ຕົ້ນເດືອນ ຕຸລາ 2023 ນີ້ຄະນະປະຈໍາສະພາປະຊາຊົນແຂວງ ແລະ ຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງນາແລ ນໍາໂດຍທ່ານ ຄໍາພອນ ເຕີ່ນຈະເລີນ ກໍາມະການຄະນະປະຈໍາສະພາປະຊາຊົນແຂວງ, ປະທານຄະນະກໍາມະການເສດຖະກິດ, ແຜນການ ແລະ ການເງິນ ພ້ອມດ້ວຍຄະນະ ໄດ້ລົງພົບປະ ຢ້ຽມຢາມປະຊາຊົນຜູ້ມີສິດເລືອກຕັ້ງ ຢູ່ບ້ານພູຫຼວງ ແລະ ບ້ານຫາດນາແລ້ງ ເມືອງນາແລ ແຂວງຫຼວງນໍ້າທາ ມີຜູ້ເຂົ້າຮ່ວມທັງໝົດ 132 ຄົນ, ຍິງ 49 ຄົນ. ທັງນີ້ ກໍເພື່ອເປັນການລົງໃກ້ຊິດຕິດແທດກັບຮາກຖານ, ເກັບກໍາສະພາບການເປັນຢູ່ຂອງປະຊາຊົນ ພ້ອມທັງຈັດຕັ້ງປະຕິບັດ ແລະ ຍົກສູງພາລະບົດບາດ, ສິດ ແລະ ໜ້າທີ່ ຂອງສະມາຊິກສະພາປະຊາຊົນແຂວງ ໃນການເປັນຕົວແທນແຫ່ງສິດ, ຜົນປະໂຫຍດຂອງປະຊາຊົນບັນດາ ເຜົ່າ.

ການລົງພົບປະປະຊາຊົນໃນຄັ້ງນີ້, ໄດ້ນໍາເອົາກົດໝາຍ ແລະ ບາງເອກະສານສໍາຄັນໃນຂົງເຂດສະພາປະຊາ ຊົນແຂວງ ເຊັ່ນ: ກົດໝາຍວ່າດ້ວຍ ສະພາປະຊາຊົນຂັ້ນແຂວງ; ກົດໝາຍວ່າດ້ວຍການແກ້ໄຂຄໍາຮ້ອງທຸກ; ມະຕິຂອງຄະນະປະຈໍາສະພາປະຊາຊົນແຂວງ ແລະ ຜົນສໍາເລັດກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ລົງໂຄສະນາ, ເຜີຍແຜ່, ປຸກລະດົມພໍ່ແມ່ປະຊາຊົນ ໃຫ້ຮັບຮູ້, ເຂົ້າໃຈ ແລະ ເຂົ້າຮ່ວມໃນການປະຕິບັດແນວທາງຂອງພັກ, ນະໂຍບາຍຂອງລັດ, ຍົກສູງສະຕິເຄົາລົບ, ປະຕິບັດລັດຖະທໍາມະນູນ, ກົດໝາຍ, ນິຕິກໍາໃຕ້ກົດໝາຍ, 2 ວາລະແຫ່ງຊາດ ໃຫ້ນັບມື້ສູງຂຶ້ນ. ໃນໂອກາດດຽວກັນນີ້ ຄະນະສະມາ ຊິກສະພາປະຊາຊົນແຂວງ ຍັງໄດ້ໂຊຸກຍູ້ ໃຫ້ພໍ່ແມ່ປະຊາຊົນພາຍໃນບ້ານ ມີຄວາມສາມັກຄີ, ຮັກແພງ, ຊ່ວຍເຫຼືອເຊິ່ງກັນ ແລະ ກັນ; ສົ່ງເສີມມູນເຊື້ອອອກແຮງງານ, ເອົາໃຈໃສ່ການປູກ-ການລ້ຽງ, ການຜະລິດເປັນສິນຄ້າ ເພື່ອສ້າງເສດຖະກິດຄອບຄົວ ຕາມທິດກຸ້ມຕົນເອງ, ເພີ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ.

                                                                                                                                                                                           ໂດຍ: ທອງລຸນ ອູ່ຄຳຫຼ້າ