ອາທິດຜ່ານມານີ້ ທ່ານ ສຸວິລັດ ພັນສຸເດດ ສະມາຊິກສະພາປະຊາຊົນແຂວງ, ຮອງຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ, ໄດ້ລົງເຄື່ອນໄຫວເຮັດວຽກຮ່ວມກັບ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງ ເມືອງຈອມເພັດ, ມີການນຳຂອງເມືອງ, ຄະນະຊີ້ນຳໂຄງການກໍ່ສ້າງເຂື່ອນໄຟຟ້ານໍ້າຂອງແຂວງຫຼວງພະບາງ, ອົງການປົກຄອງບ້ານ ແລະພາກສ່ວນກ່ຽວຂ້ອງເຂົ້າຮ່ວມ, ການເຄື່ອນໄຫວເຮັດວຽກຄັ້ງນີ້ ໄດ້ຮັບຟັງການລາຍງານໂດຍຫຍໍ້ ຈາກທາງຮອງເຈົ້າເມືອງຈອມເພັດ, ລວມທັງຄະນະຊີ້ນຳໂຄງການກໍ່ສ້າງເຂື່ອນໄຟຟ້ານໍ້າຂອງ ແລະອົງການປົກຄອງບ້ານ ຍົກໃຫ້ເຫັນບັນຫາສຳຄັນພາຍໃນບ້ານ ແລະ ໃນການດຳລົງຊີວິດຂອງປະຊາຊົນ,
ຈາກນັ້ນ ປະຊາຊົນພາຍໃນບ້ານຫ້ວຍແຂ້ ໄດ້ສະເໜີຄຳເຫັນ ເພື່ອໃຫ້ພາກສ່ວນກ່ຽວຂ້ອງ ໄດ້ບັນທຶກເອົາບັນຫາທີ່ປະຊາຊົນສະເໜີ ແລ້ວລາຍງານຕໍ່ຄະນະປະຈຳສະພາປະຊາຊົນແຂວງ ຮັບຮູ້ ແລະມີທິດຊີ້ນຳໃນຕໍ່ໜ້າ. ຕອນທ້າຍກອງປະຊຸມ ຮອງປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ໄດ້ມີຄຳເຫັນເນັ້ນໜັກໃຫ້ພາກສ່ວນທີ່ກ່ຽວຂ້ອງຂອງເມືອງ ເອົາໃຈໃສ່ແກ້ໄຂບັນຫາການເປັນຢູ່ຂອງປະຊາຊົນ, ເປັນຕົ້ນ ການຈັດສັນທີ່ທຳການຜະລິດ ແລະ ເສັ້ນທາງເຂົ້າໄປຫາບ້ານ ເພື່ອໃຫ້ປະຊາຊົນໄດ້ຮັບການພັດນາທາງດ້ານການເປັນຢູ່ໃຫ້ດີຂຶ້ນ.
ຂ່າວໂດຍ ເພັດສະໝອນ ທຳມຸງຄຸນ