ຕອນເຊົ້າຂອງວັນທີ 25 ກໍລະກົດ 2024 ທີ່ສະໂມສອນ 21 ມີນາ ແຂວງຄໍາມ່ວນ ໂດຍການເປັນປະທານກອງປະຊຸມຂອງທ່ານ ນາງ ບັງອອນ ໄຊຍະສິດ ຮອງປະທານສະພາປະຊາຊົນແຂວງຄໍາມ່ວນ, ເຂົ້າຮ່ວມມີບັນດາທ່ານຄະນະປະທານ, ທ່ານ ເຈົ້າແຂວງຄໍາມ່ວນ, ຄະນະປະຈໍາພັກແຂວງ, ຮອງເຈົ້າແຂວງ, ພ້ອມດ້ວຍ, ບັນດາທ່ານສະມາຊິກສະພາປະຊາຊົນແຂວງຄໍາມ່ວນ ຈາກ 10 ເມືອງ, ບັນດາທ່ານພະແນກການທີ່ກ່ຽວຂ້ອງ ແລະ ແຂກຖືກເຊີນເຂົ້າຮ່ວມ.

ໃນວາລະຂອງການດຳເນີນກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງຄໍາມ່ວນຊຸດທີ II, ທ່ານ ນາງ ສາທິດ ຈັນສີ ກຳມະການຄະນະປະຈໍາສະພາປະຊາຊົນແຂວງ ປະທານຄະນະກຳມະການເສດຖະກິດ, ແຜນການ ແລະ ການເງິນ ສະພາປະຊາຊົນແຂວງຄໍາມ່ວນ ໄດ້ຕາງໜ້າໃຫ້ຄະນະປະຈໍາສະພາປະຊາຊົນແຂວງຄໍາມ່ວນ ຂຶ້ນມີຄຳເຫັນ ຕໍ່ບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດບັນດາຄາດໝາຍຂອງວຽກງານພັດທະນາຊົນນະບົດ ແລະແກ້ໄຂຄວາມທຸກຍາກ 2021-2023, ປະຈໍາ 6 ເດືອນຕົ້ນປີ 2024 ແລະ ທິດທາງແຜນການ 6 ເດືອນທ້າຍປີ 2024 ວ່າ: ຄະນະປະຈໍາສະພາປະຊາຊົນແຂວງຄໍາມ່ວນ ສະເໜີອົງການປົກຄອງແຂວງ ເອົາໃຈໃສ່ຕໍ່ແຜນການພັດທະນາຊົນນະບົດ ແລະ ແກ້ໄຂຄວາມທຸກຍາກດັ່ງນີ້:

1). ກວດກາ ແລະ ປັບປຸງຄືນ ການແຕ່ງຕັ້ງຄະນະຮັບຜິດຊອບ ແລະກົງຈັກເສນາທິການຊ່ວຍວຽກຂອງວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຂັ້ນແຂວງ, ຂັ້ນເມືອງໃຫ້ເປັນລະບົບຄົບຊຸດຕາມບົດແນະນຳສະບັບ ເລກທີ 02 /ຫສພ ລົງວັນທີ 21 ກຸມພາ 2023 ແລະ ແຈ້ງການ ຂອງຫ້ອງວ່າການສູນກາງພັກ ເລກທີ 106/ຫສພ ລົງວັນທີ 9 / 3 / 2023 ເພື່ອຍົກສູງປະສິດທິພາບ ແລະປະສິດທິຜົນການເຄື່ອນໄຫວວຽກງານ ຄວບຄູ່ໄປກັບການປັບປຸງກົນໄກການປະສານງານ ເພື່ອເອກະພາບດ້ານຄາດໝາຍ ຂອງສະພາປະຊາຊົນຂັ້ນແຂວງ ທີ່ໄດ້ຮັບຮອງ, ການຈັດສັນງົບປະມານ ວິທີການຈັດຕັ້ງປະຕິບັດໃຫ້ໄປລວງດຽວກັນ ລວມສູນຢ່າງມີຈຸດສຸມແທ້ ແລະການນຳພາ-ຊີ້ນຳວຽກງານກໍ່ສ້າງຮາກຖານການເມືອງ, ວຽກພັດທະນາຊົນນະບົດ ແລະ ວຽກງານ 3 ສ້າງ ໄປພ້ອມໆກັນ ແລະ ມີຄວາມເປັນເອກະພາບກັນ;

2). ຕ້ອງຈັດສັນງົບປະມານ ແລະ ລາຍຮັບເກີນແຜນ ສະເພາະ ໃຫ້ວຽກງານພັດທະນາຊົນນະບົດ ແລະແກ້ໄຂຄວາມທຸກຍາກ ໃຫ້ແຕ່ລະຂະແໜງການ, ເອົາໃຈໃສ່ຕິດຕາມກວດກາການນຳໃຊ້ງົບປະມານການຊ່ວຍເຫຼືອລ້າ, ກອງທຶນຕ່າງໆ ເພື່ອໃຫ້ງົບປະມານພຽງພໍ ແລະມີຈຸດສູມ ຮັບປະກັນ ມາດຖານຂອງຂະແໜງການ ທີ່ບໍ່ບັນລຸຕາມແຜນການ ເປັນຕົ້ນ: ເສັ້ນທາງຄົມມະນາຄົມທີ່ບໍ່ສາມາດທຽວໄດ້ສອງລະດູ, ພື້ນຖານໂຄງລ່າງທີ່ຈຳເປັນໃຫ້ແກ່ການຜະລິດສະບຽງອາຫານ ແລະຜະລິດເປັນສິນຄ້າ, ນຳໃຊ້, ອາສາສະມັກ ແພດ-ໝໍ, ວິຊາການ ນຳພາການຜະລິດ, ເພື່ອຈັດຕັ້ງປະຕິບັດ ບັນດາຄາດໝາຍພັດທະນາຊົນນະບົດແລະ ແກ້ໄຂຄວາມທຸກຍາກໃຫ້ບັນລຸຢ່າງມີຈຸດສຸມ ແລະ ສຳເລັດຕາມຄາດໝາຍ;

3).ສ້າງທຸກເງື່ອນໄຂໃຫ້ປະຊາຊົນສາມາດ ເຂົ້າເຖິງສິນເຊື່ອ ໄດ້ສະດວກ, ວ່ອງໄວ ທັງໃຫ້ຄວາມຮູ້ກ່ຽວກັບການຕະຫຼາດ ເພື່ອສົ່ງເສີມການຜະລິດເປັນສິນຄ້າຂອງປະຊາຊົນ ສົ່ງເສີມແລະ ຍູ້ແຮງ ຂະບວນການຜະລິດເປັນສິນຄ້າ ເພື່ອແກ້ໄຂຄວາມທູກຍາກ ຂອງປະຊາຊົນ ຢ່າງມີຈຸດສຸມ ຮັບປະກັນຄວາມຍືນຍົງ ດ້ວຍການປຸກລະດົມການມີສ່ວນຮ່ວມຂອງປະຊາຊົນ ຈັດຕັ້ງກຸ່ມການຜະລິດ ແລະ ການບໍລິການດ້ວຍການ ລົງທຶນຂອງລັດ ແລະ ເອກະຊົນ ເພື່ອສຸມໃສ່ການປຸງແຕ່ງຢູ່ຊົນນະບົດໃຫ້ເປັນຮູບປະທຳຫລາຍຂື້ນ;

4). ແຍກບົດລາຍງານຜົນການຈັດຕັ້ງປະຕິບັດວຽກງານພັດທະນາຊົນນະບົດ ແລະແກ້ໄຂຄວາມທຸກຍາກ ອອກຈາກບົດລາຍງານ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ແລ້ວລາຍງານຕໍ່ກອງປະຊຸມ ຂອງສະພາປະຊາຊົນແຂວງ ແຕ່ລະສະໄໝ;

5). ຕໍ່ກັບ ມາດຕະການໃນການຈັດຕັ້ງປະຕິບັດ ໂດຍສະເພາະ ດ້ານນະໂຍບາຍ, ດ້ານກົນໄກ, ດ້ານງົບປະມານ ແລະດ້ານບຸກຄະລາກອນ ຕ້ອງໄດ້ສ້າງກົນໄກປະສານງານລະຫວ່າງອົງການປົກຄອງແຂວງ ກັບ ສະພາປະຊາຊົນຂັ້ນແຂວງ ແລະ ບັນດາທ່ານ ສະມາຊິກສະພາປະຊາຊົນແຂວງ ເພື່ອໃຫ້ໄດ້ເຄື່ອນໄຫວຕາມສິດ ແລະ ໜ້າທີ່ ໃນການຕິດຕາມກວດກາ ການຈັດຕັ້ງປະຕິບັດບັນດາຄາດໝາຍ ຂອງວຽກງານພັດທະນາຊົນນະບົດ ແລະແກ້ໄຂຄວາມທຸກຍາກ ຕາມມະຕິຂອງສະພາປະຊາຊົນແຂວງ ຄຳມ່ວນ ໃນແຕ່ລະຄັ້ງທີ່ໄດ້ຮັບຮອງ ໃຫ້ບັນລຸຕາມຄາດໝາຍທີ່ວາງໄວ້.

ໂດຍ: ເອື້ອ ມະໂນສິງ