(ສພຊ) – ໃນລະຫວ່າງວັນທີ 18-28 ສິງຫາ 2024 ທີ່ນະຄອນຫຼວງປັກກິ່ງ ສປຈີນ, ຄະນະຜູ້ແທນສະ ພາແຫ່ງຊາດລາວ ນຳໂດຍທ່ານ ຈັນທະວົງ ແສນອາມາດມົນຕີ ຮອງປະທານກຳມາທິການການຕ່າງປະເທດ ໄດ້ເດີນ ທາງໄປເຂົ້າຮ່ວມພິທີສະເຫຼີມສະຫຼອງສະພາຜູ້ແທນປະຊາຊົນທົ່ວປະເທດຈີນ ເຂົ້າເປັນສະມາຊິກອົງການສະຫະພັນລັດຖະສະພາສາກົນ ຫຼື ໄອພີຢູ (IPU) ຄົບຮອບ 40 ປີ ແລະ ເຂົ້າຮ່ວມກອງປະຊຸມສຳມະນາລະດັບພາກພື້ນປີ 2024 ກ່ຽວກັບການບັນລຸເປົ້າໝາຍການພັດທະນາແບບຍືນຍົງ (SDGs) ສໍາລັບລັດຖະສະພາຂອງບັນດາປະ ເທດກໍາລັງພັດທະນາ ຄັ້ງທີ 6 ເຊິ່ງມີສະມາຊິກລັດຖະສະພາຈາກບັນດາປະເທດສະມາຊິກ IPU ເຂົ້າຮ່ວມ 160 ທ່ານ ຈາກ 32 ປະເທດ ໃນນີ້ມີຂັ້ນປະທານລັດຖະສະພາຈາກ 17 ປະເທດ, ປະທານສະຫະພັນລັດຖະສະພາສາກົນ ແລະ ເລຂາທິການໃຫຍ່ສະຫະພັນລັດຖະສະພາສາກົນ.
ກອງປະຊຸມສຳມະນາ ໄດ້ດຳເນີນພາຍໃຕ້ຫົວຂໍ້ “ການແລກປ່ຽນລະຫວ່າງລັດຖະສະພາທີ່ເຂັ້ມແຂງເພື່ອບັນລຸເປົ້າໝາຍການພັດທະນາແບບຍືນຍົງທີ່ດີຂຶ້ນ” ໂດຍໄດ້ແບ່ງອອກເປັນ 4 ຫົວຂໍ້ຍ່ອຍເພື່ອປຶກສາຫາລືເຊັ່ນ: ການຮ່ວມມືກັນຮັກສາສັນຕິພາບ ແລະ ສະຖຽນລະພາບ ເພື່ອການພັດທະນາ ແລະ ຄວາມຈະເລີນຮຸ່ງເຮືອງຮ່ວມກັນ; ຍຸດທະສາດການພັດທະນາເພື່ອເສດຖະກິດໂລກາພິວັດທີ່ມີຜົນປະໂຫຍດທົ່ວໂລກ; ການເຄົາລົບຄວາມຫຼາກຫຼາຍຂອງອາລິຍະທຳ, ຊຸກຍູ້ການແລກປ່ຽນວັດທະນະທຳ ແລະ ການຮຽນຮູ້ເຊິ່ງກັນແລະກັນ; ການພັດທະນາປະຊາທິປະໄຕທີ່ແທດເໝາະກັບເງື່ອນໄຂຂອງຊາດ ແນໃສ່ການຊຸກຍູ້ຢ່າງໜັກແໜ້ນຕໍ່ການຫັນເປັນທັນສະໄໝ. ບັນດາຄະນະຜູ້ແທນຈາກປະເທດຕ່າງໆ ໄດ້ປະກອບຄຳຄິດຄຳເຫັນຢ່າງຫຼາກຫຼາຍ ໂດຍຍົກໃຫ້ເຫັນບົດຮຽນປະເທດຂອງຕົນຕາມຫົວຂໍ້ກອງປະຊຸມ.
ໃນການເຂົ້າຮ່ວມກອງປະຊຸມສຳມະນາດັ່ງກ່າວ, ທ່ານຫົວໜ້າຄະນະຜູ້ແທນລາວ ກໍໄດ້ຂຶ້ນກ່າວຄໍາເຫັນໃນຫົວຂໍ້ “ການຮ່ວມມືກັນຮັກສາສັນຕິພາບ ແລະ ສະຖຽນລະພາບ ເພື່ອການພັດທະນາ ແລະ ຄວາມຈະເລີນຮຸ່ງ ເຮືອງຮ່ວມກັນ” ໂດຍທ່ານໄດ້ເນັ້ນເຖິງບົດບາດຂອງລັດຖະສະພາໃນການປະກອບສ່ວນ ແລະ ຮັກສາສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງໃນລະດັບພາກພື້ນ ແລະ ສາກົນ ເນື່ອງຈາກລັດຖະສະພາມີບົດບາດສຳຄັນໃນການຮັບຮອງກົດໝາຍ ແລະ ໃຫ້ສັດຕະຍາບັນແກ່ບັນດາສົນທິສັນຍາຕ່າງໆ. ພ້ອມນັ້ນ, ທ່ານຍັງໄດ້ເນັ້ນເຖິງ ສປປລາວ ໄດ້ປະຕິບັດນະໂຍບາຍການຕ່າງປະເທດທີ່ສົ່ງເສີມສັນຕິພາບ, ເອກະລາດ, ມິດຕະພາບ ແລະ ເພີ່ມທະວີການຮ່ວມມືກັບປະເທດຕ່າງໆ ແລະ ປະກອບສ່ວນຢ່າງຕັ້ງໜ້າໃນການປະຕິບັດພັນທະຂອງຕົນຢູ່ໃນພາກພື້ນ ແລະ ສາກົນ; ພ້ອມທັງຢຶດໝັ້ນເຈດຈຳນົງທາງການເມືອງໃນການຮ່ວມມືກັບປະຊາຄົມໂລກໃນການແກ້ໄຂບັນຫາຂໍ້ຂັດແຍ່ງ ແລະ ສິ່ງທ້າທາຍຕ່າງໆໃນພາກພື້ນ ແລະ ໃນໂລກໂດຍສັນຕິວິທີ, ປະກອບສ່ວນເຂົ້າໃນການຮັກສາສັນຕິ ພາບ, ຄວາມໝັ້ນຄົງ ແລະ ການຮ່ວມມືເພື່ອການພັດທະນາ.
ທ່ານ ບຸນລ້ອມ ແກ້ວບົວໂຮມ ຮອງປະທານກຳມາທິການວັດທະນະທຳ-ສັງຄົມ ກໍໄດ້ຂຶ້ນປະກອບຄຳເຫັນໃນຫົວຂໍ້ “ການເຄົາລົບຄວາມຫຼາກຫຼາຍຂອງອາລິຍະທຳ ແລະ ຊຸກຍູ້ການແລກປ່ຽນວັດທະນະທຳ ແລະ ການຮຽນຮູ້ເຊິ່ງກັນແລະກັນ” ເຊິ່ງທ່ານໄດ້ກ່າວເຖິງຄວາມຫຼາກຫຼາຍຂອງອາລິຍະທໍາ ແມ່ນສະແດງໃຫ້ເຫັນເຖິງຄວາມຫຼາກຫຼາຍຂອງຊົນເຜົ່າ ແລະ ສາສະໜາ; ຍົກໃຫ້ເຫັນເຖິງຄວາມຫຼາກຫຼາຍທາງດ້ານວັດທະນະທໍາ, ວິຖີຊີວິດ ແລະ ສິລະປະອັນອຸດົມສົມບູນ ຂອງ ສປປລາວ ໃນ 50 ຊົນເຜົ່າ ທີ່ມີຮີດຄອງປະເພນີ, ຄວາມເຊື່ອຖື ແລະ ວິຖີຊີວິດທີ່ແຕກຕ່າງກັນ. ພ້ອມດຽວກັນນັ້ນ, ທ່ານຍັງຮຽກຮ້ອງໃຫ້ບັນດາສະມາຊິກລັດຖະສະພາ ປົກປັກຮັກສາ ແລະ ສົ່ງເສີມເອ ກະລັກຂອງຊາດ, ວັດທະນະທຳ, ພາສາ, ສາສະໜາ ເພື່ອດຳລົງຊີວິດຢູ່ໃນສັງຄົມດຽວກັນຢ່າງກົມກຽວ.
ນອກຈາກນັ້ນ, ຄະນະຜູ້ແທນສະພາແຫ່ງຊາດລາວ ຍັງໄດ້ໄປຢ້ຽມຢາມສະຖານທີ່ທ່ອງທ່ຽວທາງດ້ານປະ ຫວັດສາດ ແລະ ວັດທະນະທຳ ທີ່ມີຊື່ສຽງຂອງ ສປຈີນ, ຫໍພິພິທະພັນພະລາຊະວັງ, ຫໍພິພິທະພັນພັກກອມມູນິດຈີນ; ຢ້ຽມຢາມແຂວງຊານຊີ, ເມືອງຕ້າຖົງ, ເມືອງທາຍຢວນ ແລະ ຢ້ຽມຢາມພື້ນຖານທາງດ້ານເສດຖະກິດຢູ່ນະ ຄອນທຽນຈິນ.