ໃນລະຫວ່າງວັນທີ 13-15 ມິຖຸນາ 2023 ນີ້.ຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ສະພາປະຊາຊົນແຂວງ ໄດ້ຈັດກອງປະຊຸມຕິດຕາມກວດກາການຈັດຕັ້ງປະຕິບັດວຽກງານ 6 ເດືອນຕົ້ນປີ 2023 ທີ່ຫ້ອງວ່າການປົກຄອງເມືອງສາມັກຄີໄຊ, ເມືອງຊານໄຊ ແລະ ເມືອງໄຊເສດຖາ. ໂດຍການເປັນປະທານຂອງທ່ານແຫວນຄໍາ ປະທຸມມະແສງ ປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ສະພາປະຊາຊົນແຂວງ. ມີບັນດາທ່ານຄະນະນໍາຂອງເມືອງ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ, ຄະນະທີມງານຈາກສະພາປະຊາຊົນແຂວງ, ຕາງໜ້າຫ້ອງການ ແລະ ພະນັກງານ-ລັດຖະກອນທີ່ກ່ຽວຂ້ອງເຂົ້າຮ່ວມ.

ກອງປະຊຸມໄດ້ຮັບຟັງການລາຍງານຈາກທ່ານຮອງເຈົ້າເມືອງກ່ຽວກັບການຈັດຕັ້ງປະຕິບັດວຽກງານໃນຂົງເຂດວັດທະນະທໍາ-ສັງຄົມ ນອກນີ້ຍັງມີຫ້ອງກ່ຽວຂ້ອງເຂົ້າຮ່ວມລາຍງານຕາມການເຈາະຈິ້ມ ຂອງປະທານກອງປະຊຸມ ແລະ ສະມາຊິກສະພາປະຊາຊົນແຂວງໃນການລົງຕິດຕາມກວດກາຄັ້ງນີ້ຢ່າງມີຈຸດສຸມ ເພື່ອຕອບສະໜອງດ້ານຂໍ້ມູນໃຫ້ຮັດກຸມ ແລະ ເປັນຂໍ້ມູນໃນຄັ້ງນີ້ອີກດ້ວຍ  ທັງນີ້, ເພື່ອຕິດຕາມກວດກາການຈັດຕັ້ງປະຕິບັດ ກົດໝາຍ, ນິຕິກໍາໃຕ້ກົດໝາຍ, ແຜນພັດທະນາເສດຖະກິດ-ສັງຄົມ ໃນການຈັດຕັ້ງປະຕິບັດບັນດາຄາດໝາຍ ຂົງເຂດວັດທະນະທໍາ-ສັງຄົມ ແລະ ບັນດາເຜົ່າ ຄຽງຄູ່ກັບການຈັດຕັ້ງປະຕິບັດຍຸດທະສາດປົກປ້ອງສັງຄົມແຫ່ງຊາດ ລົງເລິກວຽກງານປະກັນສຸຂະພາບ, ປະກັນສັງຄົມ ແລະ ສະຫວັດດີການສັງຄົມເພື່ອເປັນຂໍ້ມູນພື້ນຖານໃນການກະກຽມໃຫ້ແກ່ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ເທື່ອທີ IX.

ຕອນທ້າຍ ຂອງກອງປະຊຸມປະທານ ໄດ້ມີຄໍາເຫັນບ້າງດ້ານເພື່ອຊຸກຍູ້ຂະແໜງການກ່ຽວຂ້ອງສືບຕໍ່ເອົາໃຈໃສ່ການຈັດຕັ້ງປະຕິບັດ ກົດໝາຍ, ນິຕິກໍາໃຕ້ກົດໝາຍ,  ເພີ່ມທະວີການຈັດຕັ້ງເຜີຍແຜ່ວຽກງານໃຫ້ປະຊາຊົນຮັບຮູ້, ເຊື່ອມຊືມ ເຂົ້າໃຈຢ່າງທົ່ວເຖິງ, ປະສານສົມທົບຢ່າງກົມກຽວກັບພາກສ່ວນກ່ຽວຂ້ອງໃນການຈັດຕັ້ງວຽກງານເພື່ອໃຫ້ມີປະສິດຕິພາບ ແລະ ປະສິດທິຜົນ.

(ພາບ-ຂ່າວ: ຈັນທະຈອນ ໂກພິຈິດ)