ໃນຕອນເຊົ້າວັນທີ 8 ກຸມພາ 2022 ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດກອງປະຊຸມຮ່ວມລະຫວ່າງ ສພຊ ເວົ້າລວມ ເວົ້າສະເພາະກໍ່ຄືກໍາມາທິການວຽກງານສະມາຊິກສະພາແຫ່ງຊາດ ກ່ຽວກັບການຕິດຕາມຊຸກຍູ້ ແລະ ເກັບກຳຂໍ້ມູນການເຄື່ອນໄຫວວຽກງານຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13 ແລະ ສະພາປະຊາຊົນແຂວງ ໂດຍການເປັນປະທານຮ່ວມ ລະຫວ່າງ ທ່ານ ສຸບັນ ສະວະບຸດ ຄະນະປະຈຳສະພາແຫ່ງຊາດ ປະທານກຳມາທິການວຽກງານສະມາຊິກສະພາແຫ່ງຊາດ, ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13, ປະທານສະພາປະຊາຊົນແຂວງ ພ້ອມນີ້ຍັງມີບັນດາທ່ານສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13, ຄະນະປະຈໍາ, ຄະນະກໍາມະການ, ຄະນະເລຂາທິການ ແລະ ບັນດາຫົວໜ້າຂະແໝງພາຍໃນສະພາປະຊາຊົນແຂວງທີ່ກ່ຽວຂ້ອງເຂົ້າຮ່ວມ.

ຈຸດປະສົງຂອງການເຄື່ອນໄຫວໃນຄັ້ງນີ້ກໍ່ເພື່ອເປັນການຕິດຕາມຊຸກຍູ້ ແລະ ເກັບກຳຂໍ້ມູນການເຄື່ອນໄຫວວຽກງານຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13 ແລະ ສະພາປະຊາຊົນແຂວງ, ພ້ອມທັງໄດ້ແລກປ່ຽນຄໍາຄິດຄໍາເຫັນກ່ຽວກັບບັນຫາຕ່າງໆເປັນຕົ້ນແມ່ນ: ວຽກງານການຈັດຕັ້ງ ແລະ ການເຄື່ອນໄຫວຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13 ແລະ ການເຄື່ອນໄຫວຂອງສະພາປະຊາຊົນແຂວງ, ການສ້າງ ແລະ ປັບປຸງກົດໝາຍ, ນິຕິກຳທີ່ສຳຄັນຂອງແຂວງ, ການຕິດຕາມກວດກາ ການປະຕິບັດລັດຖະທຳມະນູນ, ກົດໝາຍ, ມະຕິກອງປະຊຸມຂອງສະພາແຫ່ງຊາດ ແລະ ສະພາປະຊາຊົນແຂວງ, ການລົງພົບປະຜູ້ມີສິດເລືອກຕັ້ງຂອງສະມາຊິກສະພາແຫ່ງຊາດ ປະຈຳເຂດເລືອກຕັ້ງ ແລະ ສະມາຊິກສະພາປະຊາຊົນແຂວງ, ການກະກຽມກອງປະຊຸມ ຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ແລະ ກອງປະຊຸມສະພາປະຊາຊົນແຂວງ, ກົນໄກການປະສານງານລະຫວ່າງ ຄະນະປະຈໍາສະພາປະຊາຊົນແຂວງ ກັບ ສະພາແຫ່ງຊາດ, ກໍ່ຄືອົງການປົກຄອງແຂວງ, ອົງການກວດສອບປະຈໍາພາກ, ອົງການໄອຍະການປະຊາຊົນແຂວງ, ແນວລາວສ້າງຊາດແຂວງ, ລວມທັງການຈັດຕັ້ງ ແລະ ການເຄື່ອນໄຫວຂອງ ຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ, ນະຄອນ, ສໍາຄັນແມ່ນການປະຕິບັດສິດ ແລະ ໜ້າທີ່ຂອງ ສສຊ ແລະ ສສຂ ໃນການເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ, ການສ້າງຄວາມເຂັ້ມແຂງ ໂດຍສະເພາະແມ່ນ ສສຂ ຜູ້ໃໝ່, ຜ່ານການເຄື່ອນໄຫວແຕ່ລະບັນຫາແມ່ນພົບຂໍ້ສະດວກ, ຂໍ້ຫຍຸ້ງຍາກ ແລະ ແລກປ່ຽນຄຳຄິດຄຳເຫັນເຊິ່ງກັນ ແລະ ກັນ ທັງນີ້ກໍ່ເພື່ອເປັນຖານຂໍ້ມູນໃນການວາງແຜນພັດທະນາ, ຍົກລະດັບວຽກງານໃຫ້ມີຄຸນນະພາບ, ພ້ອມທັງລາຍງານໃຫ້ຄະນະປະຈຳສະພາແຫ່ງຊາດ ເພື່ອປຶກສາຫາລື  ແລະ ແກ້ໄຂໃນຕໍ່ໜ້າ.