(ສປນວ) ໃນລະຫວ່າງ 23-27 ກັນຍາ 2024, ທ່ານ ນາງ ລໍາພອຍ ສີອັກຄະຈັນ, ກໍາມະການປະຈໍາພັກ ນະຄອນຫຼວງວຽງຈັນ ຮອງປະທານສະພາປະຊາຊົນ ນະຄອນຫຼວງວຽງຈັນ ພ້ອມດ້ວຍຄະນະ ໄດ້ເດີນທາງໄປເຂົ້າຮ່ວມ ກອງປະຊຸມບັນດານະຄອນເພື່ອນມິດກັບນະຄອນໂຮ່ຈິມິນ ຄັ້ງທີ 2 ແລະ ກອງປະຊຸມເສດຖະກິດນະຄອນໂຮ່ຈິມິນ ປີ 2024 ທີ່ ນະຄອນໂຮ່ຈິມິນ, ສສ. ຫວຽດນາມ.
ເຊິ່ງການເຂົ້າຮ່ວມກອງປະຊຸມດັ່ງກ່າວນີ້ ໄດ້ຕີລາຄາສູງຕໍ່ການຮ່ວມມື, ສາຍພົວພັນອັນສະໜິດສະແໜ້ນ ຂອງສອງຊາດ ເວົ້າລວມ, ເວົ້າສະເພາະ ນະຄອນຫຼວງວຽງຈັນ ແລະ ນະຄອນໂຮ່ຈີມິນ ໃນໄລຍະຜ່ານມາ ເປັນຕົ້ນ: ການຮ່ວມມືຂອງສອງນະຄອນ, ສອງສະພາປະຊາຊົນ ແລະ ການເສີມຂະຫຍາຍສາຍພົວພັນ-ຮ່ວມມື ໃນຂົງເຂດການເມືອງ, ການພັດທະນາເສດຖະກິດ-ສັງຄົມ, ເຕັກນິກວິຊາການ, ກະສິກໍາ ແລະ ການທ່ອງທ່ຽວ.
ພິເສດນີ້, ໃນວັນທີ 26 ກັນຍາ 2024 ສະຫາຍ ຟານ ວັນ ໝາຍ ກໍາມະການສູນກາງພັກ, ຮອງເລຂາຄະນະພັກນະຄອນໂຮ່ຈີມິນ, ປະທານຄະນະກໍາມະການປະຊາຊົນ ນະຄອນໂຮ່ຈີມິນ, ສສ.ຫວຽດນາມ, ສະຫາຍ ຟາມ ທັ່ນ ກ່ຽນ, ຄະນະປະຈໍາພັກ, ຮອງປະທານສະພາປະຊາຊົນ ນະຄອນໂຮ່ຈີມິນ ແລະ ບັນດາຄະນະຜູ້ແທນຂອງ ສສ. ຫວຽດນາມ ໄດ້ໃຫ້ກຽດຈັດວາລະພົບປະສະເພາະ ໃຫ້ ຄະນະຜູ້ແທນຂອງ ສປປ ລາວ. ໃນວາລະພົບດັ່ງກ່າວນີ້, ທ່ານ ນາງ ລໍາພອຍ ສີອັກຄະຈັນ ກໍໄດ້ເນັ້ນໜັກເຖິງ ທິດທາງການຮ່ວມມືຕໍ່ໜ້າ ແລະ ຜັນຂະຫຍາຍການຈັດຕັ້ງປະຕິບັດໂຄງການຮ່ວມມື ຂອງສອງນະຄອນ-ສອງສະພາປະຊາຊົນ ໃຫ້ສູ່ລວງເລີກຍິ່ງຂື້ນ.
