ໃນຕອນເຊົ້າ ວັນທີ 22 ມັງກອນ 2025 ທ່ານ ພູທອນ ພຸດທະຂັນຕິ ຄະນະປະຈໍາສະພາປະຊາຊົນແຂວງ, ເລຂາທິການສະພາປະຊາຊົນແຂວງ ຮ່ວມກັບ ສະມາຊິກສະພາປະຊົນແຂວງ ປະຈຳເຂດເລືອກຕັ້ງເມືອງອາດສະພອນ ລົງມອບເຄື່ອງຊ່ວຍເຫຼືອບັນເທົາທຸກໃຫ້ ຄອບຄົວພໍ່ ເຈີ້ຍ ບ້ານນາເລົ່າ, ເມືອງອາດສະພອນ ແຂວງສະຫວັນນະເຂດ ທີ່ເກີດຜົນກະທົບຈາກອັກຄີໄພ (ໄຟໄໝ້ເຮືອນ) ສາເຫດມາຈາກກະແສໄຟຟ້າລັດວົງຈອນ, ຊຶ່ງເຫດການດັ່ງກ່າວໄດ້ເກີດຂຶ້ນໃນ ຕອນເຊົ້າວັນທີ 06 ມັງກອນ 2025 ເວລາ 11 ໂມງ 30 ນາທີ ຜ່ານມາ ເຮັດໃຫ້ເຮືອນ ແລະ ເຄື່ອງຕ່າງໆຢູ່ໃນເຮືອນຖືກໄໝ້ຈົນໝົດ, ແຕ່ບໍ່ມີຜູ້ໄດ້ຮັບບາດເຈັບ ແລະ ເສຍຊີວິດ ລວມມູນຄ່າເສຍຫາຍ 200,000,000 ກວ່າລ້ານກີບ.

ໂອກາດດັ່ງກ່າວ ທ່ານ ພູທອນ ພຸດທະຂັນຕິ ພ້ອມຄະນະ ກໍໄດ້ສະແດງຄວາມເປັນຫ່ວງເປັນໃຍ ໃຫ້ກໍາລັງໃຈ ແລະ ມອບເງິນສົດ ຈໍານວນ 5,000,000 ກີບ (ຫ້າລ້ານກີບ) ພ້ອມທັງຄະນະສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງອາດສະພອນ ກໍ່ໄດ້ມອບເງິນຕື່ມອີກ 500,000 ກີບ ແລະ ຜ້າຫົ່ມ, ໝອນ, ສາດ ມອບໃຫ້ແກ່ຄອບຄົວພໍ່ ເຈີ້ຍ ເພື່ອເປັນການຊ່ວຍເຫຼືອແບ່ງເບົາບັນເທົາທຸກ ແລະ ຮຽກຮ້ອງມາຍັງອໍານາດການປົກຄອງ, ພໍ່ແມ່ປະຊາຊົນ ຈົ່ງມີສະຕິ ລະມັດລະວັງ ການນຳໃຊ້ວັດສະຖຸ, ອຸປະກອນເຄື່ອງໄຟຟ້າຕ່າງໆ ໃນການຮັບໃຊ້ຊີວິດປະຈຳວັນ ເພື່ອບໍ່ໃຫ້ເຫດການດັ່ງກ່າວເກີດຂຶ້ນໃນຕໍ່ໜ້າ.