ທ່ານ ຄໍາໃບ ດຳລັດ ກຳມະການສູນກາງພັກ ຮອງປະທານຄະນະປະຈໍາສະພາແຫ່ງຊາດ ທັງເປັນສະມາຊິກສະພາແຫ່ງຊາດຈໍາເຂດເລືອກຕັ້ງທີ 12 ແຂວງຄໍາມ່ວນ ໄດ້ຕາງໜ້າຄະນະປະຈໍາສະພາແຫ່ງຊາດ ມີຄໍາເຫັນຕໍ່ກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງຄໍາມ່ວນ ຊຸດທີ II ໃນວັນທີ 22 ສິງຫາ 2023 ວ່າ: ກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງຄໍາມ່ວນ ຊຸດທີ II ເປັນກອງປະຊຸມທີ່ມີຄວາມໝາຍສໍາຄັນຢ່າງຍິ່ງ ຊຶ່ງໄດ້ໄຂຂຶ້ນໃນທ່າມກາງ ທີ່ທົ່ວພັກ ແລະ ອົງຄະນະພັກຂັ້ນຕ່າງໆ ໄດ້ດຳເນີນກອງປະຊຸມຕີລາຄາການຈັດຕັ້ງປະຕິບັດມະຕິກອງປະຊຸມໃຫ່ຍຄັ້ງທີ XI ກໍຄືມະຕິກອງປະຊຸມໃຫ່ຍຂອງອົງຄະນະພັກແຕ່ລະຂັ້ນໃນໄລຍະ 2 ປີກວ່າຜ່ານມາ (2021-2023), ສະເພາະສະພາແຫ່ງຊາດ ແມ່ນຫາກໍສຳເລັດກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ກາງເດືອນ ກໍລະກົດ ຜ່ານມາບັນດາທ່ານ ອາດຈະໄດ້ຮັບຊາບ ແລະ ຕິດຕາມການອອກຂ່າວແລ້ວວ່າ ໃນລະຫວ່າງວັນທີ 26 ມິຖຸນາ ຫາ 18 ກໍລະກົດ 2023 ສະພາແຫ່ງຊາດ ກໍໄດ້ດຳເນີນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ຊຶ່ງໄດ້ພິຈາລະນາ ແລະ ຮັບຮອງເອົາບັນຫາທີ່ສຳຄັນຂອງຊາດ ທັງໝົດ 22 ບັນຫາ (ໂດຍລວມເນື້ອໃນຕ່າງໆ ກໍແມ່ນຕາມກົດໝາຍກຳນົດ) ແຕ່ອັນພົ້ນເດັ່ນ ກອງປະຊຸມເທື່ອນີ້ ໄດ້ຮັບຟັງການລາຍງານການຈັດຕັ້ງປະຕິບັດວຽກງານຂອງລັດຖະບານ ໄລຍະ 6 ເດືອນຕົ້ນປີເຫັນວ່າ ລັດຖະບານ ໄດ້ມີຄວາມຕັ້ງໜ້າຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາ ດ້ວຍຄວາມຮັບຜິດຊອບສູງ ແລະ ມີຜົນສຳເລັດດີ ເຮັດໃຫ້ເສດຖະກິດຂະຫຍາຍຕົວ ໃນລະດັບ 4,8%, ເອົາໃຈໃສ່ຊຸກຍູ້ການຜະລິດ ເພື່ອສົ່ງເສີມພາຍໃນ ແລະສົ່ງອອກ ໄດ້ມີໜໍ່ແໜງໃໝ່ ຈຳນວນໜຶ່ງ, ການເກັບລາຍຮັບເພີ່ມຂຶ້ນ, ການປະຕິບັດຄາດໝາຍຕ່າງໆ ກໍມີຄວາມຄືບໜ້າ. ແຕ່ກອງປະຊຸມກໍມີຄວາມເປັນຫ່ວງ ເຊັ່ນ: ບັນຫາເງິນເຟີ້, ອັດຕາແລກປ່ຽນເໜັງຕິງແຮງ, ຄ່າຄອງຊີບສູງຂຶ້ນ ສົ່ງຜົນກະທົບຕໍ່ຊີວິດການເປັນຢູ່ຂອງພະນັກງານ, ທະຫານ, ຕຳຫຼວດ ກໍຄືປະຊາຊົນບັນດາເຜົ່າ, ການຈັດສັນການລົງທຶນຂອງລັດຈໍານວນໜຶ່ງຍັງຊັກຊ້າ, ບັນຫາຄູ ແລະ ແພດອາສາສະໝັກ, ຄຸນນະພາບການສຶກສາ, ສາທາລະນະສຸກ, ບັນຫາປະກັນສັງຄົມ-ປະກັນສຸຂະພາບ, ສະຫວັດດີການສັງຄົມ, ແຮງງານ, ການຂຸດຄົ້ນແຮ່ທາດແບບທົດລອງ, ວິໄນການເງິນ ລວມທັງການຈັດຕັ້ງປະຕິບັດ 2 ວາລະແຫ່ງຊາດ ທີ່ຍັງບໍ່ທັນຮັບປະກັນ 3 ຫຼັກການ: “ເຂັ້ມງວດ, ໂປ່ງໃສ ແລະ ມືອາຊີບ”.ຜົນສຳເລັດກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ແມ່ນໝາກຜົນແຫ່ງການລວມສູນສະຕິປັນຍາ, ສິດປະຊາທິປະໄຕ ກໍຄືການຍົກສູງຄວາມຮັບຜິດຊອບທາງດ້ານການເມືອງ ຂອງບັນດາທ່ານ ສະມາຊິກສະພາແຫ່ງຊາດ, ການຕັດສິນໃຈສູງຂອງລັດຖະບານ ແລະ ອົງການທີ່ກ່ຽວຂ້ອງ ໃນການແກ້ໄຂຄວາມຫຍຸ້ງຍາກຕ່າງໆ ໃຫ້ຕົກໄປເທື່ອລະກ້າວ ເພື່ອພັດທະນາປະເທດຊາດ ໃຫ້ມີຄວາມເຂັ້ມແຂງໜັກແໜ້ນຂຶ້ນ.

ສຳລັບທິດທາງວຽກງານຈຸດສຸມ ຂອງສະພາແຫ່ງຊາດ 6 ເດືອນທ້າຍປີ2023 ຈະສຸມໃສ່ມີດັ່ງນີ້:

1) ສືບຕໍ່ຮຽບຮຽງເນື້ອໃນກົດໝາຍ ຈໍານວນ 10 ສະບັບ ທີ່ໄດ້ຖືກຮັບຮອງແລ້ວນີ້ ເພື່ອສາມາດປະກາດໃຊ້ ໂດຍປະທານປະເທດ ຕາມການກໍານົດຂອງກົດໝາຍ; ກະກຽມຮ່າງກົດໝາຍ ຈໍານວນ 12 ສະບັບ ແຕ່ຫົວທີ. ໃນນີ້, ກົດໝາຍສ້າງໃໝ່ 3 ສະບັບ, ກົດໝາຍປັບປຸງ 9 ສະບັບ ເພື່ອນໍາເຂົ້າພິຈາລະນາ ແລະ ຮັບຮອງເອົາຢູ່ໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ໃຫ້ບັນລຸຕາມແຜນການທີ່ວາງໄວ້;

2) ເອົາໃຈໃສ່ປະສານກັບພາກສ່ວນກ່ຽວຂ້ອງແຕ່ຫົວທີ ເພື່ອກະກຽມເນື້ອໃນຕ່າງໆ ເຂົ້າພິຈາລະນາໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ມີຄຸນະພາບ ແລະ ທັນເວລາ ຊຶ່ງຕາມແຜນຂອງສະພາແຫ່ງຊາດ ຈະໄດ້ຮັບຟັງລາຍງານກາງສະໄໝ ຂອງແຜນການ 5 ປີ (2021-2025) ຂອງລັດຖະບານ, ສານປະຊາຊົນສູງສຸດ, ອົງການໄອຍະການປະຊາຊົນສູງສຸດ ແລະ ອື່ນໆ. ນອກນັ້ນ, ແມ່ນເນື້ອໃນຕາມກົດໝາຍກຳນົດ;

3) ຕິດຕາມກວດກາ ວຽກງານຕ່າງໆ ຕາມພາລະບົດບາດຂອງສະພາແຫ່ງຊາດ ເປັນຕົ້ນແມ່ນ ບັນດາມະຕິກອງປະຊຸມສະໄໝສາມັນ ແຕ່ລະເທື່ອ ຂອງສະພາແຫ່ງຊາດ ຊຸດທີ IX; ການປະຕິບັດ 2 ວາລະແຫ່ງຊາດ, ບັນດາໂຄງການລົງທຶນຂະໜາດໃຫຍ່ ແລະ ໂຄງການຕ່າງໆ ທີ່ເຫັນວ່າມີຄວາມຫຍຸ້ງຍາກ, ສັບສົນ ຫຼື ມີຜົນກະທົບຢ່າງຫຼວງຫຼາຍ ຕໍ່ສັງຄົມ ແລະ ສິ່ງແວດລ້ອມ ໂດຍສະເພາະ ຕໍ່ການດໍາລົງຊີວິດຂອງປະຊາຊົນລາວບັນດາເຜົ່າ, ພ້ອມນັ້ນ ໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ກໍຈະໄດ້ປະເມີນຄວາມໄວ້ວາງໃຈຕໍ່ບຸກຄະລາກອນ ທີ່ສະພາແຫ່ງຊາດ ເລືອກຕັ້ງ ແລະ ຮັບຮອງເອົາການແຕ່ງຕັ້ງ;

4) ສືບຕໍ່ຄົ້ນຄວ້າປັບປຸງແບບແຜນວິທີເຮັດວຽກ, ການປະສານງານ ລະຫວ່າງ ກົງຈັກຂອງສະພາແຫ່ງຊາດ ກັບຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ສະພາປະຊາຊົນຂັ້ນແຂວງ ແນໃສ່ເຮັດໃຫ້ການເຄື່ອນໄຫວວຽກງານມີປະສິດທິພາບ ປະສິດທິຜົນ;

5) ກະກຽມ ແລະ ດຳເນີນກອງປະຊຸມໄລຍະກາງສະໄໝ 2021-2023 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II ເພື່ອຕີລາຄາການເຄື່ອນໄຫວວຽກງານ ແຕ່ກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II ເປັນຕົ້ນມາ ແລະ ກຳນົດທິດທາງແຜນແຕ່ນີ້ ຮອດກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ X ແລະ ສະພາປະຊາຊົນຂັ້ນແຂວງ ຊຸດທີ III.

ວັນທີ 22 ສິງຫາ 2023 ທີ່ສະໂມສອນ 21 ມີນາ ຂອງແຂວງ (ຫຼັກ 4) , ໂດຍການເປັນປະທານຂອງທ່ານ ບຸນມີ ພິມມະສອນ ປະທານສະພາປະຊາຊົນແຂວງຄໍາມ່ວນ, ເປັນກຽດເຂົ້າຮ່ວມມີ ທ່ານ ວັນໄຊ ພອງສະຫັວນ ເຈົ້າແຂວງໆຄໍາມ່ວນ; ມີບັນດາຄະນະປະຈຳພັກແຂວງ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 12 ແຂວງຄໍາມ່ວນ, ສະມາຊິກສະພາປະຊາຊົນຂັ້ນແຂວງ, ຫົວໜ້າພະແນກການ, ເຈົ້າເມືອງ, ມີບັນດາທ່ານ ອາດີດການນໍາຂັ້ນສູງຂອງແຂວງ ແລະ ແຂກຖືກເຊີນ.

ກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງຄໍາມ່ວນ ຊຸດທີ II ຈະດໍາເນີນໄປຈົນຮອດວັນທີ 26 ສິງຫາ 2023 ຈຶ່ງຈະສໍາເລັດ. ທ່ານສາມາດສົ່ງຄໍາຄິດຄໍາເຫັນ ກ່ຽວກັບການດໍາເນີນກອງປະຊຸມ ຜ່ານໂທລະສັບສາຍດ່ວນ 051 156 (ໂດຍບໍ່ເສຍຄ່າ)

ໂດຍ: ເອື້ອ ມະໂນສິງ