(ສພຊ) ໃນວັນທີ 3 ກໍລະກົດ 2023 ໂດຍການເປັນປະທານກອງປະຊຸມຂອງທ່ານ ສົມມາດ ພົລເສນາ ຮອງປະທານສະພາແຫ່ງຊາດ, ທ່ານ ຮສ. ປອ. ລິນຄຳ ດວງສະຫວັນ ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ຕາງໜ້າຄະນະປະຈຳສະພາແຫ່ງຊາດ ປະກອບຄຳເຫັນຕໍ່ບົດລາຍງານຂອງລັດຖະບານ ກ່ຽວກັບຍຸດທະສາດການຄຸ້ມຄອງນໍ້າ ແລະ ຊັບພະຍາກອນນໍ້າແຫ່ງຊາດ ຮອດປີ 2030 ຕໍ່ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ວ່າ: ຜ່ານການຄົ້ນຄວ້າ ຮ່າງຍຸດທະສາດການຄຸ້ມຄອງ, ການນໍາໃຊ້ນໍ້າ ແລະ ຊັບພະຍາກອນນໍ້າ ແຫ່ງຊາດ ຮອດປີ 2030 ໂດຍພື້ນຖານແລ້ວ ຄະນະປະຈໍາສະພາແຫ່ງຊາດ ແມ່ນເຫັນດີເປັນເອກະພາບ ຕໍ່ເນື້ອໃນຂອງ ຮ່າງ ຍຸດທະສາດ ສະບັບດັ່ງກ່າວ ເປັນຕົ້ນ ແຜນງານ, ແຜນດໍາເນີນງານ, ເປົ້າໝາຍ, ແຜນວຽກຈຸດສຸມ ແລະ ບັນດາກິດຈະກໍາ ລວມທັງມາດຕະການໃນການຈັດຕັ້ງປະຕິບັດ ທີ່ໄດ້ກໍານົດໄວ້ ໃນຮ່າງຍຸດທະສາດ ສະບັບນີ້ ແຕ່ເພື່ອຮັບປະກັນເຮັດໃຫ້ການຄຸ້ມຄອງ ແລະ ນໍາໃຊ້ ນໍ້າ ແລະ ຊັບພະຍາກອນນໍ້່າ ໃຫ້ມີປະສິດທິພາບ ປະສິດທິຜົນ ຄະນະປະຈໍາສະພາແຫ່ງຊາດ ສະເໜີ ບາງຄໍາເຫັນ ດັ່ງນີ້:
1. ສືບຕໍ່ຄົ້ນຄວ້າສ້າງ, ປັບປຸງກົດໝາຍ ແລະ ນິຕິກຳໃຕ້ກົດໝາຍ ໃນຂົງເຂດນໍ້າ ແລະ ຊັບພະຍາກອນນໍ້າ ເພື່ອເປັນເຄື່ອງມື ໃຫ້ແກ່ການຈັດຕັ້ງປະຕິບັດ ຍຸດທະສາດການຄຸ້ມຄອງ, ການນໍາໃຊ້ນໍ້າ ແລະ ຊັບພະຍາກອນນໍ້າແຫ່ງຊາດ ຮອດປີ 2030 ໃຫ້ສໍາເລັດຕາມຄາດໝາຍ;
2. ຍຸດທະສາດການຄຸ້ມຄອງ, ການນໍາໃຊ້ນໍ້າ ແລະ ຊັບພະຍາກອນນໍ້າແຫ່ງຊາດ ຮອດປີ 2030 ຕ້ອງໃຫ້ສອດຄ່ອງກັບຍຸດທະສາດ ຂອງຂະແໜງການທີ່ກ່ຽວຂ້ອງ ເປັນຕົ້ນ ຂະແໜງກະສິກໍາ ແລະ ປ່າໄມ້, ໂຍທາທິການ ແລະ ຂົນສົ່ງ, ພະລັງງານ ແລະ ບໍ່ແຮ່, ການທ່ອງທ່ຽວ, ສຶກສາ, ສາທາລະນະສຸກ ແລະ ແຜນແມ່ບົດຈັດສັນທີ່ດິນແຫ່ງຊາດ;
3. ໃນການຈັດຕັ້ງຜັນຂະຫຍາຍ ຍຸດທະສາດສະບັບນີ້ ສະເໜີໃຫ້ມີການປະສານສົມທົບກັບພາກສ່ວນທີ່ກ່ຽວຂ້ອງ ທັງສູນກາງ ແລະ ທ້ອງຖິ່ນ ຢ່າງກົມກຽວ ແລະ ເປັນເອກະພາບກັນ ເພື່ອຮັບປະກັນເຮັດໃຫ້ການຈັດຕັ້ງປະຕິບັດຍຸດທະສາດດັ່ງກ່າວ ມີປະສິດທິພາບ ແລະ ປະສິດທິຜົນ;
4. ເອົາໃຈໃສ່ສ້າງ ກໍານົດກົນໄກການປະສານງານກັບພາກສ່ວນທີ່ກ່ຽວຂ້ອງ ໃຫ້ເປັນລະບົບຄົບຊຸດ ເປັນຕົ້ນ ສະໜອງຂໍ້ມູນຂ່າວສານ, ເຄື່ອງມືອຸປະກອນ ແລະ ການແບ່ງຄວາມຮັບຜິດຊອບຢ່າງຂາດຕົວ ເພື່ອບໍ່ໃຫ້ມີການຖິ້ມຄວາມຮັບຜິດຊອບໃຫ້ກັນ;
5. ເອົາໃຈໃສ່ໃນການຕິດຕາມ ກວດກາ ການຈໍາກັດ ແລະ ບໍາບັດນໍ້າເປື້ອນ, ນໍ້າເສຍຈາກຄົວເຮືອນ, ໂຮງງານອຸດສາຫະກໍາ ແລະ ກິດຈະການອື່ນໆ ກ່ອນປ່ອຍອອກສູ່ຄອງ, ຮ່ອງລະບາຍນໍ້າ ແລະ ແມ່ນໍ້າທໍາມະຊາດ ເພື່ອຮັບປະກັນ ບໍ່ໃຫ້ມີຜົນກະທົບຕໍ່ ສິ່ງແວດລ້ອມ ສັງຄົມ ແລະ ທໍາມະຊາດຫຼາຍ;
6. ຄຸ້ມຄອງ ຫ້ວຍ, ໜອງ, ຮ່ອງ ຄອງບຶງຕ່າງໆ ໂດຍບໍ່ໃຫ້ຖົມ, ສ້າງສິ່ງຂີດຂວາງ ຕໍ່ລະບົບລະບາຍນໍ້າ ຫຼື ຈັບຈອງເອົາເປັນຂອງສ່ວນຕົວ ພ້ອມທັງເຂັ້ມງວດປະຕິບັດມາດຕະການດ້ານກົດໝາຍຕໍ່ຜູ້ລະເມີດ;
7. ກົນໄກການຄຸ້ມຄອງບໍລິຫານ ແລະ ຈັດການນໍ້າ ຢູ່ໃນເຂດອ່າງຮັບນໍ້າ ຕ້ອງໄດ້ມີການປະສານສົມທົບ ແລະ ເອກະພາບກັນ ລະຫວ່າງ ຂະແໜງການທີ່ກ່ຽວຂ້ອງ ຂອງສູນກາງ ແລະ ທ້ອງຖິ່ນ ເພື່ອຮັບປະກັນບໍ່ໃຫ້ມີຜົນກະທົບຕໍ່ກັບການຄຸ້ມຄອງ, ນໍາໃຊ້ນໍ້າ ແລະ ຊັບພະຍາກອນນໍ້າ;
8. ເອົາໃຈໃສ່ໃນການປົກປັກຮັກສາ ແລະ ການຟື້ນຟູນໍ້າ ແລະ ຊັບພະຍາກອນນໍ້າ ເປັນຕົ້ນ ເຂດປ່າຍອດນໍ້າ, ທີ່ດິນບໍລິເວນນໍ້າ ເພື່ອຮັບປະກັນໃຫ້ນໍ້າມີຄຸນນະພາບດີ ມີປະລິມານທີ່ພຽງພໍ ເພື່ອຕອບສະໜອງໃຫ້ແກ່ການບໍລິໂພກ-ອຸປະໂພກ;
9. ເອົາໃຈໃສ່ໃນການຄຸ້ມຄອງ ຕິດຕາມ ກວດກາ ການນໍາໃຊ້ນໍ້າໃຕ້ດິນ ໃຫ້ເປັນລະບົບ ແລະ ຖືກຕ້ອງຕາມລະບຽບການຄຸ້ມຄອງນໍ້າໃຕ້ດິນ ເພື່ອຮັບປະກັນການນໍາໃຊ້ນໍ້າໃຕ້ດິນ ໃຫ້ຖືກຕ້ອງຕາມເປົ້າໝາຍ, ປະຢັດ, ມີປະສິດທິຜົນ ແນໃສ່ຮັກສາຄວາມສົມດູນທາງດ້ານປະລິມານ ແລະ ຄຸນນະພາບຂອງນໍ້າໃຕ້ດິນ;
10. ສ້າງ ແລະ ພັດທະນາບຸກຄະລາກອນ ທີ່ຮັບຜິດຊອບວຽກງານນໍ້າ ແລະ ຊັບພະຍາກອນນໍ້າ ໃຫ້ໄດ້ທັງປະລິມານ ແລະ ຄຸນນະພາບ ສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຂອງວຽກງານດັ່ງກ່າວ;
11. ເອົາໃຈໃສ່ໂຄສະນາເຜີຍແຜ່ຂໍ້ມູນຂ່າວສານ ວຽກງານນໍ້າ ແລະ ຊັບພະຍາກອນນໍ້າ ຢ່າງກວ້າງຂວາງ ໃຫ້ທຸກພາກສ່ວນໃນສັງຄົມ, ປະຊາຊົນ ເຂົ້າໃຈ, ເຂົ້າຮ່ວມ ແລະ ມີສ່ວນຮ່ວມ ໃນການຈັດຕັ້ງປະຕິບັດວຽກງານດັ່ງກ່າວ.