(ສປນວ) ເພື່ອເປັນການຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ຕາມມະຕິທີ່ສະພາປະຊາຊົນ ນະຄອນຫຼວງວຽງຈັນ ໄດ້ຮັບຮອງເອົາໃນກອງປະຊຸມ ແລະ ຕິດຕາມກວດກາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ ໃນໄລຍະ 9 ເດືອນຕົ້ນປີ, ແຜນວຽກຈຸດສຸມ 3 ເດືອນທ້າຍປີ 2022.  ໃນຕອນເຊົ້າຂອງວັນທີ 28 ຕຸລາ 2022, ທ່ານ ສົມບັດ ຈັນທະມາດ ປະທານຄະນະກຳມະການເສດຖະກິດ, ແຜນການ ແລະ ການເງິນ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາ ຢູ່ພະແນກໂຍທາທິການ ແລະ ຂົນສົ່ງ (ຍທຂ) ນວ ໂດຍການຕ້ອນຮັບຂອງ ທ່ານ ສຸລິວັນ ພົມມະຫາໄຊ ຫົວໜ້າພະແນກໂຍທາທິການ ແລະ ຂົນສົ່ງ ນວ

ຄະນະລົງເຮັດວຽກ ໄດ້ຮັບຟັງການລາຍງານການຈັດ ຕັ້ງປະຕິບັດວຽກງານຂອງ ພະແນກ ຍທຂ ເຊິ່ງໄລຍະຜ່ານມາໄດ້ເອົາໃຈໃສ່ຕິດ ຕາມກວດກາການເຄື່ອນ ໄຫວຮອບດ້ານຂອງບັນດາຂະແໜງ, ຕິດຕາມກວດກາການປະມູນຈັດຊື້-ຈັດຈ້າງໂຄງການກໍ່ສ້າງ ແລະ ສ້ອມແປງທີ່ຂຶ້ນກັບພະ ແນກ; ໃນນັ້ນ, ໄດ້ສ້ອມ ແປງບັນດາເສັ້ນທາງຫຼວງແຫ່ງຊາດຂອບເຂດ ນວ ຈຳນວນ 4 ເສັ້ນທາງ ມີລວງຍາວທັງໝົດ 159,3 ກິໂລແມັດ, ລວມມູນຄ່າ 19,50 ຕື້ກີບ ສຳເລັດ 100% ແລະ ສ້ອມແປງ, ບູລະນະເສັ້ນທາງໃນ ນວ ດ້ວຍການຕາບຂຸມດ້ວຍຢາງຂົ້ວ ມີເນື້ອທີ່ທັງໝົດ 3,042 ແມັດ ນຳໃຊ້ຢາງຂົ້ວ ຈຳນວນ 5,470 ເປົາ, ຖົມຂຸມໃຫຍ່ດ້ວຍດິນດີ 254,5 ມ³, ຕິດຕັ້ງຝາຕະແກງຂຸມຮັບນໍ້າໜ້າທາງ 38 ອັນ, ຕິດຕັ້ງຝາຂຸມພັກນໍ້າ (Manhole) ຈຳນວນ 22 ອັນ ແລະ ຕິດຕັ້ງຝາເບຕົງຮ່ອງນໍ້າ 09 ອັນ, ຢາຮອຍແຕກແຫງຕາມໜ້າ ທາງໂດຍນຳໃຊ້ຢາງນໍ້າ GRS2 ຈຳນວນ 10 ຟຸ້ຍ ເພື່ອໃຫ້ພື້ນຜິວການສັນຈອນໄດ້ຮັບການປົວແປງ ແລະ ສາມາດໄປມາໄດ້ສະດວກ, ຈັດຕັ້ງປະຕິບັດໄກ່ເກ່ຍຕາມແລວທາງ ລົດໄຟທີ່ຜ່ານ 04 ເມືອງຂອງ ນວ ມີລວງຍາວ 59,6 ກິໂລແມັດ ມີຕອນດິນທີ່ຖືກຜົນກະທົບ ທັງໝົດ 1,523 ຕອນ ປັດຈຸບັນປະຕິບັດສຳເລັດ 100%. ຄຽງຄູ່ກັນນັ້ນ, ໄດ້ປະສານສົມທົບກັບບັນດາຂະແໜງການ, ຫ້ອງການ ຍທຂ ເມືອງ ເພື່ອຂຶ້ນແຜນງົບປະ ມານ ເຊິ່ງໃນປີ 2022 ການຊຳລະໜີ້ສິນໂຄງການກໍ່ສ້າງພື້ນຖານ ສາມາດປະຕິບັດບັດໄດ້ ຄື: ບ້ວງລົງທຶນປົກກະຕິ (ໂຄງການສືບຕໍ່) 51 ໂຄງການ ປະຕິບັດໄດ້ 51,16%, ບ້ວງເປົ້າໝາຍສະເພາະ 8 ໂຄງການ ປະຕິບັດໄດ້ 29,03%, ບ້ວງຟື້ນຟູໄພພິບັດ 3 ໂຄງການ ປະຕິບັດໄດ້ 99,96%, ບ້ວງສົມທົບທຶນກັບໂຄງການເງິນກູ້ (ODA) 4 ໂຄງການ ປະຕິບັດໄດ້ 83,33%, ບ້ວງຈົດຮັບຈົດຈ່າຍ 4 ໂຄງການ ປະຕິບັດໄດ້ 93,59% ແລະ ຊວ້ງຊຳລະໜີ້ສູນ 49 ໂຄງ ການ ປະຕິບັດໄດ້ 99,42%, ນອກນັ້ນ ຍັງໄດ້ສຳເລັດການຈັດຕັ້ງປະຕິບັດບັນດາໂຄງການກໍ່ສ້າງປ້ອງກັນຕະຝັ່ງເຈື່ອນ ຈໍານວນ 02 ໂຄງການ ມີຄວາມຍາວ 810 ແມັດ. ປັດຈຸບັນສືບຕໍ່ກໍ່ສ້າງ 03 ໂຄງການຄື: ໂຄງການປ້ອງກັນຕະຝັ່ງເຈື່ອນດອນຊິງຊູ ເມືອງສີໂຄດຕະບອງ, ຄວາມຍາວ 5,760 ແມັດ ປະຕິບັດໄດ້ 85,63%; ໂຄງການປ້ອງກັນຕະຝັ່ງເຈື່ອນ ບ້ານຫ້ອມ ເມືອງຫາດຊາຍຟອງ, ຄວາມຍາວ 1,540 ແມັດ ປະຕິບັດໄດ້ 76,7% ແລະ ໂຄງການກໍ່ສ້າງປ້ອງກັນຕະຝັ່ງເຈື່ອນ ບ້ານຫ້ວຍຫາງ ເມືອງສັງທອງ, ຄວາມຍາວ 1,760 ແມັດ ປະຕິບັດໄດ້ 40%.

      ໃນຕອນທ້າຍກອງປະຊຸມ, ຄະນະລົງເຮັດວຽກ ກໍໄດ້ມີຄຳເຫັນແລກປ່ຽນ ແລະ ຮັບເອົາບາງບັນຫາ, ຂໍ້ຫຍຸ້ງ ຍາກຂອງຄະນະຮັບຜິດຊອບໃນຂະແໜງການຕ່າງໆ ເພື່ອນຳສະເໜີຕໍ່ພາກສ່ວນກ່ຽວຂ້ອງພິຈາລະນາແກ້ໄຂ ແລະ ສະ ແດງຄວາມຍ້ອງຍໍຊົມເຊີຍຕໍ່ພະແນກ ຍທຂ ທີ່ໄດ້ຕັ້ງໜ້າປະຕິບັດໜ້າທີ່ດ້ວຍຄວາມຫ້າວຫັນ ໃຫ້ສືບຕໍ່ເອົາໃຈໃສ່ປະຕິບັດບັນດາຄາດ ໝາຍ ແລະ ທິດທາງໃນຕໍ່ໜ້າທີ່ກຳນົດໄວ້ໃຫ້ບັນລຸຄາດໝາຍ.