(ສປນວ) ໃນຕອນເຊົ້າຂອງ ວັນທີ 16 ພຶດສະພາ 2023, ທ່ານ ນາງ ພິດສະໄໝ ຕົ້ນສະຫວັນ, ຮອງປະທານຄະນະກຳມະການເສດຖະກິດ, ແຜນການ ແລະ ການເງິນ ສະພາປະຊາຊົນ ນວ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ 6 ເດືອນຕົ້ນປີ 2023 ຢູ່ພະແນກການເງິນ ນວ ໂດຍການຕ້ອນຮັບຂອງ ທ່ານ ນາງ ພວງສີ ເພົ້າລາວັນ, ຮອງຫົວໜ້າພະແນກ ການເງິນ ນວ ແລະ ມີບັນດາຫົວໜ້າ, ຮອງຫົວໜ້າຂະແໜງການຂອງພະແນກ ແລະ ວິຊາການຈຳນວນໜຶ່ງ ເຂົ້າຮ່ວມ.
ໃນການລົງເຮັດວຽກຄັ້ງນີ້, ໄດ້ຮັບຟັງການຊີ້ແຈງຂອງພະແນກການເງິນ ນວ ຕໍ່ຄໍາຖາມເຈາະຈິ້ມຂອງສະພາປະຊາ ຊົນ ນວ ໃນການຈັດຕັ້ງແຜນພັດທະນາເສດຖະກິດ-ສັງຄົມ ປະຈຳປີ 2023, ຊີ້ແຈງຕໍ່ຄໍາສະເໜີຂອງປະຊາຊົນ ໃນບັ້ນລົງພົບປະຜູ້ມີສິດເລືອກຕັ້ງ ແລະ ຮັບຟັງການລາຍງານ ການຈັດຕັ້ງປະຕິບັດວຽກງານ 6 ເດືອນຕົ້ນປີ, ແຜນວຽກຈຸດສຸມ 6 ເດືອນທ້າຍປີ 2023 ຂອງພະແນກ ເຊິ່ງ ທ່ານ ນາງ ພວງສີ ເພົ້າລາວັນ, ຮອງຫົວໜ້າພະແນກການເງິນ ນວ ໄດ້ລາຍງານໃຫ້ຮູ້ວ່າ: ໃນໄລຍະຕົ້ນປີຜ່ານມາ ການຈັດຕັ້ງແຜນງົບປະມານ ແມ່ນໄດ້ອີງໃສ່ບັນດານິຕິກໍາຂອງຂັ້ນເທິງ ໃນການຈັດຕັ້ງຜັນຂະຫຍາຍ ເປັນຕົ້ນ ມະຕິຂອງສະພາປະຊາຊົນ ນວ ສະບັບເລກທີ 005/ສປນວ ລົງວັນທີ 10 ກຸມພາ 2023; ຄໍາແນະນໍາຂອງກະຊວງການເງິນ ແລະ ຄໍາແນະນໍາ ຂອງທ່ານເຈົ້າຄອງ ນວ ວ່າດ້ວຍການຈັດຕັ້ງປະຕິບັດແຜນງົບປະມານ ນວ ປະຈໍາປີ 2023 ໂດຍສະເພາະສຸມໃສ່ການຈັດຕັ້ງປະຕິບັດບັນດາມາດຕະການທີ່ຕິດພັນກັບວາລະແຫ່ງຊາດ ຕາມຂໍ້ຕົກລົງຂອງທ່ານເຈົ້າຄອງ ສະບັບເລກທີ 856/ຈນວ, ລົງວັນທີ 1 ພະຈິກ 2021 ແລະ ບົດບັນທຶກ ສະບັບຄັ້ງວັນທີ 23 ມີນາ 2022 ທີ່ທ່ານຮອງລັດຖະມົນຕີ ກະຊວງການເງິນ ໄດ້ເຊັນຮ່ວມກັບ ທ່ານຮອງເຈົ້າຄອງ ນວ; ໂດຍອີງໃສ່ບັນດາເນື້ອໃນເອກະ ສານດັ່ງກ່າວ, ການຈັດຕັ້ງປະຕິບັດແຜນງົບປະມານ 6 ເດືອນຕົ້ນປີ 2023 ດ້ານລາຍຮັບປະຕິບັດໄດ້ 2.569,96 ຕື້ກີບ ເທົ່າກັບ 44,40% ຂອງແຜນປີ, ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 48,28% ເປັນເງິນເທົ່າກັບ 836,79 ຕື້ກີບ. ດ້ານລາຍຈ່າຍ ທັງໝົດ 242,38 ຕື້ກີບ ເທົ່າກັບ 40,88% ຂອງແຜນປີ, ສົມທຽບກັບໄລຍະດຽວກັນປີຜ່ານມາ ເພິ່ມຂຶ້ນ 5,06% (ບໍ່ລວມລາຍຈ່າຍເງິນລົງທຶນຂອງລັດປົກກະຕິ) ເຊິ່ງສາມາດປະຕິບັດຄວາມດຸ່ນດ່ຽງໄດ້ 260,79 ຕື້ກີບ ເທົ່າກັບ 26,20% ຂອງແຜນການປີ. ຄຽງຄູ່ກັບການລາຍງານຜົນສໍາເລັດນັ້ນ ກໍໄດ້ຮັບຟັງບາງຂໍ້ຫຍຸ້ງຍາກໃນການ ຈັດຕັ້ງປະຕິບັດວຽກງານໃນໄລຍະຜ່ານມາ ເປັນຕົ້ນ ບັນຫາສະພາບການປ່ຽນແປງຂອງເງິນຕາທີ່ຜັນຜວນ, ອັດຕາແລກ ປ່ຽນຂອງເງິນຕາຕ່າງປະເທດສູງ ເຊິ່ງເປັນປັດໃຈໜຶ່ງທີ່ສ້າງຜົນກະທົບໃຫ້ຜູ້ປະກອບການ ແລະ ການລົງທຶນ ເຮັດໃຫ້ມີຜົນກະທົບຕໍ່ກັບຜົນກໍາໄລ ແລະ ການປະຕິບັດພັນທະໃຫ້ລັດ ບໍ່ທັນໄດ້ເຕັມເມັດເຕັມໜ່ວຍ; ບັນຫາຈາກບັນດາບໍລິສັດ ທີ່ແຈ້ງເສຍອາກອນດ້ວຍຕົນເອງ ສ່ວນໃຫຍ່ແຈ້ງແຕ່ອາກອນເງິນເດືອນ ແລະ ແຈ້ງອາກອນມູນຄ່າເພີ່ມຂ້ອນຂ້າງຕໍ່າ ແລະ ບັນຫາທີ່ຜູ້ປະກອບການຈຳນວນໜຶ່ງ ຍັງບໍ່ມີຄວາມຕື່ນຕົວ ເປັນເຈົ້າການປະຕິບັດໜ້າທີ່ການມອບພັນທະຂອງຕົນຕາມກຳ ນົດເວລາ.
ໃນຕອນທ້າຍກອງປະຊຸມ, ຄະນະລົງເຮັດວຽກ ກໍໄດ້ມີຄຳເຫັນແລກປ່ຽນ ແລະ ຮັບເອົາບາງບັນຫາ, ຂໍ້ຫຍຸ້ງຍາກທີ່ຄະນະຮັບຜິດຊອບໃນຂະແໜງການຕ່າງໆໄດ້ພົບພໍ້ ເພື່ອນຳສະເໜີຕໍ່ພາກສ່ວນກ່ຽວຂ້ອງພິຈາລະນາແກ້ໄຂ ແລະ ສະແດງຄວາມຍ້ອງຍໍຊົມເຊີຍຕໍ່ພະແນກການ ທີ່ໄດ້ຕັ້ງໜ້າປະຕິບັດໜ້າທີ່ດ້ວຍຄວາມຫ້າວຫັນ ໃຫ້ສືບຕໍ່ເອົາໃຈໃສ່ປະຕິບັດບັນດາຄາດໝາຍ ແລະ ທິດທາງໃນ 6 ເດືອນທ້າຍປີ 2023 ທີ່ກຳນົດໄວ້ໃຫ້ສຳເລັດບັນລຸຄາດໝາຍ.
