(ສພຊ) – ໃນລະຫວ່າງວັນທີ 20-21 ພຶດສະພາ 2024 ຄະນະຜູ້ແທນສະພາແຫ່ງຊາດ ນຳໂດຍທ່ານ ຄຳມ່ວນ ຊົມສີຫາປັນຍາ ຮອງປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ໄດ້ເຂົ້າຮ່ວມກອງປະຊຸມເວທີປຶກສາຫາລືກ່ຽວກັບນ້ຳໂລກ ຄັ້ງທີ 10 ທີ່ບາຫຼີ, ປະເທດອິນໂດເນເຊຍ ເຊິ່ງຈັດຂຶ້ນພາຍໃຕ້ການຮ່ວມມືຂອງສະຫະພັນລັດຖະສະພາສາກົນ (IPU) ໂດຍສະພາຜູ້ແທນລາສະດອນອິນໂດເນເຊຍ ເປັນເຈົ້າພາບ; ມີຄະນະຜູ້ແທນສະມາຊິກ IPU ຈາກທົ່ວໂລກ, ອົງການລັດຖະສະພາຈາກພາກພື້ນຕ່າງໆ ແລະ ຊ່ຽວຊານດ້ານນ້ຳ ເຂົ້າຮ່ວມຢ່າງຫຼວງຫຼາຍ.
ເວທີປຶກສາຫາລືກ່ຽວກັບນ້ຳໂລກ ແມ່ນຈັດຂຶ້ນທຸກໆ 3 ປີ ເຊິ່ງຈະມີບຸກຄົນສໍາຄັນ ແລະ ຜູ້ທີ່ມີອໍານາດຕັດສິນໃຈກ່ຽວກັບການສົ່ງເສີມຄວາມຄືບໜ້າໃນການແກ້ໄຂບັນຫານ້ຳ ໂດຍສະເພາະແມ່ນສະມາຊິກລັດຖະສະພາຈາກທົ່ວໂລກ ເພື່ອປຶກສາຫາລືກັນກ່ຽວກັບການຊຸກຍູ້ທາງດ້ານນິຕິກຳໃນການແກ້ໄຂບັນຫາການຂາດແຄນນ້ຳ, ເພີ່ມທະວີການຮ່ວມມື ແລະ ການທູດລັດຖະສະພາ ເພື່ອຂະຫຍາຍການເຂົ້າເຖິງນ້ຳທີ່ມີຄວາມປອດໄພ, ລະດົມການດຳເນີນການກ່ຽວກັບນ້ຳ ເພື່ອຄວາມໝັ້ນຄົງ ແລະ ວັດທະນາຖາວອນຂອງໂລກ.
ກອງປະຊຸມຄັ້ງທີ 10 ນີ້, ຈັດຂຶ້ນພາຍໃຕ້ຫົວຂໍ້:“ຂັບເຄື່ອນການປະຕິບັດວຽກງານຂອງລັດຖະສະພາກ່ຽວກັບ ນໍ້າ ເພື່ອຄວາມຈະເລີນຮຸ່ງເຮືອງຮ່ວມກັນ” ເຊິ່ງໄດ້ຮ່ວມກັນປຶກສາຫາລືພາຍໃຕ້ 4 ບັນຫາສໍາຄັນຄື: 1) ການເຂົ້າເຖິງ ນໍ້າ ແລະ ສຸຂາພິບານ: ບັນຫາທີ່ຕ້ອງໄດ້ຮັບການແກ້ໄຂ ເພື່ອບັນລຸການພັດທະນາແບບຍືນຍົງ; 2) ແນວທາງປະຕິບັດດ້ານນະວັດຕະກຳ ເພື່ອການເຂົ້າເຖິງນ້ຳຢ່າງທົ່ວເຖິງ ແລະ ເທົ່າທຽມ; 3) ນ້ຳຄືຫົວໃຈຂອງການດຳເນີນງານດ້ານດິນຟ້າອາກາດ; 4) ການທູດ, ການຮ່ວມມື ແລະ ວິທະຍາສາດ ເພື່ອຄວາມໝັ້ນຄົງຂອງນ້ຳ.
ໃນກອງປະຊຸມປຶກສາຫາລືຄັ້ງນີ້, ທ່ານ ຄຳມ່ວນ ຊົມສີຫາປັນຍາ ຫົວໜ້າຄະນະຜູ້ແທນລາວ ໄດ້ປະກອບຄຳເຫັນໃນຫົວຂໍ້:“ນ້ຳຄືຫົວໃຈຂອງການດຳເນີນງານດ້ານດິນຟ້າອາກາດ”, ທ່ານໄດ້ຍົກໃຫ້ເຫັນເຖິງຄວາມອຸດົມສົມບູນຂອງນ້ຳໃນ ສປປລາວ, ບັນຫາການປ່ຽນແປງດິນຟ້າອາກາດທີ່ສົ່ງຜົນຕໍ່ການຄຸ້ມຄອງ-ການບໍລິຫານນ້ຳ ລວມໄປເຖິງນະ ໂຍບາຍກ່ຽວກັບນ້ຳ ຂອງ ສປປລາວ ເຊິ່ງສະພາແຫ່ງຊາດຊຸດທີ IX ໄດ້ຮັບຮອງເອົາແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ IX, ຮັບຮອງເອົາຍຸດທະສາດການຄຸ້ມຄອງ, ການນຳໃຊ້ນ້ຳ ແລະ ຊັບພະຍາກອນນ້ຳ ແຫ່ງຊາດ 2030 ແລະ ວິໄສທັດ 2040 ທີ່ກຳນົດກ່ຽວກັບການບໍລິຫານ ແລະ ນຳໃຊ້ນ້ຳແບບຍືນຍົງ, ສົ່ງເສີມການນໍາໃຊ້ພະລັງງານສະ ອາດ, ສົ່ງເສີມການນໍາໃຊ້ພະລັງງານນໍ້າ, ຫຼຸດຜ່ອນຜົນກະທົບຕໍ່ການປ່ຽນແປງດິນຟ້າອາກາດ ແນໃສ່ຮັບປະກັນການປ່ອຍອາຍພິດໃຫ້ເປັນສູນ ພາຍໃນປີ 2050 ຕາມທີ່ ສປປລາວ ຕັ້ງເປົ້າໝາຍໄວ້; ພ້ອມດຽວກັນນັ້ນ, ສະພາແຫ່ງຊາດ ຍັງໄດ້ເອົາໃຈໃສ່ຕິດຕາມກວດກາການຈັດຕັ້ງປະຕິບັດບັນດາກົດໝາຍ ແລະ ນະໂຍບາຍແຫ່ງຊາດ ໂດຍສະເພາະແມ່ນການ ຈັດຕັ້ງປະຕິບັດກົດໝາຍວ່າດ້ວຍນ້ຳ ແລະ ຊັບພະຍາກອນນ້ຳ ເພື່ອຮັບປະກັນການນຳໃຊ້ນ້ຳເຂົ້າໃນການພັດທະນາເສດ ຖະກິດ-ສັງຄົມ ໃຫ້ມີປະສິດທິພາບ, ປະສິດທິຜົນ, ທົ່ວເຖິງ, ເທົ່າທຽມ ແລະ ຍືນຍົງ. ໃນຕອນທ້າຍ, ຫົວໜ້າຄະນະຜູ້ແທນລາວ ໄດ້ຮຽກຮອງໃຫ້ສະມາຊິກ IPU ເພີ່ມທະວີການຮ່ວມມືເຊິ່ງກັນ ແລະກັນທາງດ້ານນິຕິບັນຍັດ ເພື່ອຮັບປະ ກັນການນຳໃຊ້ນ້ຳໃຫ້ມີຄວາມໝັ້ນຄົງ ແລະ ປອດໄພ, ຍົກສູງປະສິດທິພາບຂອງການຄຸ້ມຄອງ ແລະ ນຳໃຊ້ນ້ຳ ທີ່ບໍ່ສົ່ງຜົນກະທົບຕໍ່ການປ່ຽນແປງດິນຟ້າອາກາດ, ນຳໃຊ້ນໍ້າເຂົ້າໃນທຸກຂົງເຂດວຽກງານ, ສົ່ງເສີມການສ້າງກິດຈະກຳ ແລະ ການແລກປ່ຽນທາງດ້ານເຕັກໂນໂລຊີ ທີ່ກ່ຽວຂ້ອງກັບການນໍາໃຊ້, ການບຳບັດ ແລະ ການນຳນ້ຳກັບມາໃຊ້ໃໝ່ ແລະ ເລັ່ງລັດການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ທີ 6 (SDG6) ໂດຍການສະໜັບສະໜູນທາງດ້ານທຶນຮອນໃຫ້ແກ່ປະເທດທີ່ດ້ອຍພັດທະນາ ແລະ ກຳລັງພັດທະນາ ເພື່ອຄວາມຈະເລີນຮຸ່ງເຮືອງຮ່ວມກັນ.
ນອກຈາກນັ້ນ, ທ່ານ ສຈ. ປອ. ຫົງຄຳ ສຸວັນນະວົງ ສະມາຊິກສະພາແຫ່ງຊາດລາວ ຍັງໄດ້ເຂົ້າຮ່ວມ ແລະ ມີຄຳເຫັນໃນກອງປະຊຸມສະພາທີ່ປຶກສາກ່ຽວກັບບັນຫານ້ຳຂອງສະພາແຫ່ງຊາດອາຊີ ຄັ້ງທີ 6 ອີກດ້ວຍ.
ກອງປະຊຸມຄັ້ງນີ້, ໄດ້ດໍາເນີນໄປໃນບັນຍາກາດທີ່ມີຄວາມເປັນເອກະພາບກັນ, ບັນດາຄະນະຜູ້ແທນໄດ້ເອົາໃຈ ໃສ່ປະກອບຄຳຄິດຄຳເຫັນຢ່າງສ້າງສັນ ໃນການສົ່ງເສີມການຮ່ວມມືທາງດ້ານນິຕິບັນຍັດ ເພື່ອຄຸ້ມຄອງ, ບໍລິຫານຈັດການ ແລະ ການນຳໃຊ້ນ້ຳ ໃຫ້ພຽງພໍ, ມີປະສິດທິພາບ, ມີປະສິດທິຜົນ ແລະ ຍືນຍົງ. ກອງປະຊຸມເວທີປຶກສາຫາລືກ່ຽວກັບນໍ້າໂລກ ຄັ້ງທີ 11 ຈະຈັດຂຶ້ນໃນປີ 2027 ຫຼື ອີກສາມປີຕໍ່ໜ້າ.
(ກົມພົວພັນລັດຖະສະພາຫຼາຍຝ່າຍ, ກຳມາທິການການຕ່າງປະເທດ)