(ສພຊ) ໃນລະຫວ່າງວັນທີ 19-21 ເມສາ 2023 ຄະນະຜູ້ແທນສະພາແຫ່ງຊາດລາວ ນຳໂດຍທ່ານ ຮສ. ປອ. ລິນຄຳ ດວງສະຫວັນ ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ພ້ອມດ້ວຍຄະນະ ໄດ້ເດີນທາງຢ້ຽມຢາມ ສາທາລະນະລັດ ເບລາຣຸດ ຢ່າງເປັນທາງການ.
ໃນການຢ້ຽມຢາມຄັ້ງນີ້ ຄະນະຜູ້ແທນສະພາແຫ່ງຊາດລາວ ໄດ້ເຂົ້າຢ້ຽມຂ່ຳນັບທ່ານ Valery Mitskevich ຮອງປະທານສະພາຜູ້ແທນປະຊາຊົນ ຂອງສະພາແຫ່ງຊາດ ແຫ່ງ ເບລາຣຸດ ໂດຍທ່ານໄດ້ກ່າວຕ້ອນຮັບຄະນະຜູ້ແທນສະພາແຫ່ງຊາດລາວ ຢ່າງອົບອຸ່ນ ແລະ ໄດ້ຕີລາຄາສູງຕໍ່ສາຍພົວພັນຮ່ວມມືທີ່ເປັນມູນເຊື້ອ ແລະ ດີງາມລະຫວ່າງສອງປະເທດ ເບລາຣຸດ-ລາວ ກໍຄື ລະຫວ່າງສອງສະພາແຫ່ງຊາດ ທີ່ໄດ້ມີການພົວພັນປະສານງານ ແລະ ສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ມາໂດຍຕະຫຼອດ, ພ້ອມນັ້ນ ທັງສອງປະເທດ ກໍໄດ້ມີການຮ່ວມມືກັນຫຼາຍດ້ານ ແລະ ທ່ານໄດ້ເນັ້ນຕໍ່ຄະນະຜູ້ແທນລາວ ໃນການສືບຕໍ່ສົ່ງເສີມການຮ່ວມມືລະຫວ່າງສອງປະເທດ ກໍຄື ສອງອົງການນິຕິບັນຍັດ ໃຫ້ມີຄວາມແໜ້ນແຟ້ນຍິ່ງຂຶ້ນກວ່າເກົ່າ.
ໃນໂອກາດດັ່ງກ່າວ, ທ່ານ ຮສ. ປອ. ລິນຄຳ ດວງສະຫວັນ ຫົວໜ້າຄະນະຜູ້ແທນລາວ ກໍໄດ້ສະແດງຄວາມຂອບໃຈຕໍ່ທ່ານຮອງປະທານສະພາ ແລະ ສະພາແຫ່ງຊາດ ແຫ່ງ ເບລາຣຸດ ທີ່ໄດ້ໃຫ້ການຕ້ອນຮັບ ແລະ ອຳນວຍຄວາມສະດວກແກ່ຄະນະຜູ້ແທນລາວເປັນຢ່າງດີ, ທ່ານໄດ້ຕີລາຄາສູງຕໍ່ສາຍພົວພັນຮ່ວມມືທີ່ເປັນມູນເຊື້ອ ແລະ ຍາວນານລະຫວ່າງສອງປະເທດ ລາວ-ເບລາຣຸດ ກໍຄື ສອງອົງການນິຕິບັນຍັດຂອງສອງປະເທດ ແລະ ທ່ານໄດ້ແຈ້ງກ່ຽວກັບສະພາບການພັດທະນາເສດຖະກິດ-ສັງຄົມ ຂອງ ສປປລາວ ແລະ ການຈັດຕັ້ງປະຕິບັດວຽກງານຂອງສະພາແຫ່ງຊາດລາວ ໃນໄລຍະຜ່ານມາ. ຫົວໜ້າຄະນະຜູ້ແທນສະພາແຫ່ງຊາດລາວ ໄດ້ສະແດງຄວາມຂອບໃຈ ແລະ ຕີລາຄາສູງ ທີ່ເບລາຣຸດ ໃຫ້ການຊ່ວຍເຫຼືອ ແລະ ສະໜັບສະໜູນ ສປປລາວ ມາໂດຍຕະຫຼອດ. ພ້ອມດຽວກັນນັ້ນ, ທ່ານຍັງໄດ້ແຈ້ງກ່ຽວກັບການກະກຽມເປັນເຈົ້າພາບກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຄັ້ງທີ 45 ທີ່ຈະຈັດຂຶ້ນຢູ່ ສປປລາວ ໃນປີ 2024 ແລະ ຫວັງວ່າສະພາແຫ່ງຊາດເບລາຣຸດ ຈະໃຫ້ການຊ່ວຍເຫຼືອ ແລະ ສະໜັບສະໜູນສະພາແຫ່ງຊາດລາວ ໃນການເປັນເຈົ້າພາບກອງປະຊຸມໃຫຍ່ຄັ້ງນີ້. ພ້ອມດຽວກັນນັ້ນ, ຄະນະຜູ້ແທນສະພາແຫ່ງຊາດລາວ ຍັງໄດ້ພົບປະເຮັດວຽກກັບທ່ານ Sergei Syrankov ສະມາຊິກກຳມະການປະຈຳວຽກງານການຮ່ວມມືສາກົນ, ປະທານຄະນະມິດຕະພາບລັດຖະສະພາ ເບລາຣຸດ-ລາວ ພ້ອມດ້ວຍຄະນະ ເຊິ່ງໄດ້ປຶກສາຫາລືກັນກ່ຽວກັບການສົ່ງເສີມການຮ່ວມມືຂອງສອງລັດຖະສະພາໃນຕໍ່ໜ້າ ໂດຍສະເພາະແມ່ນການຊຸກຍູ້ສົ່ງເສີມໃຫ້ລັດຖະບານຂອງສອງປະເທດ ເອົາໃຈໃສ່ສືບຕໍ່ຈັດຕັ້ງປະຕິບັດບັນດາສັນຍາ ແລະ ໂຄງການຮ່ວມມືຂອງສອງປະເທດທີ່ມີຮ່ວມກັນ ລວມໄປເຖິງການສົ່ງເສີມໃຫ້ມີການຮ່ວມມືທາງດ້ານເຕັກໂນໂລຊີ, ກະສິກຳ, ການທ່ອງທ່ຽວ, ການຄ້າ, ການລົງທຶນ, ການສຶກສາ ແລະ ອື່ນໆ ໃຫ້ຫຼາຍຂຶ້ນ.
ໃນໂອກາດດຽວກັນ, ຄະນະຜູ້ແທນສະພາແຫ່ງຊາດລາວ ຍັງໄດ້ພົບປະກັບທ່ານ Alexander Egorov ປະທານຄະນະບໍລິຫານງານທະນາຄານພັດທະນາແຫ່ງຊາດເບລາຣຸດ, ທັງເປັນປະທານຮ່ວມຂອງຄະນະກຳມະການຮ່ວມມືລະຫວ່າງເບລາຣຸດ-ລາວ ເຊິ່ງໄດ້ປຶກສາຫາລືກັນກ່ຽວກັບການສືບຕໍ່ຈັດຕັ້ງປະຕິບັດວຽກງານການຮ່ວມມືທາງດ້ານເສດຖະກິດ-ການຄ້າ ໃນຕໍ່ໜ້າ ເນື່ອງຈາກໃນໄລຍະຜ່ານມາມີການແຜ່ລະບາດຂອງພະຍາດໂຄວິດ-19 ຈຶ່ງເຮັດໃຫ້ຫຼາຍໂຄງການຮ່ວມມືຍັງບໍ່ມີຄວາມຄືບໜ້າເທົ່າທີ່ຄວນ ແຕ່ມາຮອດປັດຈຸບັນ ສະຖານະການໄດ້ດີຂຶ້ນ ປະກອບກັບ ສປປລາວ ໄດ້ສຳເລັດການສ້າງທາງລົດໄຟລາວ-ຈີນ ເຊິ່ງຈະເປັນອີກທ່າແຮງໜຶ່ງໃນການສົ່ງເສີມການຮ່ວມມືທາງດ້ານການຄ້າ-ການລົງທຶນ ລະຫວ່າງ ລາວ-ເບລາຣຸດ ແລະ ໃນໂອກາດດັ່ງກ່າວ ທ່ານຫົວໜ້າຄະນະຜູ້ແທນສະພາແຫ່ງຊາດລາວ ຍັງໄດ້ສະເໜີໃຫ້ທ່ານປະທານຄະນະບໍລິຫານງານທະນາຄານພັດທະນາແຫ່ງຊາດເບລາຣຸດ ຊ່ວຍສົ່ງເສີມການລົງທຶນໃນລາວໃຫ້ຫຼາຍຂຶ້ນ ໂດຍສະເພາະແມ່ນການສ້າງຜະລິດຕະພັນໃດໜຶ່ງຈາກທ່າແຮງທີ່ ສປປລາວ ມີ, ການສົ່ງເສີມວຽກງານການທ່ອງທ່ຽວ ແລະ ການພັດທະນາເສດຖະກິດດີຈີຕອນ ໃນ ສປປລາວ ເຊິ່ງທ່ານປະທານຄະນະບໍລິຫານງານທະນາຄານພັດທະນາແຫ່ງຊາດເບລາຣຸດ ກໍໄດ້ຕອບຮັບເອົາການສະເໜີດັ່ງກ່າວ ແລະ ຈະຊ່ວຍສະໜັບສະໜູນການຮ່ວມມື ແລະ ການພັດທະນາໃນລາວຢ່າງເຕັມທີ່.
ນອກຈາກນັ້ນ, ຄະນະຜູ້ແທນສະພາແຫ່ງຊາດລາວ ຍັງໄດ້ເຂົ້າຮ່ວມງານມະຫາກຳກ່ຽວ​ກັບ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ ​ແລະ ການສື່ສານສາກົນ ເຊິ່ງເປັນງານວາງສະແດງກ່ຽວກັບເຄື່ອງມື ແລະ ການນຳໃຊ້ເຕັກໂນໂລຊີໃນວຽກງານຕ່າງໆ ພ້ອມທັງເປັນເວທີປຶກສາຫາລື ແລະ ແລກປ່ຽນກ່ຽວກັບການພັດທະນາ ແລະ ການນຳໃຊ້ເຕັກໂນໂລຊີທີ່ທັນສະໄໝ, ພ້ອມນັ້ນ ກໍໄດ້ເດີນທາງໄປຢ້ຽມຊົມຫໍພິພິຕະພັນແຫ່ງຊາດເບລາຣຸດ, ຢ້ຽມຢາມ ແລະ ພົບປະກັບຜູ້ບໍລິຫານຂອງ The Hi-Tech Park ຂອງເບລາຣຸດ ເຊິ່ງເປັນສູນລວມໃນການສະໜອງການບໍລິການດ້ານໄອທີ, ການພັດທະນາສະຕາສອັບ ແລະ ເຕັກໂນໂລຊີຕ່າງໆ ແລະ ໄປຢ້ຽມຢາມເຂດອຸດສາຫະກຳ The great Stone park ເຊິ່ງເປັນໂຄງການຮ່ວມມືທີ່ໃຫຍ່ທີ່ສຸດລະຫວ່າງ ສ.ເບລາຣຸດ ແລະ ສປ.ຈີນ ແລະ ໄດ້ຢ້ຽມຊົມພື້ນຖານການພັດທະນາເສດຖະກິດ ແລະ ການພັດທະນາໂຕເມືອງທັນສະໄໝຂອງ ສາທາລະນະລັດ ເບລາຣຸດ ອີກຈຳນວນໜຶ່ງ.