີ່ ຂອງຄະນະສະມາຊິກ ສະພາປະຊາຊົນ ປະຈຳເຂດເລືອກຕັ້ງເມືອງ ໄດ້ຮັບຜົນສຳເລັດຢ່າງມີຄຸນະພາບ.
(ນາງ ພອນທິບ ອິນທິລາດ)