ໃນວັນທີ 11 ມິຖຸນາ 2024, ທ່ານ ນາງ ເກດມະນີ ບັນດາສັກ, ຄະນະປະຈໍາ ສະພາປະຊາຊົນ, ປະທານ ຄະນະກໍາມະການ ວັດທະນະທໍາ–ສັງຄົມ ແລະ ບັນດາເຜົ່າ ສະພາປະຊາຊົນ ນວ ພ້ອມດ້ວຍຄະນະໄດ້ຕ້ອນຮັບການມາຢ້ຽມຢາມ ແລະ ເຮັດວຽກ ຢູ່ສະພາປະຊາຊົນ ນວ ຂອງ ສະຫາຍ ເວີ່ນ ຟູເຫີງ, ສະມາຊິກກໍາມະການປະຈໍາ ສະພາຜູ້ແທນປະຊາຊົນແຂວງ, ຫົວໜ້າຄະນະກໍາມະການ ວຽກງານການຕ່າງປະເທດ, ຊົນເຜົ່າ ແລະ ຄົນຈີນຕ່າງດ້າວ ຂອງສະພາຜູ້ແທນປະຊາຊົນ ແຂວງຫູໜານ, ສປ ຈີນ ພ້ອມດ້ວຍຄະນະ.

ໃນໂອກາດດັ່ງກ່າວ, ສອງຄະນະຜູ້ແທນສະພາປະຊາຊົນຂັ້ນທ້ອງຖິ່ນໄດ້ພົບປະສອງຝ່າຍ ຊຶ່ງເປັນການຈັດຕັ້ງຜັນຂະຫຍາຍແຜນພັດທະນາການຮ່ວມມືລະຫວ່າງສອງ ພັກ-ລັດ ແລະ ປະຊາຊົນສອງຊາດ ລາວ-ຈີນ ໂດຍສະເພາະການຈັດຕັ້ງປະຕິບັດແຜນແມ່ບົດ ວ່າດ້ວຍການເປັນຄູ່ຮ່ວມສະຕາກໍາ ລາວ-ຈີນ, ທັງເປັນການປະກອບສ່ວນໃຫ້ແກ່ການຮັດແໜ້ນສາຍພົວພັນມິດຕະພາບອັນເປັນມູນເຊື້ອ, ການຮ່ວມມືແບບເພື່ອນມິດຍຸດທະສາດຮອບດ້ານໃຫ້ໝັ້ນຄົງຍາວນານຕາມທິດ 4 ດີ ຄື (1) ເປັນບ້ານໃກ້ເຮືອນຄຽງທີ່່ດີ, (2) ເພື່ອນມິດທີ່ດີ, (3) ສະຫາຍທີ່ດີ ແລະ (4) ຄູ່ຮ່ວມມືທີ່ດີ.

ນອກຈາກນີ້, ການພົບປະສອງຝ່າຍ ສອງຄະນະຜູ້ແທນ ກໍໄດ້ປຶກສາຫາລືແລກປ່ຽນບົດຮຽນໃນຫຼາຍດ້ານ ເປັນຕົ້ນ: ດ້ານການເມືອງ, ເສດຖະກິດ, ວັດທະນະທໍາ-ສັງຄົມ ແລະ ການຕ່າງປະເທດ ຂອງນະຄອນຫຼວງວຽງຈັນ, ແລກປ່ຽນດ້ານພາລະບົດບາດ, ສິດ ແລະ ໜ້າທີ່ຂອງສະພາປະຊາຊົນ ນວ ເຊິ່ງແມ່ນອົງການຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນ ຊາວນະຄອນຫຼວງ, ເປັນອົງການອໍານາດລັດຂັ້ນທ້ອງຖິ່ນ, ປະຕິບັດ 03 ພາລະບົດບາດ ຄື: ພິຈາລະນາ ແລະ ຮັບຮອງເອົານິຕິກໍາໃຕ້ກົດໝາຍ, ຕົກລົງບັນຫາສໍາຄັນພື້ນຖານ ແລະ ຕິດຕາມກວດກາບັນດາອົງການຈັດຕັ້ງລັດ ອ້ອມຂ້າງ ນະຄອນຫຼວງວຽງຈັນ ໂດຍສະເພາະພາລະບົດບາດ, ສິດ ແລະ ໜ້າທີ່ຂອງຄະນະກໍາມະການ ວັດທະນະທໍາ-ສັງຄົມ ແລະ ບັນດາເຜົ່າ ໃນການລົງຕິດຕາມກວດກາ ການຄຸ້ມຄອງຄົນຕ່າງປະເທດ ທີ່ມາດໍາລົງຊີວິດ ແລະ ດໍາເນີນທຸລະກິດ ໃນ ສປປ ລາວ ເຊິ່ງນະຄອນຫຼວງວຽງຈັນ ກໍ່ເປັນຈຸດໝາຍໜຶ່ງທີ່ພົນລະເມືອງຈີນໃຫ້ຄວາມສົນໃຈເຂົ້າມາລົງທຶນ ແລະ ດໍາລົງຊີວິດເປັນຈໍານວນຫຼາຍ ເຊິ່ງເປັນທ່າແຮງທີ່ສໍາຄັນ ໃນການພັດທະນາເສດຖະກິດຂອງນະຄອນ ຫຼວງວຽງຈັນ ໄດ້ດີສົມຄວນ, ແຕ່ເຖິງຢ່າງໃດກໍ່ຕາມການເຄື່ອນໄຫວດໍາເນີນທຸລະກິດຈໍານວນໜຶ່ງ ຍັງບໍ່ເປັນໄປຕາມແນວທາງນະໂຍບາຍຂອງພັກ, ລະບຽບກົດໝາຍ ຂອງ ສປປ ລາວ ເທົ່າທີ່ຄວນ, ອາດເປັນຍ້ອນຄວາມເຂົ້າໃຈທາງດ້ານວັດທະນະທໍາ, ການສື່ສານ, ພາສາປາກເວົ້າ ທີ່ແຕກຕ່າງກັນ. ໃນໂອກາດທີ່ສອງສະພາປະຊາຊົນຂັ້ນທ້ອງຖິ່ນໄດ້ພົບປະເຮັດວຽກຮ່ວມກັນຄັ້ງນີ້, ຄະນະຜູ້ແທນສະພາປະຊາຊົນ ນວ ຍັງໄດ້ສະເໜີຕໍ່ຕໍ່ຄະນະຜູ້ແທນປະຊາຊົນ ແຂວງຫູໜານ ໃນການຊ່ວຍຊຸກຍູ້ພາກສ່ວນທີ່ຄຸ້ມຄອງພົນມະເມືອງຈີນ, ນັກທຸລະກິດຈີນ ທີ່ອາໄສຢູ່ ສປປ ລາວ ໃຫ້ເຂົ້າໃຈຂະໜົບທໍານຽມ, ວັດທະນະທໍໍາ, ຮີດຄອງປະເພນີ, ແນວທາງນະໂຍບາຍຂອງພັກ ແລະ ລະບຽບກົດໝາຍ ຂອງ ສປປ ລາວ ເພື່ອພ້ອມກັນພັດທະນາເສດຖະກິດ ຂອງນະຄອນຫຼວງວຽງຈັນ ໃຫ້ເຕີບໃຫຍ່ຂະຫຍາຍຕົວໃນຕໍ່ໜ້າ.