(ສພຊ) ໂດຍຕອບສະໜອງຕາມຄໍາເຊີນຂອງສະຫາຍ ລີ ຈ້ານຊູ ຄະນະປະຈໍາກົມການເມືອງສູນກາງພັກກອມມູນິດຈີນ, ປະທານສະພາຜູ້ແທນປະຊາຊົນທົ່ວປະເທດຈີນ, ຄະນະຜູ້ແທນຂັ້ນສູງສະພາແຫ່ງຊາດ (ສພຊ) ລາວ ນໍາໂດຍສະຫາຍ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສປປລາວ, ໄດ້ຢ້ຽມຢາມ ແລະ ເຮັດວຽກຢ່າງເປັນທາງການ ຢູ່ ສປຈີນ ເປັນເວລາ 5 ວັນ, ລະຫວ່າງວັນທີ 16-20 ທັນວາ 2019 ເຊິ່ງໄດ້ປະສົບຜົນສໍາເລັດຢ່າງຈົບງາມ ແລະ ເກີນລະດັບຄາດໝາຍ ໂດຍການຕ້ອນຮັບຢ່າງສົມກຽດຈາກການນຳຂອງພັກກອມມູນິດຈີນ ຄື: ສະຫາຍ ລີ ຈ້ານຊູ ຄະນະປະຈໍາກົມການເມືອງສູນກາງພັກກອມມູນິດຈີນ, ປະທານສະພາຜູ້ແທນປະຊາຊົນທົ່ວປະເທດຈີນ ແລະ ສະຫາຍ ວາງ ຢາງ ກຳມະການປະຈຳກົມການເມືອງສູນກາງພັກກອມມູນິດຈີນ, ປະທານສະພາທີ່ປຶກສາການເມືອງປະຊາຊົນທົ່ວປະເທດຈີນ.

ໃນການພົບປະສອງຝ່າຍກັບ ປະທານສະພາຜູ້ແທນປະຊາຊົນທົ່ວປະເທດຈີນ ແລະ ພົບປະ ປະທານສະພາທີ່ປຶກ ສາການເມືອງປະຊາຊົນທົ່ວປະເທດຈີນ, ຝ່າຍລາວໄດ້ສະເໜີຄຳຄິດຄຳເຫັນ ເພື່ອແລກປ່ຽນໃນຫລາຍບັນຫາ ໂດຍ ສະເພາະການຊຸກຍູ້ການຮ່ວມມືດ້ານເສດຖະກິດ, ການຄ້າ ແລະ ການລົງທຶນ; ຝ່າຍຈີນ ໄດ້ແລກປ່ຽນຄຳເຫັນຢ່າງກົງ ໄປກົງມາ ແລະ ສະໜິດສະໜົມ ໂດຍເນັ້ນໃສ່ການຮ່ວມມືທາງດ້ານການເມືອງ ໃນການຈັດຕັ້ງປະຕິບັດແຜນແມ່ບົດ ວ່າດ້ວຍການສ້າງປະຊາຄົມຮ່ວມຊະຕາກຳລາວ-ຈີນ ປິ່ນອ້ອມ 5 ແຜນປະຕິບັດງານ ທີ່ກຳນົດໄວ້ໃນເອກະສານດັ່ງກ່າວ, ຊຸກຍູ້ການຈັດຕັ້ງປະຕິບັດບັນດາຂໍ້ຕົກລົງ ແລະ ບັນດາໂຄງການຮ່ວມມືລາວ-ຈີນ ທີ່ຜູ້ນຳສູງສຸດຂອງສອງປະເທດ ໄດ້ຕົກລົງນຳກັນ ໃຫ້ໄດ້ຮັບການຈັດຕັ້ງປະຕິບັດຢ່າງມີໝາກມີຜົນ ແລະ ມີປະສິດທິຜົນ. ກ່ຽວກັບການຮ່ວມມື ລະຫວ່າງ ສະພາແຫ່ງຊາດລາວ ແລະ ສະພາຜູ້ແທນປະຊາຊົນທົ່ວປະເທດຈີນ, ຝ່າຍລາວ ໄດ້ຕີລາຄາສູງຕໍ່ການພົວພັນ ແລະ ຮ່ວມມືສອງຝ່າຍ ລະຫວ່າງສອງອົງການນິຕິບັນຍັດ ແລະ ໄດ້ສະເໜີໃຫ້ມີການສືບຕໍ່ການໄປມາຫາສູ່ກັນ ໃນທຸກລະດັບ ເພື່ອສ້າງຄວາມໄວ້ເນື້ອເຊື່ອໃຈ ເຊິ່ງກັນ ແລະ ກັນ, ຊ່ວຍເຫລືອເຊິ່ງກັນ ແລະ ກັນ ໃນດ້ານວິຊາການ ເປັນຕົ້ນການຈັດເຝິກອົບຮົມເພື່ອສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນແຂວງຂອງລາວ ໂດຍການໃຊ້ງົບປະມານຊ່ວຍເຫລືອຈາກຝ່າຍຈີນ ເຊິ່ງການເຝິກອົບຮົມນັ້ນ ອາດຈັດຂຶ້ນທັງຢູ່ ສປຈີນ ແລະ ຢູ່ ສປປລາວ, ແຕ່ອາດເນັ້ນໜັກການຈັດເຝິກອົບຮົມ ຢູ່ ສປປລາວ ໃຫ້ ຫລາຍກວ່າ ເພາະວ່າຈະໄດ້ຜູ້ເຂົ້າຮ່ວມຈຳນວນຫລາຍກວ່າ. ຕໍ່ບັນຫາດັ່ງກ່າວ, ຝ່າຍຈີນໄດ້ຕອບຮັບດ້ວຍຄວາມຈິງໃຈ ແລະ ຍິນດີຈະປະຕິບັດຕາມການສະເໜີຂອງສະພາແຫ່ງຊາດລາວ.

ຄະນະຜູ້ແທນຂັ້ນສູງ ສພຊ ຍັງໄດ້ຢ້ຽມຢາມນະຄອນເຫີເຟີຍ ແຂວງອານຮຸຍ ໂດຍໄດ້ຮັບການຕ້ອນຮັບເປັນຢ່າງດີ ຈາກເລຂາພັກແຂວງ, ປະທານສະພາປະຊາຊົນແຂວງອານຮຸຍ ແລະ ໄດ້ແລກປ່ຽນບົດຮຽນກັບສະພາປະຊາຊົນແຂວງອານຮຸຍ ກ່ຽວກັບບັນຫາທີ່ຄະນະຜູ້ແທນລາວສົນໃຈ.

ການຢ້ຽມຢາມຂອງທ່ານປະທານສະພາແຫ່ງຊາດລາວ ທີ່ ສປຈີນ ຄັ້ງນີ້ ເຫັນວ່າເປັນການຢ້ຽມຢາມທີ່ມີຄວາມໝາຍສຳຄັນຫລາຍ, ໄດ້ເປັນຂີດໝາຍຂອງການເປີດປະຕູ ແລະ ປູທາງໃຫ້ແກ່ບັນດາກຳມາທິການຂອງສະພາແຫ່ງຊາດ ຈະໄດ້ສືບຕໍ່ຮັດແໜ້ນການພົວພັນຮ່ວມມື ລະຫວ່າງສອງສະພາແຫ່ງຊາດ ໃນໄລຍະໃໝ່, ໄລຍະແຫ່ງການຈັດຕັ້ງປະຕິບັດແຜນແມ່ບົດ ວ່າດ້ວຍການສ້າງຄູ່ຮ່ວມຊະຕາກໍາ ລາວ-ຈີນ ໃນ 5 ປີຕໍ່ໜ້າ.

ນອກຈາກນີ້, ສະຫາຍ ນາງ ປານີ ຢາທໍ່ຕູ້ ຍັງໄດ້ນໍາພາຄະນະຜູ້ແທນສະພາແຫ່ງຊາດລາວ ເຂົ້າຮ່ວມພິທີສະຫລຸບປີທ່ອງທ່ຽວລາວ-ຈີນ 2019 ແລະ ຢ້ຽມຊົມງານວາງສະແດງຜົນງານ 70 ປີ ຂອງ ສປຈີນ, ຢ້ຽມຊົມຫ້ອງວາງສະແດງຂອງບໍລິສັດ ຫົວເຫວີຍ ແລະ ຢ້ຽມຊົມພື້ນຖານການຜະລິດທາງດ້ານກະສິກໍາ-ອຸດສາຫະກໍາ ການລຶບລ້າງຄວາມທຸກຍາກ ລວມທັງໂຮງຮຽນຢູ່ແຂວ ອານຮຸຍ ຕື່ມອີກ.