ໃນວັນທີ​ 15​ ສີງຫາ​ 2022.​ ທ່ານ​ ນາງ​ ພອນມະນີ​ ຂຽນໄຊຍະວົງ​ ຮອງປະທານ​ ສພຂ​ ຕາງຫນ້າ​ໃຫ້​ ຄະນະປະຈໍາ​ ສພຂ​ ຂື້ນ​ປະກອບ​ຄຳເຫັນ​ໃນກອງປະຊຸມສະໄຫມສາມັນເທື່ອທີ3ຂອງ ສພຂ​ ຊຸດທີII, ຕໍ່ບົດລາຍງານອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ​ຂັ້ນແຂວງ​ 6ເດືອນຕົ້ນປີ2022ແລະທິດທາງແຜນພັດທະນາເສດຖະກິດ-ສັງຄົມ,ແຜນງົບປະມານແຫ່ງລັດຂັ້ນແຂວງ6ເດືອນທ້າຍປີ 2022.ເຊິ່ງໃນນັ້ນ ຄະນະປະຈໍາ​ ສພຂ​ ໄດ້ສະເໜີໃຫ້ອົງການປົກຄອງ ເອົາໃຈໃສ່ປະຕິບັດ 19 ບັນຫາສໍາຄັນເພື່ອເຮັດໃຫ້ການຈັດຕັ້ງປະຕິບັດແຜນພັດທະນາເສດຖະກິດສັງຄົມ, ແຜນງົບປະມານແຫ່ງລັດຂັ້ນແຂວງ​ ບັນລຸຕາມແຜນທີ່ກຳນົດໄວ້ດັ່ງນີ້:

1) ສືບຕໍ່ຕິດຕາມ, ຄົ້ນຄ້ວາຕີລາຄາ ແລະ ຄາດຄະເນສະພາບການຜັນແປຂອງເສດຖະກິດຂອງພາກພື້ນ ແລະ ພາຍໃນປະເທດໃຫ້ຈະແຈ້ງຊັດເຈນ ໃຫ້ທັນການ ເພື່ອກໍາເອົາກາລະໂອກາດ, ສິ່ງທ້າທາຍ ແລະ ມີມາດຕະການຮັບມືຢ່າງເປັນເຈົ້າການ ແລະ ໃຫ້ທວງທັນກັບສະພາບການ ເພື່ອຮັບປະກັນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃຫ້ໄດ້ຄາດໝາຍຕາມມະຕິສະພາປະຊາຊົນຂັ້ນແຂວງຮັບຮອງ;

2) ຄົ້ນຄ້ວານະໂຍບາຍ ແລະ ມາດຕາການ ຈະແຈ້ງ ກ່ຽວກັບການດຸນດ່ຽງເສດຖະກິດມະຫາພາກເປັນຕົ້ນ:
– ຮັບປະກັນການດຸນດ່ຽງກະແສເງິນຕາເຂົ້າ- ອອກ ຕ່າງປະເທດ, ການຊໍາລະກັບຕ່າງປະເທດ ໂດຍສະເພາະເອົາໃຈໃສ່ຄຸ້ມຄອງລາຍຈ່າຍເປັນເງິນຕາຈາກການສົ່ງອອກ ແລະ ການນໍາເຂົ້າໃຫ້ຄົບຖ້ວນ ແລະ ເຂົ້າສູ່ລະບົບ;
– ຮັບປະກັນການດຸນດ່ຽງ ແຫຼ່ງທຶນການພັດທະນາ;
– ຮັບປະກັນ ການດຸນດ່ຽງງົບປະມານແຫ່ງລັດ ໂດຍສະເພາະ ພິຈາລະນາໂຄງການລົງທືນໃໝ່ ເພື່ອບໍ່ໃຫ້ສ້າງຄວາມກົດດັນ ຕໍ່ສະພາບໜີ້ສິນສາທາລະນະ;
– ຮັບປະກັນ ການດຸນດ່ຽງ ການສະໜອງ ແລະ ຄວາມຕ້ອງການສິນຄ້າພາຍໃນແຂວງ;
– ຮັບປະກັນ ການດຸນດ່ຽງແຮງງານ ເປັນຕົ້ນ ການສ້າງວຽກເຮັດງານທໍາ ແລະ ຕອບສະໜອງແຮງງານ ໃຫ້ພຽງພໍຕາມຄວາມຕ້ອງການ ຂອງການພັດທະນາແຂວງ;

3) ເອົາໃຈໃສ່ຄົ້ນຄ້ວາ ແລະ ກໍານົດມາດຕະການ ປະຕິບັດແຜນງົບປະມານ ໃຫ້ຕິດພັນກັບແຜນວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກ ທາງດ້ານເສດຖະກິດ ໂດຍສະເພາະ ການປະຕິບັດຄາດໝາຍແກ້ໄຂໜີ້ສິນສາທາລະນະ ໃຫ້ມີຄວາມຄືບໜ້າ ເພື່ອສາມາດບັນລຸຄາດໝາຍ ຕາມທີ່ໄດ້ກໍານົດໃນ ມະຕິສະພາປະຊາຊົນຂັ້ນແຂວງ ຮອດປີ 2023; ເລັ່ງລັດການຫັນເປັນທັນສະໄໝ ດ້ວຍລະບົບດີຈີຕອນ ໃນຂົງເຂດການເງິນ-ງົບປະມານ, ຮັບປະກັນການຈັດຕັ້ງເກັບລາຍຮັບ ແລະ ຄຸ້ມຄອງລາຍຈ່າຍ ງົບປະມານ ໃຫ້ເປັນລະບົບ, ປະຕິບັດວີໄນ ແຜນການ-ການເງິນ ຢ່າງເຂັ້ມງວດຕາມກົດໝາຍ ໃຫ້ມີຜົນສັກສິດ ມີປະສິດທິພາບ ແລະ ປະສິດທິຜົນ;
4) ເພີ່ມທະວີການໂຄສະນາສຶກສາອົບຮົມຢ່າງກວ້າງຂວາງ, ສ້າງຄວາມຮັບຮູ້ ແລະ ເຂົ້າໃຈ ທີ່ເປັນເອກະພາບທົ່ວປວງຊົນ, ປຸກຈິດສຳນຶກນ້ຳໃຈຮັກຊາດ ແລະ ພັດທະນາ, ເພິ່ງຕົນເອງ-ກຸ້ມຕົນເອງ ແລະ ສ້າງຄວາມເຂັ້ມແຂວງດ້ວຍຕົນເອງ, ຫັນວິກິດໃຫ້ເປັນໂອກາດ ໃນເງື່ອນໄຂທີ່ເສດຖະກິດມີຄວາມຫຍຸ້ງຍາກ ດ້ວຍການຂຸດຄົ້ນ ແລະ ນໍາໃຊ້ທ່າແຮງບົ່ມຊ້ອນ ຂອງທຸກພາກສ່ວນ, ເພື່ອສົ່ງເສີມການຜະລິດ ແລະ ຊົມໃຊ້ຜະລິດຕະພັນພາຍໃນໃຫ້ປະກົດຜົນເປັນຈິງ ລວມທັງການນໍາໃຊ້ເງິນກີບ ໃນທົ່ວສັງຄົມ;

5) ເອົາໃຈໃສ່ ຊີ້ນໍາຂະແໜງການ ຂັ້ນແຂວງ ແລະ ອົງການປົກຄອງເມືອງ ສືບຕໍ່ຈັດຕັ້ງປະຕິບັດບັນດາຄາດໝາຍ, ນະໂຍບາຍ ແລະ ມາດຕະການຕ່າງໆ ທີ່ໄດ້ຮັບຮອງໃນມະຕິ 16/ສພຂ ກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນແຂວງ ຊຸດທີ II ເພື່ອຮັບປະກັນໃຫ້ການປະຕິບັດແຜນພັດທະນາເສດຖະກິດ-ສັງຄົມໃຫ້ໄດ້ຕາມແຜນການ ທີ່ກໍານົດໄວ້;

6) ເອົາໃຈໃສ່ປະຕິບັດມາດຕະການ ທີ່ໄດ້ກໍານົດ ເພື່ອບັນລຸຄາດໝາຍດ້ານເງິນຕາ ທີ່ເປັນບັນຫາຫຼໍ່ແຫຼມ ເປັນຕົ້ນອັດຕາເງິນເຟີ້, ອັດຕາແລກປ່ຽນ, ເພື່ອຮັບປະກັນ ສະຖຽນລະພາບ ດ້ານເສດຖະກິດມະຫາພາກ, ສາມາດປະຄັບປະຄອງເສດຖະກິດ ບໍ່ໃຫ້ເຂົ້າສູ່ວິກິດການທີ່ຮ້າຍແຮງ ແລະ ຫຼຸດຜ່ອນຜົນກະທົບຕໍ່ຊິວິດການເປັນຢູ່ຂອງປະຊາຊົນ; ຄົ້ນຄ້ວາວິທີການ ແລະ ມາດຕະການ ໃນການຫັນວິກິດ ໃຫ້ເປັນກາລະໂອກາດ ໂດຍສຸມໃສ່ປັບປຸງໂຄງສ້າງທະນາຄານ, ການຈັດຕັ້ງ ແລະ ບຸກຄະລາກອນ, ກົນໄກການເຮັດວຽກ ໃນຂົງເຂດທະນາຄານ ໃຫ້ສອດຄ່ອງຕາມກົດໝາຍ ແລະ ລະບຽບການ;

7) ເອົາໃຈໃສ່ກຳນົດມາດຕະການ ແລະ ເວລາໃນການຈັດຕັ້ງປະຕິບັດ ບັນດາໜ້າວຽກທີ່ມີລັກສະນະ ເຄັ່ງຮ້ອນ ໃຫ້ເປັນວຽກບູລິມະສິດ ແລະ ຈຸດສຸມໃຫ້ເປັນຮູບປະທຳໂດຍໄວ ເປັນຕົ້ນ ການສະໜອງເງິນຕາຕ່າງປະເທດ ໃຫ້ແກ່ການນຳເຂົ້າ ແລະ ສະໜອງນໍ້າມັນເຊື້້ອໄຟ ໃຫ້ພຽງພໍກັບຄວາມຕ້ອງການ ໃນການຮັບໃຊ້ການຜະລິດ, ການຊົມໃຊ້ໃນສັງຄົມ, ຄຸ້ມຄອງລາສິນຄ້າອຸປະໂພກ ແລະ ບໍລິໂພກ ບໍ່ໃຫ້ເໜັງຕີກແຮງ;

8) ໃຫ້ຂະແໜງການ ອຸດສະຫະກໍາ ແລະ ການຄ້າ ສືບຕໍ່ປະສານສົມທົບ ໃນການຕິດຕາມກວດກາ, ຄຸ້ມຄອງລາຄາສິນຄ້າອຸປະໂພກບໍລິໂພກ ທີ່ມີຄວາມອ່ອນໄຫວຕໍ່ຊີວິດການເປັນຢູ່ຂອງປະຊາຊົນ ໃຫ້ມີລາຄາສົມເຫດສົມຜົນ ແລະ ຕອບສະໜອງກັບຄວາມຕ້ອງການຂອງປະຊາຊົນ;

9) ອໍານວຍຄວາມສະດວກ ໃນການສະໜອງທືນສິນເຊື່ອ, ແນວພັນ, ຝຸ່ນ ແລະ ອື່ນໆເພື່ອຮັບປະກັນໃຫ້ແກ່ການຜະລິດກະສິກໍາທັນລະດູການ ພ້ອມທັງກວດກາຄືນ ລະບົບຊົນລະປະທານ ໃຫ້ຮັບປະກັນໄດ້ ການຕ້ານແລ້ງຕ້ານຖ້ວມ ຢ່າງມີປະສິດທິພາບ, ປະສິດທິຜົນ ເພື່ອຕອບສະໜອງສະບຽງອາຫານພາຍໃນແຂວງ ໃຫ້ພຽງພໍ;

10) ເອົາໃຈໃສ່ຊຸກຍູ້, ສົ່ງເສີມເຕັກນິກວິຊາການໃນການປູກ, ການລ້ຽງທັງລະດູແລ້ງ ແລະ ລະດູຝົນ ເພີ່ມສະມັດຕະພາບການຜະລິດຂອງປະຊາຊົນໃຫ້ຫຼາຍຂຶ້ນ, ຊອກແຫຼ່ງທຶນ ແລະ ຕະຫຼາດຈໍາໜ່າຍ ເພື່ອຫຼຸດຕົ້ນທຶນການຜະລິດ ໃຫ້ແກ່ຊາວກະສິກອນສາມາດເພິ່ງຕົນເອງກຸ້ມຕົນເອງ ຫຼື ຜະລິດໃຫ້ໄດ້ຫຼາຍກາຍເປັນສິນຄ້າ, ສົ່ງເສີມການຜະລິດກະສິກໍາສະອາດ ຫັນມາບໍລິໂພກກະສິກໍາພາຍໃນ ໃຫ້ຫຼາຍຂຶ້ນ ເຮັດໃຫ້ປະຊາຊົນມີລາຍໄດ້ເພີ້ມຂຶ້ນ;

11) ສືບຕໍ່ເອົາໃຈໃສ່ຈັດສັນເນື້້ອທີ ທຳການຜະລິດ ໃຫ້ປະຊາຊົນເຂດໄພພິບັດເມືອງສະໜາມໄຊໃຫ້ສຳເລັດໂດຍໄວ, ຫຼີກລຽງຂໍ້ຂັດແຍ່ງລະຫວ່າງປະຊາຊົນດ້ວຍກັນ;

12) ເອົາໃຈໃສ່ຄົ້ນຄ້ວາ ແລະ ກໍານົດມາດຕະການ ດ້ານການປົກປັກຮັກສາສິ່ງແວດລ້ອມ ໃຫ້ມີຄວາມສົມດູນ, ປັບປຸງ ແລະ ຂະຫບາຍຕາງໜ່າງ ສະຖານີອຸຕຸນີຍົມ, ອຸທົກກະສາດ ແລະ ລະບົບເຕືອນໄພຕໍ່ໜ້າ ພ້ອມທັງວາງມາດຕະການຮັບມື, ແກ້ໄຂເພື່ອຫຼຸດຜ່ອນຜົນກະທົບຈາກໄພພິບັດທໍາມະຊາດ (ນໍ້າຖ້ວມ ແລະ ໄພແລ້ງ) ທີ່ເກີດຂື້ນໃນລະດູຝົນ;

13) ສືບຕໍ່ຄົ້ນຄ້ວາ, ກໍານົດນະໂຍບາຍ ແລະ ມາດຕະການ ປັບປຸງແຜນການຮຽນ-ການສອນ ໂດຍສຸມໃສ່ແກ້ໄຂບັນດາຄາດໝາຍທີ່ບໍ່ທັນບັນລຸໃຫ້ມີຄວາມຄືບໜ້າ ແລະ ສາມາດບັນລຸຕາມແຜນການ ແລະ ຮັກສາບັນດາຄາດໝາຍ ທີ່ບັນລຸແລ້ວໃຫ້ມີຄວາມຍືນຍົງ;

14) ສືບຕໍ່ຄົ້ນຄ້ວາ ແລະ ກໍານົດມາດຕະການຕ້ານ ແລະ ສະກັດກັ້ນການແຜ່ລະບາດຂອງພະຍາດ Covid-19, ພະຍາດຕາມລະດູການ ແລະ ສູ້ຊົນຈັດຕັ້ງປະຕິບັດບັນດາຄາດໝາຍດ້ານສາທາລະນະສຸກ ທີ່ບໍ່ບັນລຸໃຫ້ບັນລຸຕາມແຜນການ;

15) ສືບຕໍ່ປະສານສົມທົບກັບພາກສ່ວນທີ່ກ່ຽວຂ້ອງທັງພາຍໃນ ແລະ ຕ່າງປະເທດ ເພື່ອຄຸ້ມຄອງແຮງງານໃຫ້ເຂົ້າສູ່ລະບົບໃນການພັດທະນາສີມືແຮງງານ-ຊອກວຽກເຮັດງານທໍາ. ແນໃສ່ແກ້ໄຂບັນຫາການຫວ່າງງານ, ປະຕິບັດນະໂຍບາຍຕໍ່ຜູ້ທີມີຜົນງານ ຄຸນງານຄວາມດີໃນພາລະກິດປະຕິວັດຊາດປະຊາທິປະໄຕ ໃຫ້ມີຄວາມຍືນຍົງ;

16) ເອົາໃຈໃສ່ປັບປຸງພື້ນຖານໂຄງລ່າງ, ສະຖານທີ່ທ່ອງທ່ຽວ ແລະ ການບໍລິການໃຫ້ໄດ້ມາດຕະຖານ ເພື່ອຮັບປະກັນການເປີດການທ່ອງທ່ຽວສີຂຽວ. ພ້ອມທັງຮັບປະກັນຄວາມປອດໄພໃຫ້ແກ່ນັກທ່ອງທ່ຽວ ແລະ ສູ້ຊົນຈັດຕັ້ງປະຕິບັດບັນດາຄາດໝາຍທີ່ບໍ່ທັນສໍາເລັດໃຫ້ບັນລຸຕາມແຜນການທີ່ວາງໄວ້;

17) ເອົາໃຈໃສ່ ປະເມີນຄວາມຄືບໜ້າ ໃນການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງປະຊາຊົນໃນເຂດຈຸດສຸມ ແລະ ເມືອງເປົ້າໝາຍ ຕິດພັນກັບວຽກງານ 3 ສ້າງໃນການແບ່ງຂັ້ນຄຸ້ມຄອງລະຫວ່າງແຂວງ, ເມືອງ ແລະ ບ້ານໃຫ້ຈະແຈ້ງ;

18) ເອົາໃຈໃສ່ຈັດຕັ້ງປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປ່ວງຊົນຮອບດ້ານ ໃຫ້ເຂັ້ມແຂງກວ່າເກົ່າ ດ້ວຍການເພີ່ມທະວີໂຄສະນາເຜີຍແຜ່ກົດໝາຍໃນຂົງເຂດປ້ອງກັນຊາດ-ປ້ອງກັນຄວາມສະຫງົບໃຫ້ກວ້າງຂວາງ ແລະ ທົ່ວເຖິງ;

19) ສືບຕໍ່ເອົາໃຈໃສ່ ຄຸ້ມຄອງລັດ-ສັງຄົມດ້ວຍກົດໝາຍ ຄຽງຄູ່ກັບການໂຄສະນາເຜີຍແຜ່ກົດໝາຍໃຫ້ກວ້າງຂວາງ.ຊີ້ນໍາບັນດາພະແນກການໃນການອອກນິຕິກໍາໃຕ້ກົດໝາຍ ໃຫ້ສອດຄ່ອງກັບກົດໝາຍ ຕິດພັນກັບການແກ້ໄຂປະກົດການຫຍໍ້ທໍ້ໃນສັງຄົມໃຫ້ໄປຕາມຫຼັກການ, ເດັດຂາດ, ໂປ່ງໃສ ແລະ ເປັນມືອາຊີບ.

(ວິນັດ)