ໃນລະຫວ່າງວັນທີ 8-9 ກໍລະກົດ 2024 ທ່ານ ນ. ສົມພອນ ໂສພິລາວັນ ຮອງປະທານສະພາປະຊາຊົນແຂວງ ຜູ້ຊີ້ນຳວຽງານຂົງເຂດວັດທະນາທຳ-ສັງຄົມ ແລະ ບັນດາເຜົ່າ ພ້ອມດ້ວຍທີມງານລົງ ຊຸກຍູ້ ແລະ ຕິດຕາມກວດກາ ການຈັດຕັ້ງປະຕິບັດວຽກງານຂອງຂົງເຂດວັດທະນາທຳ-ສັງຄົມ ແລະ ບັນດາເຜົ່າ ຢູ່ເມືອງຄຳ, ເປັນກຽດເຂົ້າຮ່ວມຂອງທ່ານ ວັນໄຊ ອິນປັນຍາ ຮອງເຈົ້າເມືອງໆຄຳ ຜູູ້ຊີ້ນຳວຽກງານຂົງເຂດວັດທະນາທຳ-ສັງຄົມ ແລະ ບັນດາເຜົ່າ; ມີບັນດາທ່ານ ຄະນະປະທານຄະນະກຳມະ ການ, ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງ, ຄະນະເລຂາທິການ, ການນຳຂອງເມືອງ,  ຫົວໜ້າ-ຮອງຫົວໜ້າຫ້ອງການທີ່ກ່ຽວຂ້ອງ ແລະ ພະນັກງານທີ່ຕິດຕາມທີມງານເຂົ້າຮ່ວມ.

ປະຕິບັດຕາມພາລະບົດ, ສິດ ແລະ ໜ້ທີ່ ຂອງສະພາປະຊາຊົນແຂວງ ໂດຍສະເພາະແມ່ນ ຄະນະກຳມະການ ວັດທະນາທຳ-ສັງຄົມ ແລະ ບັນດາເຜົ່າ ແລະ ເພື່ອເປັນການເກັບກຳຂໍ້ມູນ ເຂົ້າລາຍງານຢູ່ໃນກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II ໃນການຈັດຕັ້ງປະຕິບັດ, ເຄື່ອນໄຫວວຽກງານ ການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ນິຕິກຳຕ່າງໆ ຂອງບັນດາອົງການຂອງລັດໃນຂົງເຂດວັດທະນາທຳ-ສັງຄົມ ແລະ ບັນດາເຜົ່າ; ໃນໂອກາດດັ່ງກ່າວ ໄດ້ຮັບຟັງການລາຍງານຫຍໍ້ຂອງເມືອງ ແລະ ບັນດາຫ້ອງການຕາມຄຳຖາມເຈາະຈີ້ມຂອງຂະແໜງການກ່ຽວຂ້ອງ ໃນໄລຍະຜ່ານມາ ເຫັນວ່າມີວຽກງານ ໃນຫຼາຍດ້ານໄດ້ຮັບຜົນສຳເລັດ ເປັນຕົ້ນແມ່ນ ວຽກງານຍຸດທະສາດປົກປ້ອງສັງຄົມແຫ່ງຊາດ; ການສ້າງວິຊາຊີບວຽກເຮັດງານທຳ ແລະ ການພັດທະນາສີມືແຮງງານ; ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ;  ການປັບປຸງຄຸນນະພາບການຮຽນ-ການສອນ ຕິດພັນກັບການຈັດຕັ້ງປະຕິບັດວ່າລະແຫ່ງຊາດ ກ່ຽວກັບການແກ້ໄຂຢາເສບຕິດ ໃນຂົງເຂດການສຶກສາ; ສິດສະເໜີພາບຍິງ-ຊາຍ ແລະ ຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ; ການຄຸ້ມຄອງບັນດາຮ້ານອາຫານ, ຮ້ານບັນເທີງ, ໂຮງແຮມ ແລະ ເຮືອນພັກ ຄຽງຄູ່ກັບຜົນສຳເລັດຍັງມີວຽກງານບາງດ້ານມີຄວາມຫຍຸ້ງຫຍາກໃນການຈັດຕັ້ງປະຕິບັດ ບັນດາທ່ານເຂົ້າຮ່ວມໄດ້ເຈາະຈີ້ມ ແລະ ຍົກບັນຫາຂຶ້ນ ເພື່ອສົນທະນາແລກປ່ຽນຄຳຄິດຄຳເຫັນຢ່າງກົງໄປກົງມາ ໃນການວ່າງເປັນທິດທາງແຜນການ ແກ້ໄຂໃນຕໍ່ໜ້າ ໃຫ້ຖືກຕ້ອງສອດຄ່ອງກັບລະບຽບກົດໝາຍ  ໄດ້ຮັບຜົນສຳເລັດ ຕາມທິດທາງແຜນການ ແລະ ຄາດໝາຍທີ່ວາງໄວ້; ການລົງເຄື່ອນໄຫວວຽກງານຂອງທີມງານຍັງໄດ້ລົງໄປບ້ານ ນາເມືອງ, ເພື່ອຮັບຟັງການລາຍງານຂອງການຈັດຕັ້ງບ້ານ, ເຖົ້າແກ່ແນວໂຮມ ແລະ ປະ ຊາຊົນບັນດາເຜົ່າ ໃນການຄຸ້ມຄອງຊົນເຜົ່າ ແລະ ການຈັດຕັ້ງປະຕິບັດເຄື່ອນໄຫວວຽກງານທາງດ້ານສາສະໜາ ຢູ່ໃນພື້ນຖານຂອງທ້ອງຖິ່ນ.

ຕ່າງໜ້າທີມງານ ທ່ານ ນ. ສົມພອນ ໂສພິລາວັນ ຍັງໄດ້ມີຄຳຄິດຄຳເຫັນ ຕໍ່ການຈັດຕັ້ງປະຕິບັດວຽກງານໃນຂົງເຂດວັດທະນະທຳ-ສັງຄົມ ແລະ ບັນດາເຜົ່າ, ຮຽກຮ້ອງໃຫ້ທຸກພາກສ່ວນທີ່ກ່ຽວຂ້ອງ ເອົາໃຈໃສ່ ແລະ ມີຄວາມຮັບຜິດຊອບສູງ ຕໍ່ກັບໜ້າທີ່ວຽກງານທີ່ຕົນເອງຮັບຜິດຊອບ ໃຫ້ໄດ້ຮັບຜົນສຳເລັດຕາມທິດທາງ ແຜນການທີ່ວາງອອກ. ການລົງຕິດຕາມກວດກາໃນຄັ້ງນີ້ ແມ່ນໄດ້ຮັບທຶນສະໜັບສະໜູນຊ່ວຍເຫຼືອ ຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPs).

ສະພາປະຊາຊົນແຂວງຊຽງຂວາງ

ຂ່າວໂດຍ: ບຸນສີ ສິດທິເດດ