ໃນວັນທີ 22 ທັນວາ 2022 ຄະນະກໍາມະການຍຸຕິທໍາ ປກຊ – ປກສ ຂອງສະພາປະຊາຊົນແຂວງຫລວງນໍ້າທາ ໄດ້ເປີດກອງປະຊຸມ ສະຫລຸບຕີລາຄາ ການຈັດຕັ້ງປະຕິບັດ ບົດບັນທຶກການປະສານງານຮ່ວມປະຈຳປີ 2022 ລະຫວ່າງ ຄະນະກຳມະການ ຍຸຕິທຳ ແລະ ປກຊ – ປກສ ກັບ ອົງການທີ່ກ່ຽວຂ້ອງຂອງແຂວງ ຂຶ້ນທີ່ຫ້ອງປະຊຸມສະພາປະຊາຊົນແຂວງ ພາຍໃຕ້ການເປັນປະທານຂອງທ່ານ ບຸນສົມ ທຳມະວົງ ສະມາຊິກສະພາປະຊາຊົນແຂວງ ຮອງປະທານຄະນະກຳມະການ ປກຊ-ປກສ ມີຄະນະເລຂາທິການ, ອົງການທີ່ກ່ຽວຂ້ອງຂົງເຂດຍຸຕິທໍາຂອງແຂວງ, ຫົວໜ້າ, ຮອງຫົວໜ້າ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ 16 ຄົນ.

ກອງປະຊຸມໄດ້ຮັບຟັງຜ່ານຮ່າງບົດສະຫລຸບ ການຈັດຕັ້ງປະຕິບັດວຽກງານປະຈຳປີ 2022 ແລະ ທິດທາງແຜນການປະຈຳປີ 2023 ຂອງຄະນະກໍາມະການຍຸຕິທໍາ ປກຊ – ປກສ ຂອງສະພາປະຊາຊົນແຂວງຫລວງນໍ້າທາ ຊຶ່ງໃນໄລຍະ 1 ປີຜ່ານມາ ຄະນະກຳມະການຍຸຕິທຳ ປກຊ-ປກສ ໄດ້ຈັດຕັ້ງປະຕິບັດຕາມພາລະບົດບາດ, ສິດ ແລະ ໜ້າທີ່ຂອງຕົນໄດ້ສຳເລັດເປັນຕົ້ນ ການປະຕິບັດພາລະບົດບາດດ້ານນິຕິກຳ, ດ້ານການຕົກລົງບັນຫາສຳຄັນຂອງທ້ອງຖິ່ນ ແລະ ດ້ານການຕິດຕາມກວດກາ ເຫັນວ່າມີຜົນສຳເລັດຫລາຍສົມຄວນ ແລະ ຈະສູ້ຊົນຈັດຕັ້ງປະຕິບັດແຜນການປະຈຳປີ 2023 ໃຫ້ສຳເລັດ, ມີຄຸນນະພາບໃຫ້ດີຂື້ນກວ່າເກົ່າ.

ພ້ອມດຽວກັນ ປະທານກອງປະຊຸມຍັງມີຄຳຖາມເຈາະຈິ້ມບາງບັນຫາ ເພື່ອປະກອບຄຳຄິດເຫັນຕໍ່ຮ່າງບົດສະຫລຸບການຈັດຕັ້ງປະຕິບັດວຽກງານປະຈຳປີ 2022 ແລະ ທິດທາງແຜນການປະຈຳປີ 2023 ຂອງຄະນະກຳມະການຍຸຕິທຳ ປກຊ – ປກສ ແລະ ປະກອບຄຳຄິດເຫັນ ຕໍ່ການຈັດຕັ້ງປະຕິບັດ ບົດບັນທຶກການປະສານງານຮ່ວມ ລະຫວ່າງ ຄະນະກຳມະການຍຸຕິທຳ ປກຊ – ປກສ ກັບ ອົງການທີ່ກ່ຽວຂ້ອງຂອງແຂວງ ໃນໄລຍະ 1 ປີຜ່ານມາ ຢ່າງກົງໄປກົງມາ ເພື່ອເຮັດໃຫ້ບົດສະຫລຸບດັ່ງກ່າວມີເນື້ອໃນຖຶກຕ້ອງສົມບຸນຂື້ນກວ່າເກົ່າ ແລະ ເຮັດໃຫ້ບົດບັນທຶກການປະສານງານ ໄດ້ຮັບການປັບປຸງ, ແກ້ໄຂຈຸດບົກຜ່ອງໃນການຈັດຕັ້ງປະຕິບັດໄລຍະຜ່ານມາ ໃຫ້ດີຂື້ນກວ່າເກົ່າ ແລະ ພ້ອມກັນຈັດຕັ້ງປະຕິບັດໃຫ້ໄດ້ຮັບຜົນປະໂຫຍດສູງສຸດ.