(ສພຊ) ໂດຍຕອບສະໜອງຕາມການເຊື້ອເຊີນຂອງ ທ່ານ Duarte Pacheco ປະທານສະຫະພັນລັດຖະສະພາສາກົນ (IPU) ແລະ ເພື່ອເປັນການປະຕິບັດພັນທະຂອງສະພາແຫ່ງຊາດ ແຫ່ງ ສປປລາວ ໃນຖານະທີ່ເປັນສະມາຊິກຂອງ IPU, ໃນວັນທີ 10 ມີນາ 2023 ຄະນະຜູ້ແທນຂັ້ນສູງຂອງສະພາແຫ່ງຊາດ ນຳໂດຍທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ ແຫ່ງ ສປປລາວ ພ້ອມດ້ວຍຄະນະ ໄດ້ເດີນທາງເຂົ້າຮ່ວມກອງປະຊຸມໃຫຍ່ສະຫະພັນລັດຖະສະພາສາກົນ (IPU) ຄັ້ງທີ 146 ທີ່ມານາມາ, ປະເທດບາເຣນ. ກອງປະຊຸມດັ່ງກ່າວຈະດຳເນີນໄປເປັນເວລາ 5 ວັນ, ນັບແຕ່ວັນທີ 11-15 ມີນາ 2023 ເຊິ່ງຈະມີຄະນະຜູ້ແທນຈາກ 179 ປະເທດທົ່ວໂລກ ທີ່ເປັນສະມາຊິກ IPU ເຂົ້າຮ່ວມ.
ໃນການເຂົ້າຮ່ວມກອງປະຊຸມຄັ້ງນີ້, ທ່ານຮອງປະທານສະພາແຫ່ງຊາດ, ຫົວໜ້າຄະນະຜູ້ແທນລາວ ຈະໄດ້ຂຶ້ນກ່າວປາໄສ ຕໍ່ກອງປະຊຸມພາຍໃຕ້ຫົວຂໍ້: “ສົ່ງເສີມການຢູ່ຮ່ວມກັນຢ່າງສັນຕິ ແລະ ສັງຄົມທີ່ກວມລວມ: ຕ້ານທຸກການກະທຳທີ່ຂາດຄວາມອົດທົນອົດກັ້ນ ”. ພ້ອມດຽວກັນນັ້ນ, ຄະນະຜູ້ແທນສະພາແຫ່ງຊາດລາວ ຍັງຈະໄດ້ເຂົ້າຮ່ວມກອງປະຊຸມເຄືອຂ່າຍລັດຖະສະພາ ຂອງບັນດາປະເທດສະມາຊິກຂະບວນການບໍ່ຮ່ວມກຸ່ມ ຄັ້ງທີ 2 ແລະ ພົບປະສອງຝ່າຍກັບຄະນະຜູ້ແທນຈາກລັດຖະສະພາປະເທດເພື່ອນມິດ ແລະ ອົງການລັດຖະສະພາພາກພື້ນ ແລະ ສາກົນ ຈຳນວນໜຶ່ງ.