ທ່ານ ຄໍາສຸກ ວັນທະວົງສາ ຕາງໜ້າຄະນະປະຈໍາສະພາປະຊາຊົນແຂວງຄໍາມ່ວນ

ໃນວັນທີ 23 ສິງຫາ 2023 ທີ່ສະໂມສອນ 21 ມີນາ ຫຼັກ 4 ຂອງແຂວງຄໍາມ່ວນ ໂດຍການເປັນປະທານຂອງ ທ່ານ ບົວພັນ ແສງຈັນ ຮອງປະທານສະພາປະຊາຊົນແຂວງຄໍາມ່ວນ, ທ່ານ ຄໍາສຸກ ວັນທະວົງສາ ຕາງໜ້າຄະນະປະຈໍາສະພາປະຊາຊົນແຂວງຄໍາມ່ວນ ໄດ້ປະກອບຄໍາເຫັນຕໍ່ບົດລາຍງານ ຂອງ ສານປະຊາຊົນແຂວງ ແລະ ອົງການໄອຍະການປະຊາຊົນແຂວງ ໃນການຈັດຕັ້ງປະຕິບັດວຽກງານກົດໝາຍຂົງເຂດຍຸຕິທຳ ຢູ່ກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງຄໍາມ່ວນ ຊຸດທີ II ເຊິ່ງໃຫ້ຮູ້ວ່າ: ຄະນະປະຈໍາສະພາປະຊາຊົນແຂວງ ເຫັນດີໂດຍພື້ນຖານ ຕໍ່ເນື້ອໃນບົດລາຍງານຂອງ ສານປະຊາຊົນແຂວງ ແລະ ອົງການໄອຍະການປະຊາຊົນແຂວງ ກ່ຽວກັບການຈັດຕັ້ງປະຕິບັດວຽກງານໃນການປົກປ້ອງ ສິດ ແລະ ຜົນປະໂຫຍດອັນຊອບທຳຂອງລັດ, ລວມໝູ່ ແລະ ພົນລະເມືອງ. ບັນດາອົງການ ແລະ ພາກສ່ວນທີ່ດຳເນີນຄະດີຢູ່ໃນແຂວງ ໄດ້ຮັບການສ້າງຕັ້ງຂຶ້ນຢ່າງເປັນລະບົບ ແລະ ໄດ້ຮັບການປັບປຸງໄປຄຽງຄູ່ກັບການກໍານົດພາລະບົດບາດ, ໜ້າທີ່ ແລະ ຂອບເຂດສິດອໍານາດຂອງແຕ່ລະອົງການ ໃນແຕ່ລະໄລຍະ ຢ່າງລະອຽດ, ຈະແຈ້ງ ເຮັດໃຫ້ບັນດາອົງການເຫຼົ່ານັ້ນ ມີການເຕີບໃຫຍ່, ໜັກແໜ້ນ ແລະ ເຂັ້ມແຂງ ເປັນກ້າວໆ ສາມາດເຄື່ອນໄຫວປະຕິບັດໜ້າທີ່ແກ້ໄຂຂໍ້ຂັດແຍ່ງຕ່າງໆໃນສັງຄົມໄດ້ເປັນຢ່າງດີ, ປະກອບສ່ວນສໍາຄັນເຂົ້າໃນການປົກປັກຮັກສາ ແລະ ສ້າງສາປະເທດຊາດ ກໍຄືການຍົກສູງຄຸນນະພາບໃນການຄຸ້ມຄອງລັດ ຄຸ້ມຄອງສັງຄົມດ້ວຍກົດໝາຍ ໃຫ້ມີຄວາມເຂັ້ມງວດ, ມີຄວາມຍຸຕິທໍາ ແລະ ສັກສິດ ເປັນກ້າວໆມາ.

ຈາກນັ້ນ, ປະທານກອງປະຊຸມ ໄດ້ມີຄໍາເຈາະຈີ້ມ ແລະ ໃຫ້ທິດຊີ້ນຳໃນການຄົ້ນຄວ້າປະກອບຄໍາເຫັນ, ຫຼັງຈາກນັ້ນ, ບັນດາ ທ່ານ ສະມາຊິກສະພາປະຊາຊົນແຂວງ ໄດ້ປະກອບຄໍາເຫັນຕໍ່ 2 ບົດ ລາຍງານ ຢ່າງກົງໄປກົງມາ ແລະ ມີເຫດມີຜົນ.