ຄະນະຜູ້ແທນສະພາປະຊາຊົນແຂວງອຸດົມໄຊ ແຫ່ງ ສປປ ລາວ ສໍາເລັດການຢ້ຽມຢາມ ແລະ ເຮັດວຽກຢູ່ ແຂວງດຽນບຽນແຫ່ງ ສສ ຫວຽດນາມ ລະຫວ່າງວັນທີ 19 – 22 ທັນວາ 2023, ສະຫາຍ ຄໍາດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ພົບປະແລກປ່ຽນບົດຮຽນວຽກງານສະພາປະຊາຊົນແຂວງ, ຊຶ່ງຝ່າຍ ສສ ຫວຽດນາມ ນໍາໂດຍ ສະຫາຍ ລໍ ວັນ ເຟືອງ ກໍາມະການປະຈໍາພັກແຂວງ, ປະທານສະພາປະຊາຊົນແຂວງດຽນບຽນ ແຫ່ງ ສສ ຫວຽດນາມ ພ້ອມດ້ວຍຄະນະ.

ຈຸດປະສົງການຢ້ຽມຢາມ ແລະ ເຮັດວຽກຄັ້ງນີ້, ກໍເພື່ອເປັນການຈັດຕັ້ງຜັນຂະຫຍາຍ ແລະ ເພີ່ມທະວີການຮ່ວມມືສາຍພົວພັນພັນແບບພິເສດ ແລະ ການຮ່ວມມືຮອບດ້ານ  ລະຫວ່າງແຂວງອຸດົມໄຊ ກັບ ແຂວງດຽນບຽນ ເວົ້າລວມ, ເວົ້າສະເພາະແມ່ນສອງອົງການນິຕິບັນຍັດຂັ້ນທ້ອງຖິ່ນຂອງສອງປະເທດ ລາວ – ຫວຽດນາມ, ເພື່ອຕອບສະໜອງການເຊື່ອເຊີນຂອງ ສະຫາຍ ລໍ ວັນ ເຟືອງ ປະທານສະພາປະຊາຊົນແຂວງດຽນບຽນ ແຫ່ງ ສສ ຫວຽດນາມ. ການພົບປະແລກປ່ຽນບົດຮຽນໃນຄັ້ງນີ້ ເປັນຄັ້ງທໍາອິດຂອງສະພາປະຊາຊົນແຂວງອຸດົມໄຊ ຊຸດທີ II. ຫົວຂໍ້ໃນການພົບປະ ແມ່ນວຽກງານ ໂຄງປະກອບການຈັດຕັ້ງ ແລະ ພາລະບົດບາດ, ສິດ ແລະ ໜ້າທີ່ ຂອງສອງສະພາປະຊາຊົນແຂວງ. ໃນພິທີໄດ້ຮັບຟັງການລາຍງານສະພາບລວມໂດຍຫຍໍ້ການເຄື່ອນໄຫວວຽກງານຂອງສະພາປະຊາຊົນແຂວງດຽນບຽນ ແລະ ແຂວງອຸດົມໄຊ ພ້ອມທັງປະກອບຄໍາຄິດຄິດຄໍາເຫັນແລກ ປ່ຽນກັນ ວຽກງານການເຄື່ອນໄຫວຂອງສະພາປະຊາຊົນແຂວງ, ພາລະບົດບາດການຈັດຕັ້ງປະຕິບັດຂອງຄະນະກໍາມະການ ເປັນຕົນ: ວຽກງານການຕິດຕາມກວດກາ, ການແກ້ໄຂຄໍາຮ້ອງຂໍຄວາມເປັນທໍາ, ການຄົ້ນຄວ້າພິຈາລະນາ, ຮັບຮອງການຈັດສັນງົບປະມານ, ການປະສານລະຫວ່າງສະພາປະຊາຊົນແຂວງ ກັບອົງການປົກຄອງແຂວງ ແລະ ການເປັນເສນາທິການ ຂອງສະພາປະຊາຊົນແຂວງ ວຽກງານອື່ນໆ  ສອງຝ່າຍໄດ້ສະເໜີຍິນດີຈະໄດ້ສືບຕໍ່ ຢ້ຽມຢາມ, ໄປມາຫາສູ່ກັນເຊິ່ງກັນ ແລະ ກັນ, ພົບປະແລກປ່ຽນບົດຮຽນວຽກງານສະພາປະຊາຊົນແຂວງ ໂດຍພັດປ່ຽນກັນເປັນເຈົ້າພາບຕາມເງື່ອນໄຂຕົວຈິງ.

ພາຍຫຼັງທີ່ໄດ້ຈັດພິທີພົບປະແລກປ່ຽນບົດຮຽນ ຄະນະຜູ້ແທນສະພາປະຊາຊົນແຂວງອຸດົມໄຊ ໄດ້ທັດສະນະເບິ່ງການຂະຫຍາຍຍົກລະດັບ, ປັບປຸ່ງ, ກໍ່ສ້າງສະໜາມບິນແຂວງດຽນບຽນ, ທ່ຽວຊົມສະຖານທີ່ຮ່ອງຮອຍປະຫວັດ ສາດບາງຈຸດ (ຈຸດ A1 ໄຊຊະນະບັ້ນຮົບດຽນບຽນຟູ, ຖໍ້າເດິກາສເຕີ) ແລະ  ທັດສະນະເບິ່ງການຜະລິດ, ຫົວໜ່ວຍທຸລະກິດ, ການພັດທະນາເສດຖະກິດ – ສັງຄົມ; ວິທີການລ້ຽງກວາງ, ການປູກຕົ້ນໄມ້ກິນໝາກ; ໝາກກາດາເມ່ຍ, ໝາກມີ້,   ໝາກພຸກ ແລະ ກາເຟ ຢູ່ເມືອງອັງ, ຕາແສງແທ່ງເສື່ອງ, ແຂວງດຽນບຽນຕື່ມອີກ.

ພາບ/ຂ່າວ: ສະພາປະຊາຊົນແຂວງ.