ການເຄື່ອນໄຫວຄັ້ງນີ້, ຄະນະຜູ້ແທນສະພາແຫ່ງ ຊາດລາວ ໄດ້ພົບປະຄະນະນໍາຂອງພັກເດີລິນເກ ທີ່ສໍານັກງານການຕ່າງປະເທດຂອງສະຫະພັນທະລັດ Werderscher Markt 1; ພົບປະແລກປ່ຽນບົດຮຽນກ່ຽວກັບການສ້າງແຜນ ແລະ ການອະນຸມັດແຜນງົບປະມານຕ່າງໆຂອງລັດຖະສະພາແຫ່ງລັດ BUNDESRAT(ສະພາສູງ); ພົບປະຄະນະຜູ້ແທນຂອງພັກຝ່າຍຊ້າຍໃນລັດຖະສະພາແຫ່ງສະຫະພັນ ແລະ ຖອດຖອນບົດຮຽນໃນການໂຄສະນາ, ການທ່າຍຖອດສົດ, ການສໍາພາດສະມາຊິກລັດຖະສະພາຕໍ່ສື່ມວນຊົນ ແລະ ເຂົ້າຢ້ຽມຊົມຕຶກລັດຖະສະພາແຫ່ງສະຫະພັນທະລັດເຢຍລະ ມັນ DEUTSCHER BUNDESTAG; ພົບປະເຮັດວຽກກັບຄະນະນໍາກະຊວງການຕ່າງປະເທດ; ຢ້ຽມຊົມການປະຊຸມໃຫຍ່ຂອງບັນດາທ່ານສະມາ ຊິກສະພາແຫ່ງລັດ; ແລກປ່ຽນບົດຮຽນກັບຜູ້ອໍານວຍການບໍລິຫານລັດຖະສະພາແຫ່ງລັດແຊັກໂຊນີ; ປຶກສາຫາລືກັບກົມກວດສອບບັນຊີແຫ່ງລັດ ກ່ຽວກັບການກວດສອບພາຍໃນຂອງລັດແຊັກໂຊນີ; ແລກປ່ຽນບົດຮຽນກັບບໍລິສັດໃຫ້ບໍລິການສະໜອງໄຟຟ້າ ແລະ ນໍ້າປະປາ ໃຫ້ແກ່ປະຊາຊົນແຫ່ງລັດແຊັກໂຊນີ; ທັດສະນະສຶກສາຢ້ຽມຊົມຫ້ອງປະຊຸມໃຫຍ່ລັດຖະສະພາ ແຫ່ງ ສສ. ເຢຍລະມັນ ແລະ ລັດຖະສະພາແຫ່ງລັດຕ່າງໆ.

ນອກຈາກນັ້ນ, ຄະນະຜູ້ແທນສະພາແຫ່ງຊາດລາວ ໄດ້ໄປສະຖານເອກອັກຄະລັດຖະທູດ ແຫ່ງ ສປປລາວ ປະຈໍາ ສສ.ເຢຍລະມັນ ເພື່ອພົບປະໂອ້ລົມຄະນະນໍາ-ພະນັກງານຂອງສະຖານທູດ, ນັກສຶກສາ ແລະ ບັນດາຄົນເຊື້ອຊາດລາວ ພ້ອມທັງຮັບຟັງການລາຍງານຈາກທ່ານເອກອັກຄະລັດຖະທູດ ແຫ່ງ ສປປລາວ ປະຈໍານະຄອນຫຼວງແບກ ແລງ ກ່ຽວກັບການເຄື່ອນໄຫວວຽກງານຂອງສະ ຖານທູດ, ນັກສຶກສາ ແລະ ບັນດາຄົນເຊື້ອຊາດລາວ; ສໍາລັບການພົວພັນຄົນເຊື້ອຊາດລາວ, ສະຖານເອກອັກຄະລັດຖະທູດ ແຫ່ງ ສປປລາວ ໄດ້ເອົາໃຈໃສ່ເຄື່ອນໄຫວຮ່ວມກັບພີ່ນ້ອງຄົນເຊື້ອ ຊາດລາວທີ່ຢູ່ເຢຍລະມັນຢ່າງປົກກະຕິ ເພື່ອຮັດ ແໜ້ນສາຍພົວພັນ, ຮັກສາຄວາມສາມັກຄີ ແລະ ຂະຫຍາຍການພົວພັນຮ່ວມມື ໃຫ້ນັບມື້ກວ້າງຂວາງ, ສ້າງຄວາມເຂົ້າໃຈອັນຖືກຕ້ອງ ເຊິ່ງສະແດງອອກຜ່ານມາ ສາມາດຢັ້ງຢືນໄດ້ວ່າ ພີ່ນ້ອງຄົນເຊື້ອຊາດລາວສ່ວນຫຼາຍ ແມ່ນມີຄວາມເຂົ້າໃຈຢ່າງຖືກຕ້ອງ, ມີແນວຄິດກ້າວໜ້າ, ຮັບຮູ້ ແລະ ເຫັນໄດ້ສະພາບການຕົວຈິງຂອງ ສປປລາວ, ມີການຍ້ອງຍໍຊົມເຊີຍຜົນສຳເລັດໃນການສ້າງສາພັດທະນາປະເທດຊາດ. ຈາກນັ້ນ, ປະທານກຳມາທິການການຕ່າງປະເທດ ໄດ້ມີຄຳເຫັນໂອລົມ ໂດຍແຈ້ງໃຫ້ຊາບກ່ຽວກັບສະພາບການພົ້ນເດັ່ນໃນການພັດ ທະນາເສດຖະກິດ-ສັງຄົມ ຂອງ ສປປລາວ, ການ ເຄື່ອນໄຫວໂດຍຫຍໍ້ຂອງສະພາແຫ່ງຊາດລາວ, ຜົນສໍາເລັດກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX, ຜົນການຢ້ຽມຢາມ ແລະ ເຮັດວຽກຂອງຄະນະຜູ້ແທນສະພາ ແຫ່ງຊາດລາວ ທີ່ປະເທດເຢຍລະມັນ; ພ້ອມກັນນີ້, ທ່ານຍັງໄດ້ຮຽກຮ້ອງໃຫ້ຄະນະນໍາ, ພະນັກງານພາຍໃນສະຖານເອກອັກຄະລັດຖະທູດ, ນັກສຶກສາ ​ແລະ ພີ່ນ້ອງເຊື້ອ​ຊາດ​ລາວທຸກ​ຄົນ ຈົ່ງຕັ້ງໜ້າປະຕິບັດພາລະບົດບາດ, ສິດ ແລະ ໜ້າທີ່ຂອງຕົນຢ່າງຕັ້ງໜ້າ ເພື່ອຜົນປະໂຫຍດຂອງປະເທດຊາດ ແລະ ປະຊາຊົນ, ສືບຕໍ່ຮັກສາມູນເຊື້ອຮັກແພງສາ ມັກຄີຊ່ວຍເຫຼືອເຊິ່ງກັນແລະກັນ, ເຄື່ອນໄຫວດໍາລົງຊີວິດຕະຫຼອດຮອດການທໍາມາຫາກິນ ໃຫ້ຖືກຕ້ອງຕາມລະບຽບ-ກົດໝາຍຂອງປະເທດທີ່ຕົນອາໄສຢູ່, ຮັກສາຮີດຄອງປະເພນີວັດທະນະທຳອັນດີງາມຂອງຕົນ ແລະ ຮຽກຮ້ອງພີ່ນ້ອງຄົນເຊື້ອຊາດລາວ ໃຫ້ຫວນຄືນບ້ານເກີດເມືອງນອນຂອງພວກເຮົາ ເພື່ອປະກອບສ່ວນສ້າງສາ ແລະ ພັດ ທະນາບ້ານເກີດເມືອງນອນຂອງບັນພະບຸລຸດ ຕາມເງື່ອນໄຂ ແລະ ຄວາມສາມາດ.