ເພື່ອຮັບປະກັນໃຫ້ແກ່ການຈັດຕັ້ງປະຕິບັດຄາດໝາຍທິດທາງແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ ປະຈໍາປີ 2025 ຕິດພັນກັບວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ, ທ່ານ ສົມມາດ ພົລເສນາ ຮອງປະທານສະພາແຫ່ງຊາດ ຕາງໜ້າໃຫ້ຄະນະປະຈຳສະພາແຫ່ງຊາດ ສະເໜີໃຫ້ລັດຖະບານເອົາໃຈໃສ່ບາງມາດຕະການເພີ່ມຕື່ມດັ່ງນີ້:

1. ເພີ່ມທະວີຄວາມເອົາໃຈໃສ່ຜັນຂະຫຍາຍມະຕິກົມການເມືອງສູນກາງພັກ ສະບັບເລກທີ 04/ກມສພ, ລົງວັນທີ 11 ເມສາ 2024 ວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່ ເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ ໂດຍສຸມໃສ່ຂົງເຂດບຸລິມະສິດຂອງການພັດທະນາຊົນນະບົດ ແລະ ແກ້ໄຂຄວາມທຸກຍາກ.

2. ສຸມໃສ່ປະຕິບັດຄາດໝາຍຂອງແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ, ແຜນເງິນຕາ ແລະ ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ສໍາລັບປີ 2025 ໃຫ້ເປັນບຸລິມະສິດ, ສອດຄ່ອງ, ກົມກຽວ ແລະ ບັນລຸຕາມແຜນການ; ຈັດຕັ້ງປະຕິບັດບັນດາມາດຕະການ ທີ່ໄດ້ກໍານົດໄວ້ຢ່າງເຂັ້ມງວດ, ໃນນັ້ນ ສະເໜີໃຫ້ສຸມໃສ່ແກ້ໄຂບັນຫາທີ່ເຄັ່ງຮ້ອນດ້ານເສດຖະກິດ-ສັງຄົມ ທີ່ຍັງຄົງຄ້າງ ແລະ ມີຄວາມຄືບໜ້າໜ້ອຍໃນປີຜ່ານມາ ແລະ ໃນປັດຈຸບັນ ເປັນຕົ້ນ:

1) ສືບຕໍ່ແກ້ໄຂບັນຫາເງິນເຟີ້, ບັນຫາໜີ້ສິນ, ການແກ້ໄຂຜົນກະທົບຈາກໄພນໍ້າຖ້ວມ ແລະ ຄຸ້ມຄອງລາຄາສິນຄ້າທີ່ຈໍາເປັນ ໃຫ້ມີສະຖຽນລະພາບ ແລະ ສົມເຫດສົມຜົນ ເປັນຕົ້ນອາຫານ, ນໍ້າມັນເຊື້ອໄຟ, ເຄື່ອງອຸປະໂພກ-ບໍລິໂພກ ທີ່ກະທົບຕໍ່ຊີວິດການເປັນຢູ່ຂອງປະຊາຊົນບັນດາເຜົ່າ, ພະນັກງານ-ລັດຖະກອນ, ທະຫານ-ຕໍາຫຼວດ ແລະ ເອົາໃຈໃສ່ສືບຕໍ່ຈັດຕັ້ງປະຕິບັດມາດຕະການໃຫ້ເປັນລະບົບຄົບຊຸດ ເຂັ້ມງວດ ຢ່າງແຂງແຮງ ຕິດພັນກັບທຸກຂະແໜງການ ຄື: (1) ມາດຕະການທາງດ້ານເງິນຕາ ລວມທັງມາດຕະການຕໍ່ອັດຕາແລກປ່ຽນ, (2) ມາດຕະການດ້ານການເງິນ-ງົບປະມານ, (3) ມາດຕະການດ້ານການຜະລິດ, (4) ມາດຕະການດ້ານການຄ້າ,​ (5) ມາດຕະການດ້ານຈິດຕະສາດ-ສັງຄົມ.

2) ແກ້ໄຂບັນຫາເຄັ່ງຮ້ອນດ້ານສັງຄົມ ແລະ ເອົາໃຈໃສ່ຈັດຕັ້ງປະຕິບັດບັນດາຄາດໝາຍທີ່ມີຄວາມສ່ຽງບໍ່ທັນບັນລຸ ໂດຍສຸມໃສ່: (1) ສ້າງ ແລະ ປັບປຸງກົດໝາຍ ແລະ ນິຕິກຳໃຕ້ກົດໝາຍ ໃຫ້ເປັນລະບົບຄົບຊຸດ; (2) ຍົກສູງຄຸນນະພາບຂອງການສຶກສາ, ສາທາລະນະສຸກ ແລະ ແຮງງານ, ປະເມີນຄືນ ແລະ ປັບປຸງຫຼັກສູດຕໍາລາການຮຽນ-ການສອນ ເພື່ອໃຫ້ແທດເໝາະກັບສະພາບຄວາມເປັນຈິງຂອງເສດຖະກິດ-ສັງຄົມໃນປັດຈຸບັນ, ເອົາໃຈໃສ່ແກ້ໄຂຊີວິດການເປັນຢູ່ຂອງພະນັກງານ-ລັດຖະກອນ ເພື່ອຫຼຸດຜ່ອນຄວາມເລື່ອມລໍ້າໃນສັງຄົມ; (3) ເອົາໃຈໃສ່ເຝິກ ແລະ ສ້າງວິຊາຊີບໃຫ້ມີຄວາມຫຼາກຫຼາຍ, ຍົກລະດັບສີມືແຮງງານໃຫ້ມີຄວາມຊໍານານງານ, ມີລະບຽບວິໄນ ສາມາດຕອບສະໜອງຄວາມຕ້ອງການຂອງຫົວໜ່ວຍແຮງງານ; (4) ປຸກລະດົມການມີສ່ວນຮ່ວມຂອງສັງຄົມໃນການຊຸກຍູ້ການປະກອບສ່ວນສະສົມທຶນເຂົ້າໃນກອງທຶນຕ່າງໆຂອງສັງຄົມ; (5) ເອົາໃຈໃສ່ພັດທະນາແຫຼ່ງທ່ອງທ່ຽວທາງທໍາມະຊາດ, ວັດທະນະທໍາ, ປະຫວັດສາດ ແລະ ກະສິກໍາ ໃຫ້ໄດ້ມາດຕະຖານ, ສະອາດ, ປອດໄພ; (6) ຄົ້ນຄວ້າ ແລະ ເພີ່ມງົບປະມານເຂົ້າໃສ່ຂົງເຂດວັດທະນະທຳ-ສັງຄົມໃຫ້ຫຼາຍຂຶ້ນ ເພື່ອໃຫ້ສົມຄູ່ກັບວຽກງານຕົວຈິງ ແລະ ການພັດທະນາໃນປັດຈຸບັນ.

3) ແກ້ໄຂບັນຫາເຄັ່ງຮ້ອນທາງດ້ານສິ່ງແວດລ້ອມ ແລະ ມົນລະພິດ ຈາກໂຄງການລົງທຶນ ແລະ ໂຄງການຂຸດຄົ້ນແຮ່ທາດຕ່າງໆ ໂດຍປະຕິບັດມາດຕະການແກ້ໄຂຢ່າງຮັດກຸມ, ຕາມຂັ້ນຕອນຂອງກົດໝາຍ ແລະ ລະບຽບການທີ່ກໍານົດໄວ້ຢ່າງເຂັ້ມງວດ.

4) ສ້ອມແປງເສັ້ນທາງທີ່ຊຸດໂຊມເປ່ເພ ໃຫ້ເຂົ້າສູ່ສະພາບປົກກະຕິ, ສາມາດຮັບປະກັນການຂົນສົ່ງສິນຄ້າ ແລະ ການສັນຈອນໄປມາຂອງປະຊາຊົນ.

5) ເອົາໃຈໃສ່ແກ້ໄຂຜົນການກວດສອບ ແລະ ກວດກາ ຕາມມະຕິກອງປະຊຸມສະພາແຫ່ງຊາດ ແລະ ມອບໃຫ້ອົງການກວດສອບແຫ່ງລັດ ເຂົ້າຮ່ວມແຕ່ຫົວທີໃນການສ້າງແຜນງົບປະມານແຫ່ງລັດ ແລະ ແຜນການລົງທຶນຂອງລັດ.

6) ສືບຕໍ່ປະຕິບັດມະຕິຄະນະປະຈໍາສະພາແຫ່ງຊາດ ກ່ຽວກັບການຮັບຮູ້ສິດນໍາໃຊ້ທີ່ດິນໃຫ້ປະຊາຊົນທີ່ອາໄສຢູ່ 3 ປະເພດປ່າ ແລະ ຊຸກຍູ້ການອອກໃບຕາດິນໃຫ້ບັນ ລຸຕາມແຜນການ.

3. ສຸມໃສ່ກະກຽມສ້າງແຜນພັດທະນາເສດຖະກິດ- ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ 5 ປີຄັ້ງທີ X ແລະ ແຜນການປະຈໍາປີ 2026 ຕິດພັນກັບການສ້າງບັນຊີໂຄງການລົງທຶນຂອງລັດ ໂດຍມີການປະສານສົມທົບແຕ່ຫົວທີກັບສະພາແຫ່ງຊາດ ກ່ອນນໍາສະເໜີຕໍ່ກອງປະຊຸມຄັ້ງປະຖົມມະລຶກຂອງສະພາແຫ່ງ ຊາດຊຸດທີ X; ສະເໜີໃຫ້ພິຈາລະນາເພີ່ມງົບປະມານໃສ່ການລົງທຶນຂອງລັດໃຫ້ເພີ່ມຂຶ້ນ.

4. ເອົາໃຈໃສ່ຈັດຕັ້ງປະຕິບັດນະໂຍບາຍ ເພື່ອສ້າງສະພາບແວດລ້ອມການລົງທຶນ, ການດໍາເນີນທຸລະກິດຢ່າງສະດວກ, ວ່ອງໄວ, ໂປ່ງໃສ ແລະ ຍຸຕິທໍາ; ສົ່ງເສີມການແຂ່ງຂັນ, ການລົງທຶນພາຍໃນ ແລະ ຕ່າງປະເທດ ດ້ວຍມາດຕະການບຸລິມະສິດທີ່ແຂງແຮງ,​ ສືບຕໍ່ດຶງດູດເອົາການລົງທຶນຢ່າງມີຈຸດສຸມ ເພື່ອສ້າງຖານການຜະລິດທີ່ໝັ້ນຄົງ, ມີການປຸງແຕ່ງ ໂດຍສະເພາະໂຄງການຜະລິດເພື່ອທົດແທນການນໍາເຂົ້າ ແລະ ເປັນສິນຄ້າສົ່ງອອກ, ຊຸກຍູ້ການຂຸດຄົ້ນ ແລະ ປຸງແຕ່ງແຮ່ທາດ ໃນຂະແໜງການທີ່ ສປປລາວ ມີທ່າແຮງ.

5. ຮີບຮ້ອນຈັດສັນງົບປະມານການລົງທຶນລັດຂອງບັນດາຂະແໜງການສູນກາງ ແລະ ທ້ອງຖິ່ນ ປະຈໍາປີ 2025 ໃຫ້ສໍາເລັດໂດຍໄວ ເພື່ອໃຫ້ທັນນໍາໄປຈັດຕັ້ງປະຕິບັດໃນວັນທີ 1 ມັງກອນ 2025; ຄົ້ນຄວ້າຈັດສັນງົບປະມານການລົງທຶນລັດ ຕາມໂຄງປະກອບໜີ້ສິນ, ສືບຕໍ່ ແລະ ໃໝ່, ໃນນັ້ນ ໃຫ້ສຸມໃສ່ການຊໍາລະໜີ້ສິນເປັນສ່ວນຫຼາຍ ແລະ ໂຄງການສືບຕໍ່ທີ່ໃກ້ຈະສໍາເລັດ ໃຫ້ໄດ້ນໍາໃຊ້ໂດຍໄວ ແລະ ໂຄງການສະເໜີໃໝ່ທີ່ເປັນບຸລິມະສິດ; ຈັດສັນໂຄງການກໍ່ສ້າງຕ້ານຕາຝັ່ງເຈື່ອນ ທີ່ເປັນຈຸດຫຼໍ່ແຫຼມ ແລະ ຈຸດທີ່ມີການເຊາະເຈື່ອນຢ່າງຮ້າຍແຮງ ເປັນບຸລິມະສິດເຂົ້າໃນແຜນການລົງທຶນຂອງລັດ ເພື່ອປົກປັກຮັກສາເຂດນໍ້າແດນດິນ ຂອງ ສປປລາວ ໄວ້; ນໍາໃຊ້ຫຼັກການຈັດສັນການລົງທຶນໃນບ້ວງປົກກະຕິ, ຈົດຮັບ-ຈົດຈ່າຍ ແລະ ລົງທຶນອື່ນ ແລະ ບັນດາກອງທຶນ ໃຫ້ເປັນເອກະພາບ, ມີຈຸດສຸມ, ຍຸຕິທໍາ; ກໍານົດທິດທາງລວມໃນການຊໍາລະໜີ້ສິນໃຫ້ຈະແຈ້ງຊັດເຈນ ເປັນຕົ້ນການນໍາໃຊ້ບ້ວງປົກກະຕິ ແລະ ບ້ວງເງິນເກີນແຜນ; ກຳ ນົດຫຼັກການດັດແກ້ເພີ່ມມູນຄ່າໂຄງການລົງທຶນ ໃຫ້ໄປຕາມສະພາບເງິນເຟີ້ ແລະ ເສດຖະກິດໃນປັດຈຸບັນ.

6. ເອົາໃຈໃສ່ນໍາໃຊ້ກອງທຶນທາງ ສຸມໃສ່ບຸລະນະສ້ອມແປງເສັ້ນທາງທີ່ເປ່ເພ ແລະ ໄດ້ຮັບຜົນກະທົບຈາກໄພພິບັດທໍາມະຊາດ ໃຫ້ສໍາເລັດ ເພື່ອຮັບປະກັນການຄົມມະນາຄົມ-ຂົນສົ່ງ ໃຫ້ກັບຄືນສູ່ສະພາບປົກກະຕິໂດຍໄວ, ຄົ້ນຄວ້າປັບປຸງນິຕິກໍາໃຕ້ກົດໝາຍ ໃນການຄຸ້ມຄອງ ແລະ ຕິດຕາມກວດກາລົດບັນທຸກສິນຄ້ານໍ້າໜັກເກີນ ແລະ ລົດຂົນສົ່ງຕ່າງປະເທດທີ່ມາໃຫ້ບໍລິການຢູ່ ສປປລາວ ພ້ອມທັງມີມາດຕະການທີ່ເຂັ້ມງວດຕໍ່ຜູ້ລະເມີດ.

7. ເອົາໃຈໃສ່ຊຸກຍູ້ສົ່ງເສີມການຜະລິດໃຫ້ແຂງແຮງຂຶ້ນກວ່າເກົ່າ ໂດຍສະເພາະສິນຄ້າກະສິກໍາ, ໃຫ້ຂະແໜງກະສິກໍາ ແລະ ປ່າໄມ້ ເປັນເຈົ້າການປະກອບສ່ວນຢ່າງຕັ້ງໜ້າໃນການຍົກສູງຄຸນນະພາບການຜະລິດ ໂດຍສະເພາະແມ່ນການປະກອບສ່ວນຂອງບັນດາສູນ, ສະຖານີຄົ້ນຄວ້າກະສິກໍາໃນແຕ່ລະທ້ອງຖິ່ນ; ພ້ອມດຽວກັນນັ້ນ, ກໍສະເໜີໃຫ້ຄົ້ນຄວ້າປະເມີນຄືນບັນດາລາຍການສິນຄ້າທີ່ສາມາດຜະລິດໄດ້ຢູ່ພາຍໃນ ເປັນຕົ້ນ ຝຸ່ນ, ອາຫານສັດ, ສະບຽງອາຫານ ແລະ ອື່ນໆ ທີ່ສາມາດຮັບປະກັນການສະໜອງແກ່ການຊົມໃຊ້ໄດ້ພຽງພໍ, ໃຫ້ຈໍາກັດການນໍາເຂົ້າສິນຄ້າລາຍການນັ້ນ ເພື່ອຫັນມາສົ່ງເສີມການຜະລິດພາຍໃນໃຫ້ຫຼາຍຂຶ້ນ.

8. ເອົາໃຈໃສ່ຄຸ້ມຄອງ, ປົກປັກຮັກສາບັນດາໂຄງການຊົນລະປະທານ ເພື່ອຮັບປະກັນການສະໜອງນໍ້າໃຫ້ແກ່ການຜະລິດຂອງຊາວກະສິກອນ ແລະ ມີມາດຕະການຄຸ້ມຄອງຢ່າງເຂັ້ມງວດຕໍ່ທີ່ດິນນາ, ທີ່ດິນກະສິກໍາໃນເຂດທີ່ມີຊົນລະປະທານ ບໍ່ໃຫ້ມີການຫັນປ່ຽນໄປເປັນທີ່ດິນປະເພດອື່ນ; ພ້ອມດຽວກັນນັ້ນ, ສະເໜີໃຫ້ຄົ້ນຄວ້າຈັດສັນງົບປະມານ ເຂົ້າໃນໂຄງການຊົນລະປະທານທີ່ມີເງື່ອນໄຂນໍ້າໄຫຼເຂົ້າເອງ, ໂຄງການທີ່ດໍາເນີນໃກ້ຈະສໍາເລັດແລ້ວ ແລະ ເປັນໂຄງການທີ່ມີປະສິດທິຜົນທາງດ້ານເສດຖະກິດ, ເປັນໂຄງການບຸລິມະສິດຂອງລັດຖະບານ ເພື່ອຮັບປະກັນໃຫ້ການຜະລິດກະສິກໍາ ມີຕົ້ນທຶນຕໍ່າ ສາມາດແກ່ງແຍ້ງແຂ່ງຂັນໄດ້.

9. ຄົ້ນຄວ້າສ້າງເງື່ອນໄຂໃຫ້ແກ່ຊາວກະສິກອນ ສາມາດເຂົ້າເຖິງການສະໜອງສິນເຊື່ອໃຫ້ສະດວກຂຶ້ນ ຕາມນະໂຍບາຍສິນເຊື່ອຕໍ່ກັບຫົວໜ່ວຍທຸລະກິດກະສິກໍາ ແລະ ຫົວໜ່ວຍທຸລະກິດທີ່ຜະລິດອຸປະກອນ ແລະ ເຄື່ອງມືຮັບໃຊ້ການຜະລິດກະສິກໍາ ຈໍາໜ່າຍພາຍໃນ ຫຼຸດຜ່ອນການນໍາເຂົ້າ ແລະ ເປັນສິນຄ້າສົ່ງອອກ.

10. ເອົາໃຈໃສ່ຫັນເປັນທັນສະໄໝໃນການເກັບລາຍຮັບຈາກຖານລາຍຮັບທີ່ເປັນທ່າແຮງໃຫ້ຫຼາຍຂຶ້ນ ເປັນຕົ້ນການຂຸດຄົ້ນ ແລະ ປຸງແຕ່ງແຮ່ທາດ, ອາກອນທີ່ດິນ, ພະລັງງານ, ຄ່າທຳນຽມ ແລະ ອື່ນໆ; ຫຼຸດຜ່ອນການຂໍຍົກເວັ້ນການປະຕິບັດບາງມາດຕາຂອງກົດໝາຍທີ່ຕິດພັນກັບພາສີ-ອາກອນ; ປັບປຸງໂຄງສ້າງດ້ານງົບປະມານແຫ່ງລັດ ແລະ ຄຸ້ມຄອງໜີ້ສິນສາທາລະນະບໍ່ໃຫ້ເກີນການຄວບຄຸມ ແລະ ຮັບ ປະກັນການຊໍາລະເພື່ອບໍ່ໃຫ້ກ້າວໄປສູ່ປະເທດທີ່ບໍ່ສາມາດຊໍາລະໜີ້ສິນໄດ້, ຮັບປະກັນແຫຼ່ງດຸ່ນດ່ຽງທີ່ຍືນຍົງ, ຫຼຸດຜ່ອນການກູ້ຢືມ ເພື່ອເຮັດໃຫ້ພື້ນຖານລະບົບການເງິນແຫ່ງຊາດ ມີຄວາມໝັ້ນຄົງ,​ ມີສະຖຽນລະພາບດ້ານເສດຖະກິດມະຫາພາກ.

11. ເອົາໃຈໃສ່ຍົກສູງການຖືຄອງເງິນກີບ, ຄຸ້ມຄອງການຖືຄອງ ແລະ ໃຊ້ຈ່າຍເງິນຕາຕ່າງປະເທດ ໃຫ້ເຄັ່ງຄັດຮັດກຸມເຂົ້າຕື່ມ; ກະຈາຍຄວາມສ່ຽງດ້ານການນໍາໃຊ້ເງິນຕາຕ່າງປະເທດ ເພື່ອບໍ່ໃຫ້ສະກຸນເງິນໃດໜຶ່ງຜູກມັດ, ຜູກຂາດ; ຄຸ້ມຄອງລາຍຮັບຈາກການສົ່ງອອກຜ່ານລະບົບທະນາຄານໃຫ້ບັນລຸ 70% ຂຶ້ນໄປ.

12. ສືບຕໍ່ຊຸກຍູ້ການຈັດຕັ້ງປະຕິບັດມາດຕະການປະຢັດ, ຕ້ານການຟຸມເຟືອຍ ແລະ ແກ້ໄຂບັນຫາພາຫະນະທີ່ນໍາເຂົ້າບໍ່ຖືກຕ້ອງຢ່າງເຂັ້ມງວດ.

13. ຕໍ່ການສະເໜີຂອງທ່ານນາຍົກລັດຖະມົນຕີ ກ່ຽວກັບ:

1) ການມອບສິດໃຫ້ສະພາປະຊາຊົນຂັ້ນແຂວງໃນການພິຈາລະນາຮັບຮອງໂຄງການລົງທຶນຂອງລັດທີ່ມີມູນຄ່າສູງກວ່າ 20 ຕື້ກີບ, ຄະນະປະຈໍາສະພາແຫ່ງຊາດ ເຫັນດີໂດຍພື້ນຖານ ແລະ ໃຫ້ລັດຖະບານກະກຽມປັບປຸງມາດຕາທີ່ກ່ຽວຂ້ອງຂອງກົດໝາຍວ່າດ້ວຍການລົງທຶນຂອງລັດ;

2) ການດັດແກ້ເພີ່ມລາຍຈ່າຍເກີນແຜນຂອງບັນດາແຂວງ ຕາມຜົນການສະຫຼຸບຂາດຕົວງົບປະມານແຫ່ງລັດປະຈໍາປີ 2023 ຈໍານວນ 2,020.78 ຕື້ກີບນັ້ນ ໃຫ້ກະຊວງການເງິນລາຍງານລະອຽດ ແລະ ມີການຢັ້ງຢືນຈາກອົງການກວດສອບແຫ່ງລັດ;

3) ການອະນຸຍາດໃຫ້ລັດຖະບານນໍາໃຊ້ເງິນເກີນແຜນຈາກລາຍຮັບປີ 2024 ຂອງບັບດາແຂວງ ເພື່ອນໍາໃຊ້ເຂົ້າໃນປີ 2025 ເພື່ອກະຕຸ້ນເສດຖະກິດແຕ່ຫົວປີນັ້ນ ກໍໃຫ້ກະຊວງການເງິນລາຍງານລະອຽດ ແລະ ມີການຢັ້ງຢືນຈາກອົງການກວດສອບແຫ່ງລັດ ເພື່ອສະເໜີມາຫາສະພາແຫ່ງຊາດພິຈາລະນາຮັບຮອງ.