ຄະນະຜູ້ແທນສະພາແຫ່ງຊາດລາວ ສຳເລັດການຢ້ຽມຢາມສະຫະລາຊະອານາຈັກອັງກິດ

ມ.ສ. 3, 2025 | SlideMobile, ຂ່າວ ສພຊ, ຂ່າວເດັ່ນ

​(ສພຊ) – ຕອບສະໜອງຕາມການເຊື້ອເຊີນຂອງກະຊວງການຕ່າງປະເທດສະຫະລາຊະອານາຈັກອັງກິດ, ຄະນະຜູ້ແທນຄະນະມິດຕະພາບລັດຖະສະພາ ລາວ-ສະຫະລາຊະອານາຈັກອັງກິດ ນຳໂດຍທ່ານ ປອ. ລີເບີ ລີບົວປາວ ປະທານກຳມາທິການແຜນການ, ການເງິນ ແລະ ການກວດສອບ ໄດ້ໄປຢ້ຽມຢາມ, ເຮັດວຽກ ແລະ ແລກປ່ຽນບົດຮຽນ ຢູ່ສະຫະລາຊະອານາຈັກອັງກິດ ໃນລະຫວ່າງວັນທີ 24-27 ມີນາ 2025 ເພື່ອປະກອບສ່ວນເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືອັນດີງາມລະຫວ່າງສອງປະເທດ ໃຫ້ນັບມື້ນັບເຂົ້າສູ່ລວງເລິກ ແລະ ເປັນຮູບປະທໍາຍິ່ງໆ ຂຶ້ນ ເວົ້າລວມ, ເວົ້າສະເພາະແມ່ນການພົວພັນຮ່ວມມືລະຫວ່າງສອງອົງການນິຕິບັນຍັດ ລາວ-ສະຫະລາຊະອານາຈັກອັງກິດ ທັງເປັນການສະເຫຼີມສະຫຼອງຄົບຮອບ 70 ປີ ແຫ່ງສາຍພົວພັນການທູດລະຫວ່າງສອງປະເທດ.
​ຈຸດປະສົງຂອງການຢ້ຽມຢາມ ແລະ ເຮັດວຽກຄັ້ງນີ້ ແມ່ນເນັ້ນໃສ່ການແລກປ່ຽນບົດຮຽນໃນວຽກງານຂອງ 3 ອົງການ ເຊັ່ນ: ສະພາສູງ (House of Lords), ສະພາຕໍ່າ (House of Commons) ແລະ ກະຊວງການຕ່າງປະເທດ (Foreign, Commonwealth & Development Office). ຄະນະຜູ້ແທນສະພາແຫ່ງຊາດ ສປປລາວ ໄດ້ພົບປະທ່ານ ນາງ Catherine West ສະມາຊິກສະພາຕໍ່າ, ຮອງລັດຖະມົນຕີກະຊວງການຕ່າງປະເທດ, ຜູ້ຮັບຜິດຊອບວຽກງານຂົງເຂດອິນໂດ-ປາຊີຟິກ, ທ່ານ Lord Gardiner of Kimble ຮອງປະທານສະພາສູງ, ອະດີດລັດຖະມົນຕີກະຊວງກະສິກໍາ, ທ່ານ ນາງ Baroness Barker ຮອງປະທານອາວຸໂສສະພາສູງ; ເຂົ້າຮ່ວມສັງເກດການກອງປະຊຸມພາກຊັກຖາມນາຍົກລັດຖະມົນຕີອັງກິດ ຂອງສະພາຕໍ່າ, ສືບຕໍ່ພົບປະຄະນະກຳມະການຮ່າງກົດໝາຍກ່ຽວກັບການເຈັບເປັນຂອງຜູ້ໃຫຍ່, ພົບປະຜູ້ຮັບຜິດຊອບວຽກງານສໍາຫຼວດກໍລະນີສຶກສາກ່ອນນິຕິກຳກັບສະມາຊິກກຳມາທິການກົດໝາຍ, ພົບປະຜູ້ຮັບຜິດຊອບດ້ານງົບປະມານ ແລະ ການເງິນ ທີ່ເປັນອະດີດສະມາຊິກກຳມາທິການງົບປະມານ ແລະ ການເງິນ.
​ນອກນັ້ນ, ຍັງໄດ້ເຂົ້າຮ່ວມສັງເກດການກອງປະຊຸມຄະນະກຳມະການປ້ອງກັນປະເທດ ແລະ ພົວພັນສາກົນ, ເຂົ້າສັງເກດການກຳມາທິການຮ່ວມວ່າດ້ວຍຫຼັກຖານສິດທິມະນຸດ (ສຶກສາກ່ຽວກັບການກົດຂີ່ຂ້າມຊາດທີ່ສົ່ງຜົນກະທົບຕໍ່ສິດທິມະນຸດ ຂອງປະຊາຊົນທີ່ດຳລົງຊີວິດຢູ່ໃນສະຫະລາຊະອານາຈັກອັງກິດ, ລວມທັງການກວດສອບປະສິດທິພາບຂອງການຈັດຕັ້ງປະຕິບັດກົດໝາຍ ແລະ ນະໂຍບາຍຂອງສະຫະລາຊະອານາຈັກອັງກິດໃນປັດຈຸບັນ ກ່ຽວກັບການປາບປາມຂ້າມຊາດ ແລະ ການຊ່ວຍເຫຼືອແກ່ຜູ້ເຄາະຮ້າຍ) ເຊິ່ງຄະນະຜູ້ແທນສະພາແຫ່ງຊາດລາວ ໄດ້ເອົາໃຈໃສ່ປຶກສາຫາລື ແລະ ແລກປ່ຽນສົນທະນາ ທີ່ເປັນການເນັ້ນໜັກເຖິງການເຮັດໜ້າທີ່ຂອງລັດຖະສະພາ ໃນການຊຸກຍູ້ການຮ່ວມມືກັນເພື່ອແກ້ໄຂບັນຫາທາທ້າຍຕ່າງໆ ທີ່ພວມເກີດຂຶ້ນໃນພາກພື້ນ ແລະ ສົ່ງເສີມການຮ່ວມມືເພື່ອການພັດທະນາໃນອະນາຄົດ.
​ທ່ານ ປອ. ລີເບີ ລີບົວປາວ ໄດ້ກ່າວໃນກອງປະຊຸມພົບປະ ໂດຍຍົກໃຫ້ເຫັນເຖິງສະພາບການຂອງປະເທດລາວ ກໍຄືຂອງພາກພື້ນ ແລະ ຂອງໂລກ ທີ່ພວມຜັນແປໄປຢ່າງສະຫຼັບຊັບຊ້ອນ ແລະ ມີຄວາມທ້າທາຍຫຼາຍຢ່າງ ອັນເນື່ອງມາຈາກບັນຫາທາງດ້ານເສດຖະກິດ-ການເງິນ, ໄພພິບັດທາງທຳມະຊາດ, ການຄ້າທີ່ສົ່ງຜົນກະທົບຕໍ່ສະພາບເສດຖະກິດ, ການຮ່ວມມືຂອງບັນດາປະເທດທີ່ພວມມາລົງທຶນໃນ ສປປລາວ ເພື່ອການພັດທະນາ ແລະ ຊີວິດການເປັນຢູ່ຂອງປະຊາຊົນ. ທ່ານໄດ້ຕີລາຄາສູງຕໍ່ການຢ້ຽມຢາມ ແລະ ເຮັດວຽກໃນຄັ້ງນີ້ ເປັນການເພີ່ມທະວີການພົວພັນຮ່ວມມືລະຫວ່າງສະພາແຫ່ງຊາດ ລາວ-ອັງກິດ ແລະ ລັດຖະບານອັງກິດ ໂດຍສະເພາະກະຊວງການຕ່າງປະເທດ ແລະ ຕີລາຄາສູງຕໍ່ການເຊື້ອເຊີນຄະນະມິດຕະພາບລັດຖະສະພາ ລາວ-ອັງກິດ ໃນຄັ້ງນີ້.