ຕອນເຊົ້າຂອງວັນທີ 28 ຕຸລາ 2024 ນີ້, ຢູ່ແຂວງຢາລາຍ (GIA LAI) ສສ.ຫວຽດນາມ ໄດ້ຈັດກອງປະຊຸມພົບປະແລກປ່ຽນບົດຮຽນລະຫວ່າງ ຄະນະຜູ້ແທນຂັ້ນສູງ ສະພາປະຊາຊົນແຂວງ ຢາລາຍ ແຫ່ງ ສສ.ຫວຽດນາມ ກັບ ຄະນະຜູ້ແທນຂັ້ນສູງ ສະພາປະຊາຊົນແຂວງ ສາລະວັນ ແຫ່ງ ສປປລາວ; ຝ່າຍ ແຂວງຢາລາຍ ນໍາໂດຍ ສະຫາຍ ໂຮ່ ວັນ ນຽນ (Hồ Văn Niên) ກໍາມະການຄະນະບໍລິຫານງານສູນກາງພັກ ເລຂາຄະນະບໍລິຫານພັກແຂວງ ປະທານສະພາປະຊາຊົນແຂວງ ຢະລາຍ; ຝ່າຍ ແຂວງສາລະວັນ ນໍາໂດຍ ສະຫາຍ ສີເຮັງ ຫອມສົມບັດ ຮອງເລຂາຄະນະບໍລິຫານງານພັກແຂວງ ປະທານສະພາປະຊາຊົນແຂວງ ສາລະວັນ; ມີຄະນະຜູ້ແທນຂັ້ນສູງສອງຝ່າຍເຂົ້າຮ່ວມ;
ໃນທີ່ປະຊຸມ ສະຫາຍ ໂຮ່ ວັນ ນຽນ (Hồ Văn Niên) ກໍາມະການຄະນະບໍລິຫານງານສູນກາງພັກ ເລຂາຄະນະບໍລິຫານພັກແຂວງ ປະທານສະພາປະຊາຊົນແຂວງ ຢະລາຍ ໄດ້ກ່າວຕ້ອນຮັບວ່າ: ຄະນະປະຈຳສະພາປະຊາຊົນແຂວງ ຢາລາຍ ມີຄວາມຍິນດີເປັນຢ່າງຍິ່ງທີ່ໄດ້ຕ້ອນຮັບ ສະຫາຍ ສີເຮັງ ຫອມສົມບັດ, ຮອງເລຂາຄະນະບໍລິຫານພັກແຂວງ, ປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 14 ແຂວງສາລະວັນ, ປະທານສະພາປະຊາຊົນແຂວງສາລະວັນ ສປປລາວ ທີ່ເດີນທາງມາຢ້ຽມຢາມ, ເຮັດວຽກ ແລະ ແລກປ່ຽນບົດຮຽນໃນການເຄື່ອນໄຫວວຽກງານຂອງສະພາປະຊາຊົນຮ່ວມກັບຄະນະປະຈຳສະພາປະຊາຊົນແຂວງ ຢາລາຍ; ນີ້ແມ່ນການຢ້ຽມຢາມທີ່ມີຄວາມໝາຍສໍາຄັນ, ສືບຕໍ່ຮັດແໜ້ນນໍ້າໃຈສາມັກຄີ, ຖານມິດສະຫາຍອ້າຍນ້ອງອັນເລິກເຊິ່ງ ລະຫວ່າງຄະນະພັກ, ອົງການປົກຄອງ ແລະ ປະຊາຊົນແຂວງສາລະວັນ ກັບຄະນະພັກ, ອົງການປົກຄອງ ແລະ ປະຊາຊົນແຂວງຢາລາຍ; ພ້ອມນັ້ນ, ຮັດແໜ້ນ ແລະ ຍົກສູງປະສິດທິຜົນຂອງການຮ່ວມມືພັດທະນາຢ່າງຮອບດ້ານລະຫວ່າງແຂວງ ສາລະວັນ ແລະ ແຂວງ ຢາລາຍ, ສູ້ຊົນປະຕິບັດມະຕິກອງປະຊຸມໃຫຍ່ຜູ້ແທນອົງຄະນະພັກຂອງແຕ່ລະແຂວງ ແລະ ກະກຽມໃຫ້ແກ່ກອງປະຊຸມ ໃຫຍ່ຜູ້ແທນອົງຄະນະພັກສະໄໝຈະມາເຖິງ;
ຈາກນັ້ນ, ຕາງໜ້າສະພາປະຊາຊົນ ສອງແຂວງ ຢາລາຍ ແລະ ສາລະວັນ ໄດ້ຜັດປ່ຽນກັນ ລາຍງານບາງເນື້ອໃນໂດຍຫຍໍ້ ຈຸດພິເສດທີ່ຕັ້ງຂອງແຂວງ, ພາລະບົດບາດ, ສິດ ແລະ ໜາທີ່ຂອງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃຫ້ຄະນະຜູ້ແທນກອງປະຊຸມໄດ້ຮັບຊາບ ແລະ ໄດ້ລົງເລິກຄົ້ນຄວ້າປຶກສາຫາລືແລກປ່ຽນບົດຮຽນນຳກັນ ໂດຍສະເພາະ ແລກປ່ຽນກ່ຽວກັບການເປັນເສນາທິການຮັບໃຊ້ໃຫ້ແກ່ຄະນະປະຈໍາ ສະພາປະຊາຊົນແຂວງ, ດ້ານງົບປະມານ, ຂອດການພົວພັນປະສານງານກັບຫ້ອງວ່າການແຂວງ, ວິທີແກ້ໄຂບັນຫາການປະລະການຮຽນ, ເຊິ່ງເປັນຄັ້ງທໍາອິດທີ່ໄດ້ແລກປ່ຽນ ເຊິ່ງໄດ້ດຳເນີນໄປດ້ວຍບັນຍາກາດຄວາມມີໄມຕີຈິດ ມິດຕະພາບ ບົນພື້ນຖານທີ່ຕ່າງຝ່າຍຕ່າງໄດ້ຮັບຜົນປະໂຫຍດທີ່ເທົ່າທຽມກັນ, ການພົບປະແລກປ່ຽນບົດຮຽນເທື່ອນີ້ ທັງສອງຝ່າຍໄດ້ເຫັນດີຮັບເອົາບົດຮຽນຊຶ່ງກັນ ແລະ ກັນ ເພື່ອໄປໝູນໃຊ້ເຂົ້າໃນພືດຕິກຳຕົວຈິງຂອງການເຄື່ອນໄຫວວຽກງານສະພາປະຊາຊົນແຂວງ ໃຫ້ດີຂຶ້ນເປັນກ້າວໆ;
ຕອນບ່າຍຂອງວັນດຽວກັນ, ຄະນະຜູ້ແທນຂັ້ນສູງ ສະພາປະຊາຊົນແຂວງສາລະວັນ ໄດ້ເດີນທາງໄປທັດສະນະຢ້ຽມຊົມພື້ນຖານການຜະລິດກາເຟ ຂອງໂຮງງານກາເຟ ວິງ ຮຽບ (Vinhhiep) ເຊິ່ງໄດ້ສ້າງຕັ້ງຂຶ້ນໃນປີ 1991 ພາຍຫຼັງກວ່າ 30 ປີ ດໍາເນີນທຸລະກິດດ້ານການຜະລິດ, ຊື້, ປຸງແຕ່ງ ແລະ ສົ່ງອອກ ກາເຟ, ໝາກພິກໄທ, ແລະ ກາເຟທັນສະໃໝ ມີກໍາລັງການຜະລິດກາເຟ 5,000 ໂຕນຕໍ່ປີ, ໄດ້ເປັນໜຶ່ງໃນບັນດາວິສາຫະກິດນຳໜ້າໃນການສົ່ງອອກຜະລິດຕະພັນການກະເສດ, ໄດ້ຮັບການຮັບຮອງຈາກລັດຖະມົນຕີກະຊວງອຸດສາຫະກຳ ແລະ ການຄ້າ ເປັນຫົວໜ່ວຍສົ່ງອອກຂອງຫວຽດນາມ.
ພາບ-ຂ່າວ: ດີລໍາພົນ ພົມມະຈັນ