ເພື່ອເປັນການຊຸກຍູ້, ຕິດຕາມກວດກາການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ແຜນພັດທະນາເສດຖະກິດ, ແຜນງົບປະມານ 6 ເດືອນທ້າຍ ປີ 2023 ຕາມມະຕິ ກອງປະຊຸມຂອງສະພາປະຊາຊົນ ນະຄອນຫຼວງວຽງຈັນ, ໃນຕອນເຊົ້າ ວັນທີ 07 ພະຈິກ 2023, ທ່ານ ນາງ ພິດສະໄໝ ຕົ້ນສະຫວັນ ຮອງປະທານຄະນະກຳມະການເສດຖະ ກິດ, ແຜນການ ແລະ ການເງິນ ສະພາປະຊາຊົນ ນວ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາ ແລະ ຊຸກຍູ້ວຽກງານຂົງເຂດອຸດສາຫະກຳ ແລະ ການຄ້າ ນວ, ໂດຍການຕ້ອນຮັບຂອງ ທ່ານ ນາງ ວັນມະນີ ພິມມະສານ ຫົວໜ້າພະແນກອຸດສາຫະກຳ ແລະ ການຄ້າ ນວ, ມີບັນດາທ່ານຫົວໜ້າ-ຮອງຫົວໜ້າ ຂະແໜງການ ໄດ້ໃຫ້ການເຂົ້າຮ່ວມ.

ໃນການລົງເຮັດວຽກຄັ້ງນີ້, ທ່ານ ນາງ ວັນມະນີ ພິມມະສານ ໄດ້ລາຍງານໃຫ້ຊາບວ່າ: ໃນໄລຍະ 9 ເດືອນຜ່ານມາ ພະແນກອຸດສາຫະກຳ ແລະ ການຄ້າ ໄດ້ມັບພັນທະຄ່າທຳ ນຽມ ແລະ ຄ່າບໍລິການ ລວມມູນຄ່າ 3.032.530.000 ກີບ ທຽບໃສ່ແຜນທີ່ໄດ້ຮັບມອບໝາຍ ປີ 2023 ທັງໝົດ 2.850.000.000 ກີບ ແມ່ນປະຕິບັດໄດ້ 106,4%. ການຈັດຕັ້ງປະຕິບັດວຽກງານອຸດສາຫະກຳ, ປະຈຸບັນ ສະຖິຕິໂຮງງານອຸດສາຫະກໍາ ແລະ ຫັດຖະກໍາ ມີຈຳນວນ 2.737 ໂຮງງານ; ໃນນີ້ ອຸດສາຫະກໍາປຸງແຕ່ງ 2.563 ໂຮງງານ ແລະ ຫັດຖະກໍາ 174 ໂຮງງານ, ມີທຶນທັງໝົດ 5.426,84 ຕື້ກັບ ທຽບໃສ່ໄລຍະດຽວກັນຂອງປີຜ່ານມາ ຫຼຸດລົງ (-109) ໂຮງງານ ເທົ່າກັບ 15,62%. ວຽກງານດ້ານການຄ້າ ຕົວເລກການນໍາເຂົ້າ ປີ 2023 ທີ່ໄດ້ຮັບຈາກກົມພາສີ (ກະຊວງການເງິນ) ໂດຍຜ່ານ ກົມນຳເຂົ້າ ແລະ ສົ່ງອອກ (ກະຊວງອຸດສາຫະກຳ ແລະ ການຄ້າ) ທຽບໃສ່ໄລຍະດຽວກັນ ຂອງປີ 2022 ເຫັນວ່າຫຼຸດລົງ (-24,80%) ການນຳເຂົ້າມີການຫຼຸດລົງ ຍ້ອນການນຳເຂົ້າສິນຄ້າປະເພດ ສິນຄ້າຟຸມເຟີຍ, ເຄື່ອງອຸປະກອນອີເລັກໂທຣນິກ ແລະ ສື່ສານ, ເພັດນຳເຂ້າຫຼຸດລົງ; ທຽບໃສ່ແຜນການຈັດຕັ້ງປະຕິບັດການນຳເຂົ້າຂອງປີ ໃນໄລຍະ 09 ເດືອນຜ່ານມາ ປະຕິບັດໄດ້ 52,12% ແລະ ຕົວເລກສົ່ງອອກ ປີ 2023 ທຽບໃສ່ໄລຍະດຽວກັນຂອງປີ 2022 ເຫັນວ່າຫຼຸດລົງ (-27,70%) ການສົ່ງອອກສິນຄ້າຫຼຸດລົງ ຍ້ອນສົ່ງອອກສິນຄ້າປະເພດ ເຄື່ອງປ່າຂອງດົງ, ໂລຫະ ແລະ ເສດຕ່າງໆ; ທຽບໃສ່ແຜນການຈັດຕັ້ງປະຕິບັດສົ່ງອອກຂອງປີ ໃນໄລຍະ 09 ເດືອນຜ່ານມາ ປະຕິບັດໄດ້ 57,92%. ໃນໂອກາດດັ່ງກ່າວ, ຄະນະຜູ້ແທນ ສະພາປະຊາຊົນ ນວ ໄດ້ມີຄໍາເຫັນແລກປ່ຽນຕໍ່ການລາຍງານຂອງພະແນກການ ແລະ ເຈາະຈິ້ມໃນບາງບັນຫາ ທີ່ເຫັນວ່າຍັງເປັນຫາງສຽງທາງສັງຄົມ ພ້ອມທັງນຳເອົາຄຳສະເໜີ, ຄຳຄິດເຫັນຂອງປະຊາຊົນທີ່ສະເໜີຜ່ານຜູ້ແທນສະພາ ໃນໄລຍະລົງພົບປະຜູ້ມີສິດເລືອກຕັ້ງ ເພື່ອນຳສະເໜີໃຫ້ພະແນກ ການໄດ້ມີຄຳເຫັນແລກປ່ຽນ ແລະ ຊີ້ແຈງຕໍ່ບັນຫາຕ່າງໆ ທີ່ຕິດພັນກັບຂົງເຂດຄວາມຮັບຜິດຊອບ, ພາລະບົດບາດ, ສິດ ແລະ ໜ້າທີ່ຂອງຕົນ.