ວັນທີ 16 ພຶດສະພາ 2022, ທ່ານ ອານຸພາບ ຕຸນາລົມ ເລຂາທິການສູນກາງພັກ, ເລຂາຄະນະພັກ, ປະທານ ສະພາປະຊາຊົນ ນະຄອນຫຼວງວຽງຈັນ ພ້ອມດ້ວຍຄະນະ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ຫງວຽນ ຫງ໋ອກ ຕ່ວນ ຮອງເລຂາຄະນະພັກ, ປະທານສະພາປະຊາຊົນ, ຮອງຫົວໜ້າຄະນະສະມາຊິກ ສະພາແຫ່ງຊາດ ນະຄອນຫຼວງຮ່າໂນ້ຍ ພ້ອມດ້ວຍຄະນະ ທີ່ເດີນທາງມາຢ້ຽມຢາມ ແລະ ເຮັດວຽກ ຢູ່ນະຄອນຫຼວງວຽງຈັນ ໃນລະຫວ່າງວັນທີ 15-17 ພຶດສະພາ 2022.

ໂອກາດນີ້, ທ່ານ ອານຸພາບ ຕຸນາລົມ ກໍໄດ້ກ່າວສະແດງຄວາມຍິນດີ, ຕ້ອນຮັບຢ່າງອົບອຸ່ນ ແລະ ຕີລາຄາສູງ ຕໍ່ການມາຢ້ຽມຢາມຂອງຄະນະຜູ້ແທນສະພາປະຊາຊົນ ນະຄອນຫຼວງຮ່າໂນ້ຍ ໃນຄັ້ງນີ້, ເຊິ່ງເປັນການປະກອບສ່ວນສຳຄັນ ໃນການເສີມຂະຫຍາຍການພົວພັນຮ່ວມມື ລະຫວ່າງສະພາປະຊາຊົນ ນະຄອນຫຼວງຮ່າໂນ້ຍ ແລະ ສະພາປະຊາຊົນ ນະຄອນຫຼວງວຽງຈັນ. ພ້ອມດຽວກັນນີ້, ທັງສອງຝ່າຍກໍໄດ້ລາຍງານສະພາບການພັດທະນາເສດຖະກິດ-ສັງຄົມ ແລະ ຜົນສຳເລັດການເຄື່ອນໄຫວວຽກງານໄລຍະຜ່ານມາ ເຊິ່ງທ່ານປະທານສະພາປະຊາຊົນ ນະຄອນຫຼວງ ກໍໄດ້ລາຍງານຫຍໍ້ກ່ຽວກັບແຜນພັດທະນາເສດຖະກິດ-ສັງຄົມ ຂອງນະຄອນຫຼວງ, ໂຄງປະກອບກົງຈັກ ແລະ ບຸກຄະລາກອນ ຂອງສະພາປະຊາຊົນ ນະຄອນຫຼວງ ຊຸດທີ II, ການເປີດປະເທດເພື່ອຕ້ອນຮັບນັກທ່ອງທ່ຽວ ແລະ ໄດ້ມີການແລກປ່ຽນບົດຮຽນລະຫວ່າງຜູ້ແທນທັງສອງຝ່າຍ ໃນຂົງເຂດວຽກງານສະພາ ເພື່ອເປັນການສ້າງຄວາມເຂັ້ມແຂງໃຫ້ກັບບັນດາສະມາຊິກ ສະພາແຫ່ງຊາດ,​ ສະມາຊິກ ສະພາປະຊາຊົນ ນະຄອນຫຼວງ ແລະ ພະນັກງານ-ວິຊາການ. ການມາຢ້ຽມຢາມຄັ້ງນີ້ ແມ່ນຢູ່ທ່າມກາງບັນຍາກາດທີ່ສອງພັກ ສອງລັດ ລາວ-ຫວຽດນາມ ກຳລັງກະກຽມຄວາມພ້ອມໃນການສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ ປີ 2022 ກໍຄືສະເຫຼີມສະຫຼອງວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 54 ປີ (18/07/1977-18/07/2022) ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 60 ປີ (05/09/1962-05/09/2022) ໃຫ້ມີບັນຍາກາດຟົດຟື້ນ.

ໂອກາດດັ່ງກ່າວ, ທ່ານ ຫງວຽນ ຫງ໋ອກ ຕ່ວນ ກໍໄດ້ສະແດງຄວາມຂອບໃຈມາຍັງທ່ານ ອານຸພາບ ຕຸນາລົມ ພ້ອມດ້ວຍຄະນະ ທີ່ໄດ້ໃຫ້ການຕ້ອນຮັບຢ່າງອົບອຸ່ນໃນຄັ້ງນີ້ ພ້ອມທັງໄດ້ສະແດງຄວາມຍ້ອງຍໍຊົມເຊີຍຕໍ່ການພັດທະນານະຄອນຫຼວງວຽງຈັນ ທີ່ມີທ່າກ້າວກະໂດດ ແລະ ຈະສືບຕໍ່ໃຫ້ການສະໜັບສະໜູນ, ແລກປ່ຽນບົດຮຽນ ລະຫວ່າງສະມາຊິກ ສະພາແຫ່ງຊາດ ກໍຄືສະມາຊິກ ສະພາປະຊາຊົນ ນະຄອນຫຼວງ ແລະ ວຽກງານອື່ນໆ ໃຫ້ນັບມື້ນັບຂະຫຍາຍຕົວຍິ່ງຂຶ້ນ.