(ສພຊ) ໃນລະຫວ່າງວັນທີ 29 ພຶດສະພາ ຫາວັນທີ 1 ມິຖຸນາ 2023, ທ່ານ ອຳໄພ ຈິດມານົນ ຮອງປະທານກໍາມາທິການກົດໝາຍ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມ ສະພາທີ່ປຶກສາຂອງໄອປາກ່ຽວກັບໄພອັນຕະລາຍຂອງຢາເສບຕິດ (AIPACODD) ຄັ້ງທີ 6 ທີ່ເມືອງໂບກໍ ສາທາລະນະລັດ ອິນໂດເນເຊຍ.
ກອງປະຊຸມ (AIPACODD) ຄັ້ງທີ 6 ໄດ້ດຳເນີນຂຶ້ນພາຍໃຕ້ຫົວຂໍ້: “ການສົ່ງເສີມການຈະເລີນເຕີບໂຕຂອງເສດຖະກິດແບບກວມລວມເພື່ອອາຊຽນປອດຢາເສບຕິດ” ກ່າວເປີດກອງປະຊຸມຢ່າງເປັນທາງການໂດຍທ່ານ Lodewijk Freidrich Paulus ຮອງປະທານສະພາຜູ້ແທນລາດສະດອນອິນໂດເນເຊຍ ໃນນາມຕາງໜ້າໃຫ້ປະທານ AIPA, ມີທ່ານ Ar. Siti Rozaimeriyanty DSLJ Haji Abdul Rahman, ເລຂາທິການໃຫຍ່ໄອປາ ແລະ ສະມາ ຊິກລັດຖະສະພາຈາກບັນດາປະເທດສະມາຊິກອາຊຽນເຂົ້າຮ່ວມ. ກອງປະຊຸມໄດ້ປຶກສາຫາລືກ່ຽວກັບບັນຫາການຕ້ານໄພຄຸກຄາມຈາກຢາເສບຕິດ, ລາຍງານຄືນຄວາມຄືບໜ້າໃນການຄວບຄຸມຢາເສບຕິດ ຂອງແຕ່ລະປະເທດ ສະມາຊິກລັດຖະສະພາ ເພື່ອຊອກຫາຊ່ອງທາງ ແລະ ວິທີທາງແກ້ໄຂຮ່ວມກັນໃນຕໍ່ໜ້າ; ກອງປະຊຸມໄດ້ທົບທວນຄືນ ແຜນງານຫຼັກຂອງອາຊຽນ ວ່າດ້ວຍຊຸມຊົນຕ້ານຢາເສບຕິດ ແລະ ສິ່ງຜິດກົດໝາຍ 2016-2025 ແລະ ແຜນປະຕິບັດງານອາຊຽນ ໃນການຕ້ານການຄ້າຂາຍຢາເສບຕິດຂ້າມຊາດ 2016-2025; ກອງປະຊຸມໄດ້ເນັ້ນໜັກເຖິງບົດບາດອັນສໍາຄັນຂອງລັດຖະສະພາ ໃນການກໍານົດດ້ານກົດໝາຍພາຍໃນຂອງແຕ່ລະປະເທດ ເພື່ອແກ້ໄຂບັນຫາຢາເສບຕິດ ເຊິ່ງຄະນະຜູ້ແທນຈາກແຕ່ລະປະເທດສະມາຊິກໄອປາ ໄດ້ມີຄວາມເປັນເອກະພາບກັນກ່ຽວກັບຜົນຮ້າຍຈາກຢາເສບຕິດເປັນໄພຂົ່ມຂູ່ ແລະ ຄຸກຄາມຕໍ່ກັບສະຖຽນລະພາບ ແລະ ຄວາມໝັ້້ນຄົງຂອງແຕ່ລະປະເທດ ມີຜົນເສຍຕໍ່ເສດຖະກິດ, ຕໍ່ກັບບັນຫາດັ່ງກ່າວບັນດາປະເທດໃນອາຊຽນຕ້ອງໄດ້ຮ່ວມມືກັນຢ່າງແຂງແຮງ ແລະ ເປັນຮູບປະທໍາຫຼາຍຂຶ້ນກ່ວາເກົ່າ ເພື່ອຕ້ານກັບໄພຄຸກຄາມຂອງຢາເສບຕິດ ແລະ ເພື່ອບັນລຸເປົ້າໝາຍລວມ, ສ້າງໃຫ້ປະຊາຄົມອາຊຽນປອດຢາເສບຕິດ ເຊິ່ງມີຄວາມຈໍາເປັນຕ້ອງໄດ້ວາງຂອບການຮ່ວມມືກັນທາງດ້ານກົດໝາຍ, ການແລກປ່ຽນຂໍ້ມູນຂ່າວສານ, ພິເສດແມ່ນກັບບັນດາປະເທດທີ່ມີຊາຍແດນຮ່ວມກັນ. ການເຂົ້າຮ່ວມກອງປະຊຸມຄັ້ງນີ້ ຄະນະຜູ້ແທນສະພາແຫ່ງຊາດລາວ ກໍໄດ້ລາຍງານສະພາບບັນຫາຢາເສບຕິດທີ່ເກີດຂຶ້ນ ອັນເນື່ອງມາຈາກສະພາບຈຸດພິເສດທາງດ້ານທີ່ຕັ້ງ ເຊິ່ງ ສປປລາວ ເປັນປະເທດທາງຜ່ານທີ່ພວກຄ້າຂາຍຢາເສບຕິດເອົາເປັນຈຸດຜ່ານໃນການເຄື່ອນຍ້າຍ ຫຼື ສົ່ງຕໍ່ຢາເສບຕິດ. ລັດຖະບານ ສປປລາວ ກໍເຫັນໄດ້ບັນຫາຈຸດພິດເສດດັ່ງກ່າວ ແລະ ເປັນບຸລິມະສິດເພື່ອແກ້ໄຂບັນຫາຢາເສບຕິດ ຈຶ່ງສະເໜີໃຫ້ ສະພາແຫ່ງຊາດ ຮັບຮອງເອົາເປັນວາລະແຫ່ງຊາດ ໄປຄຽງຄູ່ກັບການປັບປຸງກົດໝາຍວ່າດ້ວຍຢາເສບຕິດໃນປີ 2022 ທີ່ຜ່ານມາ, ສາມາດປາບປາມມ້າງຄະດີຢາເສບຕິດລາຍໃຫຍ່ໄດ້ຫຼາຍຄະດີ ແລະ ສາມາດຢຶດໄດ້ຢາເສບຕິດປະເພດຕ່າງໆເປັນຈໍານວນຫຼວງຫຼາຍ ແລະ ສາມາດຈັບກຸມຜູ້ຕ້ອງຫາໄດ້ຫຼາຍພໍສົມຄວນ ໃນປີ 2022 ໜ່ວຍງານສະກັດກັ້ນ ແລະ ປາບປາມຢາເສບຕິດ ສປປລາວ ໄດ້ບັນລຸຜົນສຳເລັດໃນການສະກັດກັ້ນການຄ້າຂາຍຢາເສບຕິດໃນຂອບເຂດທົ່ວປະເທດ ມີທັງໝົດ 5.068 ຄະດີ, ຈັບຕົວຜູ້ກະທໍາຜິດທັງໝົດ 7.410 ຄົນ, ຍິງ 853 ຄົນ; ມີຄົນຕ່າງປະເທດ 143 ຄົນ, ຍິງ 11 ຄົນ; ອັນສືບເນື່ອງມາຈາກການຈັດຕັ້ງປະຕິບັດວາລະແຫ່ງຊາດດັ່ງກ່າວ.
ໃນຕອນທ້າຍຂອງກອງປະຊຸມ ຄະນະຜູ້ແທນ ໄດ້ປະກອບຄໍາຄິດຄໍາເຫັນໃສ່ຮ່າງມະຕິຂອງກອງປະຊຸມ, ລົງນາມຮັບຮອງຕໍ່ບົດລາຍງານຂອງກອງປະຊຸມ. ພິເສດ, ຕາງໜ້າໃຫ້ຄະນະຜູ້ແທນສະພາແຫ່ງຊາດ ແຫ່ງ ສປປລາວ ໂດຍທ່ານ ອຳໄພ ຈິດມານົນ ໄດ້ຂຶ້ນກ່າວຮັບການເປັນເຈົ້າພາບ ກອງປະຊຸມສະພາທີ່ປຶກສາຂອງໄອປາກ່ຽວກັບໄພອັນຕະລາຍຂອງຢາເສບຕິດ (AIPACODD) ຄັ້ງທີ 7 ທີ່ ສປປລາວ ເຮົາຈະໄດ້ຖືກຮັບກຽດເປັນເຈົ້າພາບໃນປີ 2024 ທີ່ຈະມາເຖິງນີ້.