ຄະນະຜູ້ແທນທີ່ເຂົ້າຮ່ວມກອງປະຊຸມໄດ້ພ້ອມກັນທົບທວນຄືນ, ສົນທະນາ ແລະ ປຶກສາຫາລືກັນຢ່າງກົງໄປກົງມາ ແລະ ສ້າງສັນ ກ່ຽວກັບການຈັດຕັ້ງປະຕິບັດບັນດາມະຕິ ຈຳນວນ 16 ສະບັບ ໃນຂົງເຂດວຽກງານການເມືອງ, ເສດຖະກິດ, ສັງ ຄົມ, ສະມາຊິກລັດຖະສະພາເພດຍິງ ແລະ ວຽກງານສະມາຊິກລັດຖະສະພາໜຸ່ມ ຂອງໄອປາ ທີ່ໄດ້ຮັບຮອງເອົາໃນກອງປະ ຊຸມສະມັດຊາໃຫຍ່ໄອປາ ຄັ້ງທີ 44 ທີ່ນະຄອນຫຼວງຈາກາຕາ, ປະເທດອິນໂດເນເຊຍ ໃນປີ 2023.

ການເຂົ້າຮ່ວມກອງປະຊຸມຄັ້ງນີ້, ຄະນະຜູ້ແທນສະພາແຫ່ງຊາດລາວ ໄດ້ລາຍງານ ແລະ ປະກອບຄໍາເຫັນຮ່ວມກັບບັນ ດາປະເທດສະມາຊິກໄອປາ ໃນສອງວຽກງານຕົ້ນຕໍ ຄື: 1. ການຜັນຂະຫຍາຍ ແລະ ການຈັດຕັ້ງປະຕິບັດບັນດາມະຕິຕ່າງໆ ຂອງກອງປະຊຸມໃຫຍ່ໄອປາ ຄັ້ງທີ 44 ເພື່ອຊຸກຍູ້ສົ່ງເສີມການຮ່ວມມືຂອງລັດຖະສະພາອາຊຽນ, ການເຕີບໂຕຂອງເສດຖະ ກິດແບບຍືນຍົງ ແລະ ກວມລວມ, ການຫັນເປັນດິຈິຕອນເພື່ອການຟື້ນຟູເສດຖະກິດ, ການແກ້ໄຂບັນຫາຢາເສບຕິດ, ການປົກປ້ອງສຸຂະພາບ ແລະ ສັງຄົມຢ່າງເທົ່າທຽມ, ການເພີ່ມທະວີຄວາມອາດສາມາດໃຫ້ແກ່ຊາວໜຸ່ມໃນການມີສ່ວນຮ່ວມຢ່າງຫ້າວຫັນຕໍ່ການພັດທະນາເສດຖະກິດ-ສັງຄົມ, ການສ້າງຄວາມເຂັ້ມແຂງໃຫ້ແກ່ແມ່ຍິງ ແລະ ການສົ່ງເສີມບົດບາດຂອງສະມາຊິກລັດຖະສະພາເພດຍິງ; 2. ການຈັດຕັ້ງປະຕິບັດວຽກງານການພັດທະນາດິຈິຕອນ ໃນ ສປປລາວ ໂດຍສອດຄ່ອງກັບຍຸດທະສາດການເຊື່ອມໂຍງ-ເຊື່ອມຈອດກັບພາກພື້ນ ແລະ ສາກົນ ໂດຍສະເພາະແມ່ນແຜນພັດທະນາເຊື່ອມຈອດອາຊຽນ ຮອດປີ 2025 ພາຍໃຕ້ຫົວຂໍ້ ການເສີມຂະຫຍາຍຄວາມເຂັ້ມແຂງທາງໄຊເບີໃນອາຊຽນ ໂດຍຜ່ານການຮ່ວມມືລັດຖະສະພາ: ມຸ່ງໝັ້ນໄປສູ່ອະນາຄົດທີ່ປອດໄພ ແລະ ເສດຖະກິດດີຈິຕອນທີ່ສົດໃສ.

ກອງປະຊຸມໄດ້ເຫັນດີເປັນເອກະພາບ ແລະ ລົງລາຍເຊັນຮັບຮອງເອົາບົດລາຍງານຂອງກອງປະຊຸມຄະນະປະສານງານໄອປາ ຄັ້ງທີ 15 ເພື່ອນໍາໄປລາຍງານໃນກອງປະຊຸມສະມັດຊາໃຫຍ່ໄອປາ ຄັ້ງທີ 45 ທີ່ ສປປລາວ ໄດ້ຮັບກຽດເປັນເຈົ້າພາບໃນເດືອນຕຸລາ 2024; ພ້ອມນັ້ນ, ຍັງໄດ້ຕົກລົງເຫັນດີໃຫ້ລາຊະອານາຈັກກໍາປູເຈຍ ເປັນເຈົ້າພາບຈັດກອງປະຊຸມຄະນະປະສານງານໄອປາ (AIPA Caucus) ຄັ້ງທີ 16 ໃນປີ 2025.

ນອກຈາກນັ້ນ, ຄະນະຜູ້ແທນລາວ ຍັງໄດ້ເຂົ້າຮ່ວມກອງປະຊຸມສາມຝ່າຍລະຫວ່າງພາກສ່ວນຫົວໜ່ວຍທຸລະກິດ, ລັດ ຖະບານ ແລະ ລັດຖະສະພາ ໃນການປຶກສາຫາລືຮ່ວມກັນເພື່ອສ້າງກົນໄກພັດທະນາເສດຖະກິດດິຈິຕອນຂອງອາຊຽນ ກໍຄືຂອງບັນດາປະເທດສະມາຊິກ ພາຍໃຕ້ຍຸດທະສາດ “ການເສີມຂະຫຍາຍຄວາມເຂັ້ມແຂງທາງໄຊເບີ ແລະ ການພັດທະນາວຽກງານດິຈິຕອນກ້າວໄປສູ່ຄວາມສີວິໄລຮ່ວມກັນ.”