ວັນທີ 15 ພຶດສະພາ 2023 ນີ້, ທີ່ສະໂມສອນ ສະພາປະຊາຊົນແຂວງ ຄະນະພັກຮາກຖານ ສະພາປະຊາຊົນ ແຂວງ ເຊກອງ (ສພຂ) ໄດ້ດໍາເນີນກອງປະຊຸມກາງສະໄໝ ຄັ້ງທີ I ເຊິ່ງໃຫ້ກຽດເຂົ້າຮ່ວມເປັນປະທານໂດຍ ສະຫາຍ ເຫລັກໄຫລ ສີວິໄລ ເລຂາພັກແຂວງ, ເຈົ້າແຂວງ ເຊກອງ, ມີສະຫາຍ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ, ສະຫາຍ ປອ ແພງສີ ສີລະວີ ຄະນະປະຈໍາພັກແຂວງ, ຮອງປະທານສະພາປະຊາຊົນແຂວງ, ສະຫາຍ ນາງ ຄໍາເສັງ ທຸມມະວົງສາ ກໍາມະການພັກແຂວງ, ເລຂາຄະນະພັກຮາກຖານ, ຮອງປະທານສະພາປະຊາຊົນແຂວງ, ຄະນະພັກຮາກຖານ, ຄະນະໜ່ວຍພັກ, ຫົວໜ້າຈຸ-ຮອງຈຸ ພ້ອມດ້ວຍແຂກຖືກເຊີນເຂົ້າຮ່ວມ.

           ວາລະດໍາເນີນກອງປະຊຸມ ຄະນະພັກຮາກຖານ ແລະ ຂະແໜງການທີ່ກ່ຽວຂ້ອງໄດ້ເຜີຍແຜ່ ເຊື່ອມຊຶມ ບັນດານິຕິກໍາຕ່າງໆ ກ່ຽວກັບການດໍາເນີນກອງປະຊຸມຄົບຄະນະກາງສະໄໝ ເປັນຕົ້ນ: ຄໍາສັ່ງເພີ່ມເຕີມຂອງຄະນະປະຈໍາພັກແຂວງວ່າດ້ວຍການດໍາເນີນກອງປະຊຸມກາງສະໄຫມຄົບຄະນະບໍລິຫານງານກາງສະໄຫມ ຂອງຄະນະບໍລິຫານງານພັກແຕ່ລະຂັ້ນ, ຄໍາສັ່ງແນະນໍາຂອງຄະນະຈັດຕັ້ງແຂວງ ວ່າດ້ວຍການຈັດຕັ້ງປະຕິບັດ ຜ່ານຄໍາສັ່ງເພີ່ມເຕີມຂອງຄະນະປະຈໍາພັກແຂວງວ່າດ້ວຍການດໍາເນີນກອງປະຊຸມກາງສະໄຫມຄົບຄະນະບໍລິຫານງານກາງສະໄຫມ ຂອງຄະນະບໍລິຫານງານພັກແຕ່ລະຂັ້ນ, ມາດຖານຂອງພະນັກງານນໍາພາຫ-ຄຸ້ມຄອງ, 6 ມາດຖານ 11 ຂໍ້ຫ້າມຂອງສະມາຊິກພັກ, ສິດ ແລະໜ້າທີ່ຂອງຄະນະພັກແຕ່ລະຂັ້ນ ແລະ ຍັງໄດ້ເຊື່ອມຊຶມມະຕິ ຂອງກົມການເມືອງສູນກາງພັກ ສະບັບເລກທີ 030 ວ່າດ້ວຍມາດຕະຖານ ຂອງພະນັກງານນໍາພາ-ຄຸ້ມຄອງ.                  ພ້ອມນັ້ນ, ຄະນະພັກຮາກຖານ ຍັງໄດ້ສະຫຼຸບຕີລາຄາຄືນການຈັດຕັ້ງປະຕິບັດວຽກງານ ໃນໄລຍະ 2 ປີເຄິ່ງຜ່ານມາ ແລະ ວາງທິດທາງແຜນການທ້າຍສະໄໝ ໃນຕໍ່ໜ້າ, ພ້ອມທັງດໍາເນີນຊີວິດການເມືອງ, ທາບທາມຄວາມເຊື່ອໝັ້ນໄວ້ວາງໃຈ ຂອງສະມາຊິກພັກ ຕໍ່ບຸກຄົນໃນຄະນະພັກ, ສໍາຫຼວດການນໍາພາລວມ ຂອງຄະນະພັກຮາກຖານ ແລະ ບຸກຄົນໃນຄະນະພັກຮາກຖານ.

            ທັງນີ້, ກໍເພື່ອເປັນການປະເມີນຄືນຄວາມຮັບຜິດຊອບການເມືອງ ຂອງຄະນະພັກ ກໍຄືບັນດາສະຫາຍຄະນະພັກຮາກຖານ ໃນໄລຍະຜ່ານມາ ຊຶ່ງຍົກໃຫ້ເຫັນຜົນງານດ້ານດີ, ດ້ານອ່ອນ, ຂໍ້ຄົງຄ້າງ ເພື່ອເປັນບ່ອນອີງໃນການນໍາພາ-ຊີ້ນໍາການຈັດຕັ້ງປະຕິບັດວຽກງານໃນຮາກຖານຂອງຕົນໃຫ້ບັນລຸຕາມຄາດໝາຍທີ່ວາງໄວ້.

            ກອງປະຊຸມຈະໄດ້ດໍາເນີນເປັນເວລາ 2 ວັນຄື: ວັນທີ 15-16 ພຶດສະພາ 2023 ຈຶ່ງຈະສໍາເລັດ.

#ໂດຍ: ອາລົມດີ.