ວັນທີ 30 ຕຸລາ 2024 ນີ້, ທີ່ສະພາປະຊາຊົນ ນະຄອນດານັງ ສສ.ຫວຽດນາມ ໄດ້ຈັດກອງປະຊຸມພົບປະແລກປ່ຽນບົດຮຽນ ລະຫວ່າງ ຄະນະຜູ້ແທນຂັ້ນສູງ ສະພາປະຊາຊົນ ນະຄອນດານັງ ແຫ່ງ ສສ.ຫວຽດນາມ ກັບ ຄະນະຜູ້ແທນຂັ້ນສູງ ສະພາປະຊາຊົນແຂວງ ສາລະວັນ; ຝ່າຍສະພາປະຊາຊົນ ນະຄອນດານັງ ເຂົ້າຮ່ວມຂອງ ສະຫາຍ ໂງ ຊວັນ ຖັງ ກໍາມະການປະຈໍາພັກນະຄອນ ປະທານສະພາປະຊາຊົນ ນະຄອນດານັງ, ຝ່າຍສະພາປະຊາຊົນແຂວງ ສາລະວັນ ເຂົ້າຮ່ວມຂອງສະຫາຍ ສີເຮັງ ຫອມສົມບັດ ຮອງເລຂາຄະນະບໍລິຫານງານພັກແຂວງ ປະທານສະພາປະຊາຊົນແຂວງສາລະວັນ ມີທ່ານ ພູສະຫວ່າງ ພົມມະຈັກ ຮອງຫົວໜ້າສໍານັກງານສານກົງສູນ ປະຈໍານະຄອນດານັງ ແລະ ເຂົ້າຮ່ວມຂອງຄະນະຜູ້ແທນສະພາປະຊາຊົນ ນະຄອນດານັງ-ສາລະວັນ ຢ່າງພ້ອມພຽງ;
ໃນທີ່ປະຊຸມທັງສອງຝ່າຍ ໄດ້ຜັດປ່ຽນກັນລາຍງານບາງເນື້ອໃນໂດຍຫຍໍ້ ກ່ຽວກັບຈຸດພິເສດທີ່ຕັ້ງຂອງນະຄອນ, ແຂວງ, ພາລະບົດບາດ, ສິດ ແລະ ໜາທີ່ຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນນະຄອນ, ຂັ້ນແຂວງ ໃຫ້ຄະນະຜູ້ແທນກອງປະຊຸມໄດ້ຮັບຊາບ ແລະ ໄດ້ລົງເລິກຄົ້ນຄວ້າປຶກສາຫາລືແລກປ່ຽນບົດຮຽນນຳກັນໂດຍແລກປ່ຽນໃນຫົວຂໍ້ ທີ່ສອງແຂວງມີຄວາມສົນໃຈ ຜ່ານການຈັດຕັ້ງປະຕິບັດຕົວຈິງໃນໄລຍະຜ່ານມາ ເປັນຕົ້ນ: ວຽກງານການຈັດຕັ້ງປະຕິບັດການຕິດຕາມກວດກາຂອງຄະນະປະຈໍາສະພາປະຊາຊົນ; ວຽກງານການເຄື່ອນໄຫວພົບປະຜູ້ມີສິດເລືອກຕັ້ງຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນນະຄອນ, ແຂວງ; ວຽກງານ ຮັບ ແລະ ພິຈາລະນາຄໍາຮ້ອງຂໍຄວາມເປັນທໍາຂອງປະຊາຊົນ;
ພ້ອມນີ້, ສະຫາຍ ສີເຮັງ ຫອມສົມບັດ ໄດ້ຕີລາຄາສູງຕໍ່ບັນດາໝາກຜົນ ແລະ ຜົນງານທີ່ ສະພາປະຊາຊົນ ນະຄອນ ດານັງ ບັນລຸໄດ້ໃນໄລຍະມໍ່ໆມານີ້, ພິເສດແມ່ນປະສິດທິຜົນການເຄື່ອນໄຫວຂອງສະພາປະຊາຊົນນະຄອນທຸກຂັ້ນ ແລະ ການແລກປ່ຽນບົດຮຽນ ປະສົບການຮ່ວມກັບສະພາປະຊາຊົນນະຄອນ ດານັງ ຄັ້ງນີ້ ຈະຊ່ວຍໃຫ້ແຂວງສາລະວັນ ປັບປຸງປະສິດທິພາບການຈັດຕັ້ງປະຕິບັດວຽກງານຂອງສະພາປະຊາຊົນແຂວງໃຫ້ດີຂຶ້ນ, ໂດຍສະເພາະແມ່ນວຽກງານຕິດຕາມກວດກາ ແລະ ການຕ້ອນຮັບປະຊາຊົນ, ການຈັດຕັ້ງປະຕິບັດນິຕິກໍາ ແລະ ກົດໝາຍ; ສະຫາຍຍັງໄດ້ກ່າວຕື່ມອີກວ່າ: ກອງປະຊຸມຄັ້ງນີ້ ບັນດາສະຫາຍຄະນະຜູ້ແທນໄດ້ປະກອບຄຳເຫັນບົດຮຽນດ້ວຍຄວາມຈິງໃຈ ທີ່ຈະຊ່ວຍໃຫ້ຄະນະຜູ້ແທນໄດ້ຮຽນຮູ້ເອົາປະສົບການ ແລະ ຂໍ້ດີ ເພື່ອນຳໄປປະຕິບັດໃນວຽກງານຕົວຈິງຢູ່ພາຍໃນແຂວງສາລະວັນ.
ພາບ-ຂ່າວ: ດີລໍາພົນ ພົມມະຈັນ