ບັນດາຜູ້ເຂົ້າຮ່ວມໂຄງການສັງເກດການເລືອກຕັ້ງໃນຄັ້ງນີ້ ໄດ້ເຂົ້າຮ່ວມກອງປະຊຸມໜຶ່ງວັນກ່ອນການເລືອກຕັ້ງ ເພື່ອຮັບຟັງການເຜີຍແຜ່ ແລະ ແນະນຳຂໍ້ມູນກ່ຽວກັບການເລືອກຕັ້ງທົ່ວໄປ, ກົງຈັກການຈັດຕັ້ງຂອງຄະນະກຳມະການການເລືອກຕັ້ງລະດັບຊາດ, ລະດັບແຂວງ, ລະດັບເມືອງ-ເທດສະບານ ແລະ ລະດັບຂັ້ນທ້ອງຖິ່ນ (ໜ່ວຍເລືອກຕັ້ງ) ແລະ ວຽກງານຕ່າງໆທີ່ປິ່ນອ້ອມການເລືອກຕັ້ງ.

ສາທາລະນະລັດ ອິນໂດເນເຊຍ ເປັນປະເທດປະຊາທິປະໄຕທີ່ໃຫຍ່ອັນດັບສາມຂອງໂລກ ໂດຍມີການເລືອກຕັ້ງທົ່ວໄປທຸກໆ 5 ປີ ເຊິ່ງຈະເລືອກຕັ້ງເອົາປະທານາທິບໍດີ ແລະ ຮອງປະທານາທິບໍດີ, ສະມາຊິກສະພາຜູ້ແທນປະຊາຊົນ (ສະພາຕໍ່າ), ສະມາຊິກສະພາຜູ້ແທນພາກພື້ນ (ສະພາສູງ), ສະມາຊິກສະພາປະຊາຊົນຂັ້ນແຂວງ ແລະ ສະມາຊິກສະພາປະຊາຊົນເມືອງ-ເທດສະບານ; ໃນການເລືອກຕັ້ງຄັ້ງນີ້, ບັນດາຜູ້ມີສິດເລືອກຕັ້ງໄດ້ໃຊ້ບັດເລືອກຕັ້ງ 5 ປະເພດ ໃນການລົງຄະແນນສຽງເລືອກເອົາຜູ້ລົງສະໝັກ ແລະ ພັກການເມືອງ ທີ່ຕົນເອງຕ້ອງການ ເຊິ່ງມີພັກການເມືອງ 18 ພັກ ລົງແຂ່ງ ຂັນກັນ.

ການເລືອກຕັ້ງປະທານາທິບໍດີ ແລະ ຮອງປະທານາທິບໍດີ ມີຈຳນວນ 3 ຄູ່ທີ່ລົງສະໝັກຄື: ຜູ້ລົງສະໝັກນ້ຳເບີ 1: ທ່ານ Anies Baswedan ອາຍຸ 56 ປີ, ອະດີດເຈົ້າຄອງນະຄອນຫຼວງຈາກາຕາ ຈັບຄູ່ກັບທ່ານ Muhaimin Iskandar ໄດ້ຮັບການສະໜັບສະໜູນຈາກພັກ National Democratic Party (NasDem), National Awakenning Party (PKB), Prosperous Justice Party (PKS) ແລະ ພັກ Ummah Party; ຜູ້ລົງສະໝັກນ້ຳເບີ 2: ທ່ານ Prabowo Subianto ອາຍຸ 72 ປີ, ລັດຖະມົນຕີກະຊວງປ້ອງກັນປະເທດ ຈັບຄູ່ກັບທ່ານ Gibran Rakabuming Raka ລູກຊາຍຂອງປະທານາທິບໍດີ ໂຈໂກ ວີໂດໂດ ໄດ້ຮັບການສະໜັບສະໜູນຈາກພັກ Great Indonesia Movement Party (Gerindra), ພັກ Golkar, National Mandate Party (PAN) Democratic Party ແລະ ພັກ Indonesian People’s Wave Party (Gelora) ແລະ ຜູ້ລົງສະໝັກນ້ຳເບີ 3: ທ່ານ Ganjar Pranowo ອາຍຸ 55 ປີ, ອະດີດເຈົ້າຄອງຈາວາກາງ ຈັບຄູ່ກັບທ່ານ Mahfud MD ໄດ້ຮັບການສະໜັບສະໜູນຈາກພັກ Indonesian Democratic Party of Struggle (PDIP), United Development Party, United Indonesia Party (Perindo) ແລະ ພັກ People’s Conscience Party (Hanura).

ການເລືອກຕັ້ງສະມາຊິກສະພາຜູ້ແທນປະຊາຊົນ ກຳນົດ 84 ເຂດເລືອກຕັ້ງ, ມີຈຳນວນ 580 ບ່ອນນັ່ງ; ການເລືອກຕັ້ງສະມາຊິກສະພາຜູ້ແທນພາກພື້ນ (ສະພາສູງ) ກຳນົດ 38 ເຂດເລືອກຕັ້ງ, ມີຈຳນວນ 152 ບ່ອນນັ່ງ; ການເລືອກຕັ້ງສະມາຊິກສະພາປະຊາຊົນແຂວງ ກຳນົດ 301 ເຂດເລືອກຕັ້ງ, ມີຈຳນວນ 2.372 ບ່ອນນັ່ງ ແລະ ການເລືອກຕັ້ງສະມາຊິກສະພາຜູ້ແທນປະຊາຊົນເມືອງ ກຳນົດເອົາ 2.325 ເຂດ, ມີຈຳນວນ 17.510 ບ່ອນນັ່ງ. ຜູ້ມີສິດເລືອກຕັ້ງຕ້ອງມີອາຍຸຄົບ 17 ປີຂຶ້ນໄປ ເຊິ່ງມີຜູ້ລົງທະບຽນການເລືອກຕັ້ງທັງໝົດ 204.807.222 ຄົນ. ງົບປະມານຮັບໃຊ້ການເລືອກຕັ້ງທັງໝົດ 71.300 ຕື້ຣູເປຍ (ປະມານ 1,7 ຕື້ໂດລາສະຫະລັດ). ໃນວັນທີ 14 ກຸມພາ 2024 ຄະນະກຳມະການການເລືອກຕັ້ງທຸກຂັ້ນ ໄດ້ເປີດຫີບເລືອກຕັ້ງພ້ອມກັນທົ່ວປະເທດ ນັບແຕ່ເວລາ 07:00 ໂມງເຊົ້າ, ປິດລົງໃນເວລາ 13:00 ໂມງ ແລະ ເວລາ 13:30 ຫາ 17:00 ໂມງ ເປັນເວລາໃນການນັບຄະແນນ.

ປະເທດເຈົ້າພາບໄດ້ຈັດແບ່ງເປັນ 3 ກຸ່ມຂອງຜູ້ສັງເກດການ ເພື່ອໄປສັງເກດການຕົວຈິງຢູ່ໜ່ວຍເລືອກຕັ້ງຕ່າງໆໃນເວລາປ່ອນບັດ ແລະ ເວລານັບຄະແນນສຽງການເລຶອກຕັ້ງທົ່ວໄປ. ຜ່ານການໄປສັງເກດການດັ່ງກ່າວເຫັນວ່າ ຄະນະກຳມະການການເລືອກຕັ້ງຂັ້ນສູນກາງ ແລະ ຂັ້ນທ້ອງຖິ່ນ ໄດ້ກະກຽມຄວາມພ້ອມຢ່າງຮອບດ້ານ ເປັນຕົ້ນ: ຄະນະກຳ ມະການໃນແຕ່ລະບ່ອນເລືອກຕັ້ງ, ບັນດາເຈົ້າໜ້າທີ່, ໜ່ວຍປ່ອນບັດ, ຫີບບັດ, ບັນຊີລາຍຊື່ຜູ້ສະໝັກ, ບັນຊີລາຍຊື່ຜູ້ມີສິດປ່ອນບັດ, ບັດລົງຄະແນນສຽງ ລວມທັງອຳນວຍຄວາມສະດວກດ້ານຕ່າງໆ ພ້ອມທັງປະຕິບັດ 6 ຫຼັກການການເລືອກຕັ້ງທີ່ເປັນພື້ນຖານເຊັ່ນ: ໂດຍກົງ, ທົ່ວໄປ, ເສລີ, ປິດລັບ, ຊື່ສັດ ແລະ ຍຸຕິທຳ; ຄະນະກຳມະການການເລືອກຕັ້ງໄດ້ກຳນົດເອົາສະໂມສອນຂອງບ້ານ ເປັນໜ່ວຍປ່ອນບັດເລືອກຕັ້ງ ແລະ ກຳນົດເອົາວັນເລືອກຕັ້ງເປັນວັນພັກລັດຖະການ ເພື່ອອຳນວຍຄວາມສະດວກໃຫ້ແກ່ປະຊາຊົນໄດ້ໄປໃຊ້ສິດຂອງຕົນຢ່າງເຕັມສ່ວນ.

ໃນການເຂົ້າຮ່ວມສັງເກດການເລືອກຕັ້ງໃນຄັ້ງນີ້, ທ່ານ ຈັນທະວົງ ແສນອາມາດມົນຕີ ໃນນາມຫົວໜ້າຄະນະຜູ້ແທນສະພາແຫ່ງຊາດລາວ ໄດ້ຮ່ວມກັບບັນດາຜູ້ເຂົ້າສັງເກດການຕ່າງປະເທດ ສະແດງຄຳຄິດເຫັນຕໍ່ການເລືອກຕັ້ງທົ່ວໄປຂອງ ສ.ອິນໂດເນເຊຍ ເຊິ່ງໄດ້ປະຕິບັດຕາມຂະບວນການປະຊາທິປະໄຕ, ສະແດງຄວາມຂອບໃຈຕໍ່ປະເທດເຈົ້າພາບທີ່ໄດ້ເຊື່ອເຊີນເຂົ້າຮ່ວມ ແລະ ຍັງຖືໂອກາດນີ້ຮຽນເຊີນບັນດາຜູ້ເຂົ້າຮ່ວມ ໃຫ້ການສະໜັບສະໜູນ ສປປລາວ ທີ່ເປັນປະ ທານອາຊຽນ ແລະ ສະມັດຊາລັດຖະສະພາລະຫວ່າງຊາດອາຊຽນ (ໄອປາ) ພ້ອມທັງຈະເປັນເຈົ້າພາບຈັດກອງປະຊຸມໄອປາ ຄັ້ງທີ 45 ທີ່ຈະຈັດຂຶ້ນຢູ່ນະຄອນຫຼວງວຽງຈັນ ໃນເດືອນຕຸລານີ້; ໃນເວລາໄປສັງເກດການຢູ່ໜ່ວຍເລືອກຕັ້ງຕົວຈິງ, ທ່ານ ຈັນທະວົງ ແສງອາມາດມົນຕີ ຍັງໄດ້ໃຫ້ສຳພາດຕໍ່ນັກຂ່າວຕ່າງປະເທດອີກດ້ວຍ.

ໃນຕອນຄ່ຳວັນດຽວກັນ, ປະເທດເຈົ້າພາບໄດ້ຈັດກອງປະຊຸມເພື່ອທົບທວນຄືນ ແລະ ສະຫຼຸບຕີລາຄາການໄປສັງເກດການການເລືອກຕັ້ງທົ່ວໄປໃນຄັ້ງນີ້; ຄະນະຜູ້ແທນສະພາແຫ່ງຊາດລາວ ເຊິ່ງເປັນຕົວແທນກຸ່ມ 2 ກໍໄດ້ມີຄຳເຫັນ ໂດຍໄດ້ຕີລາຄາ ແລະ ສະແດງຄວາມຊົມເຊີຍຕໍ່ການກະກຽມການເລືອກຕັ້ງຢ່າງຮອບດ້ານ, ດຳເນີນໄປດ້ວຍຄວາມເປັນລະບຽບຮຽບຮ້ອຍ ແລະ ປະຕິບັດ 6 ຫຼັກການການເລືອກຕັ້ງຄື: ໂດຍກົງ, ທົ່ວໄປ, ເສລີ, ປິດລັບ, ຊື່ສັດ ແລະ ຍຸຕິທຳ ທີ່ໄດ້ດຳເນີນໄປຕາມກົດໝາຍວ່າດ້ວຍການເລືອກຕັ້ງທົ່ວໄປ ສ.ອິນໂດເນເຊຍ ກຳນົດໄວ້.

ຕາມກົດໝາຍວ່າດ້ວຍການເລືອກຕັ້ງ ຂອງ ສ.ອິນໂດເນເຊຍ ຕ້ອງໄດ້ປະກາດຜົນການເລືອກຕັ້ງຢ່າງເປັນທາງ ການພາຍໃນ 35 ວັນ ນັບຈາກວັນເລືອກຕັ້ງ. ແຕ່ອີງຕາມການນັບຄະແນນຜົນການເລືອກຕັ້ງຢ່າງບໍ່ເປັນທາງການໃນວັນທີ 15 ກຸມພາ 2024 ທ່ານ Prabowo Subianto ອາຍຸ 72 ປີ, ລັດຖະມົນຕີກະຊວງປ້ອງກັນປະເທດ ຈັບຄູ່ກັບທ່ານ Gibran Rakabuming Raka ໄດ້ຮັບຄະແນນ 58,60% ຄາດຄະເນວ່າຈະເປັນປະທານາທິບໍດີ ແລະ ຮອງປະທານາ ທິບໍດີ ຄົນຕໍ່ໄປ; ສ່ວນຜົນການເລືອກຕັ້ງຂອງສະພານິຕິບັນຍັດ ແມ່ນພັກ Indonesian Democratic Party of Struggle (PDIP) ໄດ້ຮັບຄະແນນງ 16,35% ແລະ ພັກອື່ນໆ ມີຄະແນນຫຼຸດລົງຕາມລຳດັບ.