(ສພຊ) – ວັນທີ 12 ພະຈິກຜ່ານມາ ທີ່ສະພາແຫ່ງຊາດ ໄດ້ມີກອງປະຊຸມຮ່ວມລະຫວ່າງຄະນະປະຈໍາສະພາແຫ່ງຊາດ ກັບອົງການກວດສອບແຫ່ງລັດ ແລະ ອົງການກວດກາແຫ່ງລັດ ໂດຍການເປັນປະທານຂອງທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານຄະນະປະຈໍາສະພາແຫ່ງຊາດ, ມີປະທານອົງການກວດສອບແຫ່ງລັດ, ຮອງປະທານອົງການກວດກາແຫ່ງລັດ, ຕາງໜ້າກະຊວງແຜນການ ແລະ ການລົງທຶນ, ກະຊວງການເງິນ ແລະ ທະນາຄານ ແຫ່ງ ສປປລາວ ພ້ອມດ້ວຍແຂກຖືກເຊີນ ເຂົ້າຮ່ວມຢ່າງພ້ອມພຽງ.

ຈຸດປະສົງ ແມ່ນເພື່ອປຶກສາຫາລື ແລະ ຮ່ວມກັນຊອກຫາວິທີແກ້ໄຂບັນຫາເຄັ່ງຮ້ອນຮີບດ່ວນທີ່ເກີດຂຶ້ນໃນສັງຄົມ ແລະ ສົ່ງຜົນກະທົບຕໍ່ການສ້າງສາພັດທະນາເສດຖະກິດ-ສັງຄົມ, ຊີວິດການເປັນຢູ່ຂອງປະຊາຊົນ ທັງເປັນການຕິດຕາມກວດກາການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ ຂອງບັນດາອົງການລັດຂັ້ນຕ່າງ; ເພື່ອສ້າງຄວາມເປັນເອກະພາບລະຫວ່າງຄະນະປະຈຳສະພາແຫ່ງຊາດ ກັບ ອົງການກວດສອບແຫ່ງລັດ ແລະ ອົງການກວດກາແຫ່ງລັດ ໃນການແກ້ໄຂບັນຫາຕ່າງໆໃຫ້ສອດຄ່ອງກັບແນວທາງນະໂຍບາຍ, ລັດຖະທຳມະນູນ ແລະ ກົດໝາຍ.

ກອງປະຊຸມໄດ້ຮັບຟັງການລາຍງານສະພາບພົ້ນເດັ່ນໃນການຈັດຕັ້ງປະຕິບັດແຜນການເຄື່ອນໄຫວວຽກງານກວດສອບແຫ່ງລັດ ປະຈໍາປີ 2024 ແລະ ທິດທາງແຜນການປີ 2025; ການເປັນເຈົ້າການປະສານສົມທົບ ແລະ ຊຸກຍູ້ເປົ້າໝາຍກວດສອບ, ອົງການຄຸ້ມຄອງເປົ້າໝາຍກວດສອບ ແລະ ພາກສ່ວນທີ່ກ່ຽວຂ້ອງ ແກ້ໄຂຜົນການກວດສອບໃນໄລຍະຜ່ານມາ ທັງໄຈ້ແຍກໃຫ້ເຫັນອັນໃດທີ່ສາມາດແກ້ໄຂໄດ້, ອັນໃດເປັນໜີ້ທວງຍາກ ແລະ ອັນໃດທີ່ບໍ່ສາມາດແກ້ໄຂໄດ້ ຫຼື ບໍ່ມີຕົວຕົນ ໃຫ້ລະອຽດ ແລ້ວນຳສະເໜີຄະນະປະຈຳສະພາແຫ່ງຊາດພິຈາລະນາ; ການຕິດຕາມ ແລະ ຊຸກຍູ້ເປົ້າໝາຍທີ່ຖືກກວດສອບ, ອົງການຄຸ້ມຄອງເປົ້າໝາຍກວດສອບ ແກ້ໄຂຜົນການກວດສອບໃຫ້ເຂັ້ມງວດ ແລະ ເດັດຂາດ ຕາມມາດຕາ 40 ຂອງກົດໝາຍວ່າດ້ວຍການກວດສອບແຫ່ງລັດ. ການລາຍງານສະພາບພົ້ນເດັ່ນໃນການຈັດຕັ້ງປະຕິບັດແຜນການເຄື່ອນໄຫວວຽກງານກວດກາລັດ ປະຈຳປີ 2024 ແລະ ທິດທາງແຜນການປີ 2025; ການເປັນເຈົ້າການ ແລະ ປະສານສົມທົບກັບອົງການຄຸ້ມຄອງເປົ້າໝາຍທີ່ຖືກກວດກາ ແລະ ພາກສ່ວນທີ່ກ່ຽວຂ້ອງ ແກ້ໄຂຜົນການກວດກາໃນໄລຍະຜ່ານມາ ພ້ອມທັງໄຈ້ແຍກຜົນຂອງການກວດກາ ອັນໃດສາມາດແກ້ໄຂໄດ້, ອັນໃດບໍ່ສາມາດແກ້ໄຂໄດ້ ຫຼື ບໍ່ມີຕົວຕົນ ໃຫ້ລະອຽດ ແລ້ວນໍາສະເໜີຄະນະປະຈຳສະພາແຫ່ງຊາດພິຈາລະນາ. ຈາກນັ້ນ, ຜູ້ເຂົ້າຮ່ວມໄດ້ພ້ອມກັນຄົ້ນຄວ້າ, ປະກອບຄໍາເຫັນ, ພິຈາລະນາດ້ວຍເຫດດ້ວຍຜົນ ເພື່ອສ້າງຄວາມເປັນເອກະພາບກ່ຽວກັບວິທີການແກ້ໄຂວຽກງານໃນຕໍ່ໜ້າ ໃຫ້ມີບາດກ້າວຫັນປ່ຽນທີ່ດີຂຶ້ນ.

(ນາງ ອາລິນ ສຸພິມມະປະດິດ)