(ສພຊ) – ວັນທີ 20-29 ພະຈິກ 2024 ທ່ານ ຮສ. ປອ. ວຽງວິໄລ ທ່ຽງຈັນໄຊ ຮອງປະທານກໍາມາທິການຍຸຕິທຳ ພ້ອມດ້ວຍຄະນະ ໄດ້ສຳເລັດການເຂົ້າຮ່ວມກອງປະຊຸມສໍາມະນາສະມາຊິກລັດຖະສະພາບັນດາປະເທດອາຊຽນ ທີ່ນະຄອນຫຼວງປັກກິ່ງ, ແຂວງກວາງຊີ ແລະ ແຂວງກວາງຕົງ, ສປຈີນ ທີ່ຈັດໂດຍສະຖາບັນເຝິກອົບຮົມນັກທຸລະກິດສາກົນ ຫຼື ສູນເຝິກອົບຮົມກະຊວງການຄ້າ (Academy for International Business Officials (AIBO) or Training Center of the Ministry of Commerce) ເຊິ່ງມີຄະນະຜູ້ແທນລັດຖະສະພາຈາກ 7 ປະເທດສະມາຊິກອາຊຽນເຂົ້າຮ່ວມ.

ທ່ານ ຮສ. ປອ. ວຽງວິໄລ ທ່ຽງຈັນໄຊ ໄດ້ມີຄຳເຫັນຕໍ່ພິທີເປີດ ໂດຍຕີລາຄາສູງຕໍ່ກອງປະຊຸມຄັ້ງນີ້ ເປັນການຊຸກຍູ້ໃຫ້ບັນດາປະເທດອາຊຽນ ແລະ ສປຈີນ ສົ່ງເສີມການພົວພັນຮ່ວມມື ແລະ ປະກອບສ່ວນ​ອັນ​ໃຫຍ່​ຫຼວງ​ເຂົ້າ​ໃນ​ການ​ເພີ່ມ​ທະວີ​ການ​ພົວພັນ​ມິດຕະພາບ​ທີ່​ເປັນ​ມູນ​ເຊື້ອ ​ແລະ ການ​ຮ່ວມ​ມື​ອັນ​ດີງາມ​ລະຫວ່າງ​​ລັດຖະສະພາ​ບັນດາ​ປະ​ເທດ​ອາ​ຊຽນ ​ແລະ ສະພາຜູ້ແທນປະຊາຊົນທົ່ວປະເທດ ແຫ່ງ ສປຈີນ (National People’s Congress – NPC), ເປັນການເສີມຂະຫຍາຍ​ການ​ພົວພັນ​ມິດຕະພາບ​ທີ່​ເປັນ​ມູນ​ເຊື້ອ​ລະຫວ່າງ​ສະພາ​ແຫ່ງ​ຊາດລາວ ແລະ ສະພາຜູ້ ແທນປະຊາຊົນທົ່ວປະເທດຈີນ ກໍຄືການແລກປ່ຽນ ແລະ ຖອດຖອນບົດຮຽນເຊິ່ງກັນແລະກັນ ໃນການຈັດຕັ້ງປະຕິບັດພາລະບົດບາດຂອງອົງການນິຕິບັນຍັດຂອງປະເທດສະມາຊິກອາຊຽນ ກໍຄືບັນຫາອື່ນໆທີ່ສອງຝ່າຍມີຄວາມສົນໃຈ.

ກອງປະຊຸມໄດ້ຜ່ານການຄົ້ນຄວ້າ ແລະ ແລກປ່ຽນຄໍາຄິດຄໍາເຫັນຕໍ່ຫົວຂໍ້ທີ 1: “ສົ່ງເສີມການພັດທະນາຄຸນນະພາບສູງ ແລະ ບັນລຸຄວາມຈະເລີນຮຸ່ງເຮືອງທົ່ວປວງຊົນ” (ແນະນຳກ່ຽວກັບຄວາມໝາຍທາງວິທະຍາສາດຕາມເສັ້ນທາງຈີນ ໃນການ​ຫັນ​ເປັນ​ທັນ​ສະ​ໄໝ ​ໂດຍ​ອີງ​ໃສ່​ເງື່ອນ​ໄຂ​ແຫ່ງ​ຊາດ​ຂອງ​ຈີນ, ການພັດທະນາກຳລັງການຜະລິດຄຸນນະພາບໃໝ່); ຫົວຂໍ້ທີ 2: “ການ​ເພີ່ມ​ທະວີ​ການ​ຮ່ວມ​ມື ​ຈີນ-ອາ​ຊຽນ ​ໃນ​ຂົງ​ເຂດ​ຕ່າງໆ​ພາຍ​ໃຕ້​ຂອບ​ຂໍ້​ລິ​ເລີ່​ມໜຶ່ງ​ແລວ​ໜຶ່ງ​ເສັ້ນທາງ” (ການ​ຮ່ວມ​ມື​​ໜຶ່ງ​ແລວ​​ໜຶ່ງ​ເສັ້ນ​ທາງທີ່ມີ​ຄຸນ​ນະ​ພາບ​ສູງ, ສ້າງ​ປະ​ຊາ​ຄົມຄູ່​ຮ່ວມຊາຕາກໍາ ຈີນ-ອາ​ຊຽນ ​ທີ່​ໃກ້​ຊິດຫຼາຍຂຶ້ນ​); ຫົວຂໍ້ທີ 3: “ຢຶດໝັ້ນ​ແນວທາງ​ຖືປະຊາຊົນ​ເປັນ​ໃຈກາງ ​ແລະ ຮັບປະກັນ​ໃຫ້ປະຊາຊົນເປັນເຈົ້າຂອງປະເທດຊາດ” (ລະບົບສະພາປະຊາຊົນ ແລະ ປະ ຊາທິປະໄຕທົ່ວປວງຊົນ, ການຈັດ​ຕັ້ງປະ​ຕິ​ບັດຂະ​ບວນ​ການ​ປະ​ຊາ​ທິ​ປະ​ໄຕ​ຂອງ​ທົ່ວປວງຊົນ​​ໃນຂົງເຂດ​ກົດໝາຍ ​ແລະ​ ວຽກງານ​ຕິດຕາມກວດກາຂອງ NPC).

ຮອງປະທານກໍາມາທິການຍຸຕິທໍາ ພ້ອມດ້ວຍຄະນະ ໄດ້ພົບປະສະຫາຍ ນາງ ຢາງ ຈິງຮວາ (Yang Jinghua) ຮອງ​​ຫົວໜ້າກົມ, ຄະນະ​ປະຈຳ​ສະພາຜູ້ແທນ​ປະຊາຊົນ​ເຂດ​ປົກຄອງ​ຕົນ​ເອງ​​ກວາງຊີ​ຈ້ວງ, ສະຫາຍ ນາງ ຢາງ ຈິງຮວາ ໄດ້ສະແດງຄວາມຍິນດີຕ້ອນຮັບ ແລະ ຕີລາສູງຕໍ່ການມາຢ້ຽມຢາມເຂດ​ປົກຄອງ​ຕົນ​ເອງກວາງຊີ​ຈ້ວງ ແລະ ເຂົ້າຮ່ວມກອງປະຊຸມສໍາມະນາສະມາຊິກ​​ລັດຖະສະພາບັນດາປະເທດອາຊຽນໃນຄັ້ງນີ້.

ທ່ານ ຮສ. ປອ. ວຽງວິໄລ ທ່ຽງຈັນໄຊ ໄດ້ມີໂອກາດໃຫ້ສໍາພາດຕໍ່ສື່ມວນຊົນຂອງ NPC ກ່ຽວກັບ: 1) ຄວາມປະ​ທັບ​ໃຈໃນ​ໄລຍະ​ຢ້ຽມຢາມ​ ສປຈີນ; 2) ຄຳເຫັນຕໍ່ການ​ຮ່ວມ​ມື​ ແລະ ​ສ້າງ​ປະຊາ​ຄົມຮ່ວມຊາຕາກຳ​ ຈີນ-ອາ​ຊຽນ​​; 3) ຄຳເຫັນຕໍ່ການໄປຢ້ຽມຢາມສຳນັກງານປະສານງານຝ່າຍນິຕິບັນຍັດຂັ້ນທ້ອງຖິ່ນ ແລະ ຂະບວນການສ້າງ, ປັບປຸງນິຕິກຳ ໂດຍການມີສ່ວນຮ່ວມຂອງປະຊາຊົນ ຕາມແນວທາງ​ປະຊາທິປະ​ໄຕ​ຂອງ​ຈີນ ແລະ 4) ຄໍາເຫັນເນື່ອງໃນໂອກາດຄົບຮອບ 70 ປີ ການສ້າງຕັ້ງສະພາຜູ້ແທນປະຊາຊົນທົ່ວປະເທດ ແຫ່ງ ສປຈີນ ເພື່ອເພີ່ມທະວີການພົວພັນຮ່ວມ​ມື​ ລະຫວ່າງອົງການ​ນິຕິບັນຍັດ​ ສປຈີນ​ ແລະ ສະພາແຫ່ງຊາດແຫ່ງ ສປປລາວ.

ນອກນັ້ນ, ຄະນະຜູ້ແທນລາວ ຍັງໄດ້ເຄື່ອນໄຫວຢ້ຽມຢາມ ແລະ ທັດສະນະສຶກສາສະຖານທີ່ສໍາຄັນທາງດ້ານການເມືອງ, ພື້ນຖານໂຄງລ່າງທາງດ້ານເສດຖະກິດ, ສະຖານທີ່ທ່ອງທ່ຽວທາງດ້ານປະຫວັດສາດຈຳນວນໜຶ່ງ ຢູ່ນະຄອນຫຼວງປັກກິ່ງ, ແຂວງກວາງຊີ ແລະ ແຂວງກວາງຕົງ.