ຕອນເຊົ້າວັນພະຫັດ, ວັນທີ 13 ຕຸລາ 2022, ຢູ່ທີ່ຫ້ອງປະຊຸມສະພາປະຊາຊົນແຂວງ, ຄະນະປະຈໍາສະ ພາປະຊາຊົນແຂວງ ໄດ້ຮັບຟັງການລາຍງານການປັບປຸງຂໍ້ຕົກລົງຂອງທ່ານເຈົ້າແຂວງ ຈາກພະແນກຖະແຫຼງຂ່າວວັດທະນະທໍາ ແລະ ທ່ອງທ່ຽວ, ໂດຍການເປັນປະທານຂອງທ່ານ ຄໍາດີ ວົງລ້ວມ ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 04, ປະທານ ສພຂ, ມີບັນດາທ່ານຮອງປະທານ, ຄະນະປະຈໍາ ສພຂ, ຫົວໜ້າຂະແໜງ, ວິຊາການຂະແໜງວັດທະນະທໍາສັງຄົມ ແລະ ບັນດາເຜົ່າ, ມີທ່ານ ເພັງ ສຸດາວອນ ຮອງຫົວໜ້າພະແນກຖະແຫຼງຂ່າວວັດທະນະທໍາ ແລະ ທ່ອງທ່ຽວ, ຄະນະຮັບຜິດຊອບເຂົ້າຮ່ວມ.

ທ່ານຮອງຫົວໜ້າພະແນກຖະແຫຼງຂ່າວວັດທະນະທໍາ ແລະ ທ່ອງທ່ຽວ ໄດ້ຕາງໜ້າຄະນະຮັບຜິດຊອບລາຍງານການປັບປຸງຂໍ້ຕົກລົງຂອງທ່ານເຈົ້າແຂວງ ວ່າດ້ວຍ ການຄຸ້ມຄອງການຈັດງານປະເພນີຕ່າງໆຢູ່ແຂວງອຸດົມໄຊ ທີ່ນໍາເຂົ້າຜ່ານໃນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II ຄັ້ງວັນທີ 09-10 ສິງຫາ 2022 ທີ່ຜ່ານມາ, ເຊິ່ງບັນດາທ່ານສະມາຊິກສະພາປະຊາຊົນແຂວງໄດ້ຄົ້ນຄວ້າ, ພິຈາລະນາ ແລະ ປະກອບຄໍາເຫັນຢູ່ໃນກອງປະຊຸມ, ຜ່ານການປະກອບຄໍາເຫັນທາງຄະນະຮັບຜິດຊອບໄດ້ເອົາໃຈໃສໃນການປັບປຸງຄືນ, ພ້ອມນັ້ນ ທ່ານຍັງໄດ້ມີຄໍາເຫັນແລກປ່ຽນວ່າຂໍ້ຕົກລົງດັ່ງກ່າວມີບາງໝວດ, ບາງມາດຕາ ທີ່ບໍ່ສາມາດປັບປຸງໄດ້ແມ່ນຍ້ອນສາເຫດອັນໃດ ແລະ ໄດ້ຊີ້ແຈງອະທິບາຍຕໍ່ຄະນະປະຈໍາສະພາປະຊາຊົນແຂວງ. ຫຼັງຈາກນັ້ນປະທານໄດ້ມີຄໍາເຫັນ ກ່ອນອື່ນທ່ານໄດ້ສະແດງຄວາມຂອບໃຈ ພາກສ່ວນກ່ຽວຂ້ອງທີ່ໃຫ້ການຮ່ວມມື ແລະ ປັບປຸບຂໍ້ຕົກລົງດັ່ງກ່າວ ເພື່ອໃຫ້ຖືກຕ້ອງ, ສອດຄ່ອງກັບສະພາບຄວາມເປັນຈິງໃນທ້ອງຖິ່ນແຂວງອຸດົມໄຊປັດຈຸບັນ ແລະ ສາມາດນໍາໄປຈັດຕັ້ງປະຕິບັດໃຫ້ມີປະສິດທິຜົນ.

ພາບ/ຂ່າວ: ແສງພອນ ອິນນະລົງ.