(ສພຊ) ເພື່ອເປັນການສະຫຼຸບວຽກງານການເຄື່ອນໄຫວຂອງຄະນະມິດຕະພາບລັດຖະສະພາ ລາວ ແລະ ໄທ ໄລຍະ 5 ປີຜ່ານມາ (2016-2020) ແລະ ທິດທາງແຜນການເຄື່ອນໄຫວ 5 ປີ (2021-2025) ແລະ ແຜນການປີ 2023 ແລະ ເພື່ອເປັນການ ແລກປ່ຽນຖອດຖອນບົດຮຽນໃນການປະຕິບັດໜ້າທີ່ເຊິ່ງກັນ ແລະ ກັນຂອງຄະນະມິດຕະພາບລັດຖະສະພາ ລາວ ແລະ ໄທ.

ໃນຕອນແລງຂອງວັນທີ 15 ທັນວາ 2022 ທີ່ສະພາແຫ່ງຊາດ ຄະນະມິດຕະພາບລັດຖະສະພາລາວ ແລະ ໄທ ໄດ້ຈັດກອງປະຊຸມສະຫຼຸບແຜນການເຄື່ອນໄຫວ ແລະ ວາງທິດທາງແຜນການໃນຕໍ່ໜ້າ ໂດຍການເປັນ ປະທານຂອງ ທ່ານ ສຸບັນ ສະວະບຸດ ປະທານກໍາມາທິການວຽກງານສະມາຊິກສະພາແຫ່ງຊາດ, ປະທານຄະນະມິດຕະພາບລັດຖະສະພາລາວ ແລະ ໄທ, ມີບັນດາທ່ານຮອງຄະນະມິດຕະພາບ ແລະ ບັນທ່ານຄະນະມິດຕະພາບ ລາວ ແລະ ໄທ ເຂົ້າຮ່ວມ.

ກອງປະຊຸມໄດ້ຮັບຟັງການຜ່ານມະຕິຂອງຄະນະປະຈໍາສະພາແຫ່ງຊາດວ່າດ້ວຍການແຕ່ງຕັ້ງສະມາຊິກສະພາແຫ່ງຊາດ ເຄື່ອນໄຫວຄະນະມິດຕະພາບລັດຖະສະພາ ລະຫວ່າງສະພາແຫ່ງຊາດ ແລະ ລັດຖະສະພາແຫ່ງຣາຊະອານາຈັກໄທ ສະບັບເລກທີ 133/ຄປຈ.ຕສ, ລົງວັນທີ 17/05/2021; ເຜີຍແຜ່ມະຕິຂອງຄະນະປະຈໍາສະພາແຫ່ງຊາດ ວ່າດ້ວຍພາລະບົດບາດ ແລະ ການເຄື່ອນໄຫວ ຄະນະມິດຕະພາບລັດຖະສະພາ ລະຫວ່າງສະພາແຫ່ງຊາດ ແຫ່ງ ສປປລາວ ກັບ ລັດຖະສະພາຕ່າງປະເທດ ສະບັບເລກທີ 08/ຄປຈ.ຕສ, ລົງວັນທີ 17/07/2021; ຜົນສໍາເລັດການເຄື່ອນໄຫວຂອງຄະນະມິດຕະພາບລັດຖະສະພາລາວ-ໄທ ໄລຍະ 5 ປີ (2021-2025) ແລະ ແຜນຈຸດສຸມປີ 2023 ແລະ ເຜີຍແຜ່ເນື້ອໃນບົດບັນທຶກຄວາມເຂົ້າໃຈ ລະຫວ່າງສະພາແຫ່ງຊາດ ແຫ່ງ ສປປລາວ ແລະ ລັດຖະສະພາ ແຫ່ງ ຣາຊະອານາຈັກໄທ ຈາກນັ້ນ ຜູ້ເຂົ້າຮ່ວມກອງປະຊຸມ ໄດ້ຜັດປ່ຽນກັນປະກອບຄໍາຄິດຄໍາເຫັນ ປຶກສາຫາລື ກ່ຽວກັບແຜນການ ປະຈໍາປີ 2023.

(ພາບ ແລະ ຂ່າວ: ສອນສັກ ວັນວິໄຊ)