(ສພຊ) ເພື່ອຢັ້ງຢືນນາມມະຍົດ 4 ບຸກ ໃຫ້ຄະນະຊາວໜຸ່ມສະພາແຫ່ງຊາດ ທີ່ໄດ້ຮັບການຢັ້ງຢືນຈາກສູນກາງຊາວໜຸ່ມປະຊາຊົນປະຕິວັດລາວ ໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ຄື: ບຸກທະລຸດ້ານແນວຄິດ; ດ້ານເຝິກຝົນຫລໍ່ຫລອມ, ຮ່ຳຮຽນ; ດ້ານວຽກງານການຈັດຕັ້ງ; ດ້ານວິຊາຊີບ-ສ້າງວຽກເຮັດງານທຳ ຢ່າງເປັນຮູບປະທຳ. ໃນວັນທີ 10 ສິງຫາ 2022 ທີ່ສະພາແຫ່ງຊາດ ໄດ້ມີພິທີມອບໃບຢັ້ງຢືນ 4 ບຸກ ໃຫ້ຄະນະບໍລິຫານງານຊາວໜຸ່ມສະພາແຫ່ງຊາດ ໂດຍການເປັນປະທານຂອງສະຫາຍ ພອນແກ້ວ ຕົ້ນວໍລະຈິດ ກຳມະການຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມສະພາແຫ່ງຊາດ; ເຂົ້າຮ່ວມມີສະຫາຍ ຮສ. ປອ. ລິນຄຳ ດວງສະຫວັນ ກຳມະການສຳຮອງສູນກາງພັກ, ຄະນະປະຈຳພັກສະພາແຫ່ງຊາດ, ຜູ້ຊີ້ນຳວຽກງານອົງການຈັດຕັ້ງມະຫາຊົນ, ສະຫາຍ ມອນໄຊ ລາວມົວຊົ່ງ ກຳມະການສຳຮອງສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ມີຄະນະບໍລິຫານງານຊາວໜຸ່ມ ສະພາແຫ່ງຊາດ, ສະມາຊິກຊາວໜຸ່ມພາຍໃນສະພາແຫ່ງຊາດເຂົ້າຮ່ວມຢ່າງພ້ອມພຽງ.
ໃນພິທີ, ໄດ້ຮັບຟັງບົດລາຍງານການຈັດຕັ້ງປະຕິບັດຂໍ້ແຂ່ງຂັນ 4 ບຸກ; ຂໍ້ຕົກລົງຂອງຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ວ່າດ້ວຍການຮັບຮອງຄະນະບໍລິຫານງານຊາວໜຸ່ມປະຊາຊົນປະຕິວັດລາວ ສະ ພາແຫ່ງຊາດ ເປັນຄະນະບໍລິຫານງານຊາວໜຸ່ມປະຊາຊົນປະຕິວັດລາວ 4 ບຸກ. ຈາກນັ້ນ, ກໍໄດ້ມີການມອບ-ຮັບໃບຢັ້ງຢືນ 4 ບຸກ, ບັນດາເລຂາໜ່ວຍຊາວໜຸ່ມຮາກຖານພາຍໃນສະພາແຫ່ງຊາດ ຂຶ້ນຈັບມື ເພື່ອແຂ່ງຂັນ 4 ບຸກ.
ໃນພິທີ ຍັງໄດ້ຮັບຟັງການໂອ້ລົມຈາກສະຫາຍ ຮສ. ປອ. ລິນຄຳ ດວງສະຫວັນ ເຊິ່ງມີເນື້ອໃນບາງຕອນສຳຄັນວ່າ: ຕາງໜ້າໃຫ້ຄະນະບໍລິຫານງານພັກສະພາແຫ່ງຊາດ ຂໍສະແດງຄວາມຍ້ອງຍໍຊົມເຊີຍ ຕໍ່ຄະນະບໍລິຫານງານຊາວໜຸ່ມສະພາແຫ່ງຊາດ ທີ່ໄດ້ຮັບການຢັ້ງຢືນເປັນຄະນະຊາວໜຸ່ມ 4 ບຸກ ຈາກຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ. ຜ່ານການສຶກສາອົບຮົມການເມືອງ-ແນວຄິດ ໄດ້ເຮັດໃຫ້ຄະນະບໍລິຫານງານຊາວໜຸ່ມສະພາແຫ່ງຊາດ ກໍຄືສະມາຊິກຊາວໜຸ່ມ ສືບຕໍ່ມີຄວາມຮັບຮູ້ເຂົ້າໃຈຕໍ່ແນວທາງນະໂຍບາຍ, ມີຄວາມເຊື່ອໝັ້ນຕໍ່ການນຳພາຂອງ ພັກ-ລັດ, ມີຄວາມໜັກແໜ້ນທາງດ້ານການເມືອງ-ແນວຄິດ ແລະ ການຈັດຕັ້ງ; ມີສະຕິລະວັງຕົວ ແລະ ມີຄວາມຮັບຜິດຊອບຕໍ່ໜ້າທີ່ການເມືອງເປັນຢ່າງດີ. ພ້ອມນັ້ນ, ສະຫາຍ ຍັງໄດ້ເນັ້ນໃຫ້ສືບຕໍ່ເພີ່ມຄວາມເອົາໃຈໃສ່ ບາງບັນຫາຄື: ເພີ່ມທະວີການສຶກສາອົບຮົມການເມືອງ-ແນວຄິດ ໃຫ້ສະມາຊິກຊາວໜຸ່ມ ໂດຍຈັດຕັ້ງການເຊື່ອມຊຶມນິຕິກຳຂອງພັກ-ລັດ ແລະ ວຽກງານຊາວໜຸ່ມ ໃຫ້ເປັນປົກກະຕິ ມີເນື້ອໃນເລິກເຊິ່ງຕິດແທດກັບຕົວຈິງ; ເປັນເຈົ້າການຈັດຕັ້ງຜັນຂະຫຍາຍບັນດາມະຕິ, ຄຳສັ່ງ, ນິຕິກຳທີ່ກ່ຽວຂ້ອງ ເປັນແຜນການ, ແຜນງານ, ໂຄງການ ພ້ອມທັງຕິດຕາມ, ກວດກາ, ຊຸກຍູ້ ແລະ ປະເມີນຜົນການຈັດຕັ້ງປະຕິບັດ ແລະ ຂໍທິດຊີ້ນຳຈາກຄະນະພັກສະພາແຫ່ງຊາດ ແລະ ຄະນະບໍລິຫານງານຊາວໜຸ່ມສະພາແຫ່ງຊາດໃຫ້ເປັນປົກກະຕິ; ສ້າງຂະບວນການແຂ່ງຂັນປະຕິບັດວຽກງານວິຊາສະເພາະ ຕິດພັນກັບຂໍ້ແຂ່ງຂັນຮັກຊາດ ແລະ ພັດທະນາ ແລະ ຂໍ້ແຂ່ງຂັນ 4 ບຸກ ໂດຍການຈັດສຳມະນາ, ປາຖະກະຖາ, ເວທີແລກປ່ຽນ ແລະ ອື່ນໆ ເປັນຂະບວນການຟົດຟື້ນ ແລະ ຕໍ່ເນື່ອງ ພ້ອມທັງສະຫຼຸບຖອດຖອນບົດຮຽນເປັນປະຈຳ; ເຝິກຝົນຫຼໍ່ຫຼອມຕົນເອງ ດ້ວຍການຄົ້ນຄວ້າເຊື່ອມຊຶມ ແລະ ຮໍ່າຮຽນເອົາຄຸນສົມບັດ, ສິນທຳປະຕິວັດ, ຄວາມເປັນແບບຢ່າງຂອງການນຳຊາວໜຸ່ມຮຸ່ນກ່ອນ ພ້ອມທັງເຝິກຝົນຈາກພຶດຕິກຳຕົວຈິງ ຮຽນກັບທີ່ ແລະ ລົງຮາກຖານ ໃຫ້ເປັນຂະບວນຟົດຟື້ນ; ເພີ່ມທະວີການຕິດຕາມກວດກາ ເປັນປົກກະຕິ, ເອົາໃຈໃສ່ຫາງສຽງປາກົດການຫຍໍ້ທໍ້ ທີ່ເກີດຂຶ້ນໃນຖັນແຖວຊາວໜຸ່ມ ເພື່ອແກ້ໄຂໃຫ້ທັນເວລາ ລວມທັງການປະຕິບັດນະໂຍບາຍດ້ານຕ່າງໆ ແລະ ປົກປ້ອງຜົນປະໂຫຍດອັນຊອບທຳຂອງສະມາຊິກຊາວໜຸ່ມ.
(ຂ່າວ: ກົງທະນູຄຳ, ພາບ: ສຸພາວັນ)