ເພື່ອຮັບປະກັນໃຫ້ແກ່ການປະສານງານລະຫວ່າງ ຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນແຂວງ ກັບກອງບັນຊາການທະຫານແຂວງ, ກອງບັນຊາການປ້ອງກັນຄວາມສະຫງົບແຂວງ, ສານປະຊາຊົນແຂວງ, ອົງການໄອຍະການປະຊາຊົນແຂວງ ແລະ ພະແນກຍຸຕິທຳແຂວງ, ສະຫະພັນນັກຮົບເກົ່າແຂວງ ໃຫ້ເຂົ້າສູ່ລະບຽບຫລັກການ ທັງຮັບປະກັນປະສິດທິຜົນໃນການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ.

ຕອນບ່າຍຂອງວັນທີ 06 ເມສາ 2022 ນີ້ຢູ່ທີ່ຫ້ອງປະຊຸມຂອງສະພາປະຊາຊົນແຂວງ ໄດ້ຈັດພິທີເຊັນບົດບັນທຶກການຕົກລົງຮ່ວມລະຫວ່າງຄະນະກຳມະການຍຸຕິທຳ ແລະ ປກຊ-ປກສ ກັບອົງການທີ່ກ່ຽວຂ້ອງໂດຍການເປັນປະທານຂອງ ທ່ານ ຈັນທະສຸລິນ ໝັ້ນປະດິດ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ່ 3 ແຂວງຫລວງນ້ຳທາ ປະທານຄະນະກຳມະການຍຸຕິທຳແລະປກຊ-ປກສ, ໃຫ້ກຽດເຂົ້າຮ່ວມໂດຍ ທ່ານ ກົງເພັດ ແກ້ວບົວພາ ກຳມະການພັກແຂວງ ຮອງປະທານສະພາປະຊາຊົນແຂວງ, ເຂົ້າຮ່ວມມີບັນດາທ່ານຫົວໜ້າ, ຫົວ  ຫນ້າກອງບັນຊາການທະຫານແຂວງ, ກອງບັນຊາການປ້ອງກັນຄວາມສະຫງົບ, ພະແນກຍຸຕິທຳແຂວງ, ສານປະຊາຊົນແຂວງ, ອົງການໄອຍະການປະຊາຊົນ, ສະຫະພັນນັກຮົບເກົ່າເຂົ້າຮ່ວມທັງໝົດ 19 ທ່ານ, ຍິງ 3 ທ່ານ.

ໃນພິທີໄດ້ຮັບຟັງການຜ່ານຮ່າງບົດບັນທືກຮ່ວມລະຫວ່າງຄະນະກຳມະການຍຸຕິທຳ ແລະ ປກຊ-ປກສ ກັບກອງບັນຊາການທະຫານແຂວງ, ຮ່າງບົດບັນທຶກລະຫວ່າງຄະນະກຳມະການຍຸຕິທຳແລະ ປກຊ-ປກສ ກັບສະຫະພັນນັກຮົບເກົ່າແຂວງ ແລະ ຜ່ານບົດບັນທຶກຮ່ວມລະຫວ່າງຄະນະກຳມະການຍຸຕິທຳ ແລະ ປກຊ-ປກສ ກັບອົງການໄອຍະການປະຊາຊົນ, ສານປະຊາຊົນ ແລະ ພະແນກຍຸຕິທຳແຂວງ, ເຊິ່ງມີທັງໝົດ 9 ມາດຕາ.

ພ້ອມນັ້ນບັນດາທ່ານທີເຂົ້າຮ່ວມກອງປະຊຸມໄດ້ພ້ອມກັນປະກອບຄຳເຫັນຢ່າງມີຈຸດສຸມເພື່ອເຮັດໃຫ້ບົດບັນທຶກການຕົກລົງຮ່ວມດັ່ງກ່າວມີເນື້ອໃນຄົບຖ້ວນ, ສົມບູນຂຶ້ນກວ່າເກົ່າເປັນຕົ້ນແມ່ນຈຸດປະສົງຂອງບົດບັນທຶກຮ່ວມ, ຫລັກການປະສານງານ, ເນື້ອໃນ ແລະ ບັນດາວຽກງານປະສານງານ, ເນື້ອໃນ ແລະ ບັນດາວຽກປະສານງານ, ສິດ ແລະ ໜ້າທີ່ຂອງຜູ້ປະສານງານ, ວິທີການພົວພັນປະສານງານ, ຜູ້ປະສານງານ, ລະບອບປະຊຸມ ແລະ ມາດຕະການຈັດຕັ້ງປະຕິບັດ.

ພາບ ແລະ ຂ່າວນາງ ອຳພອນ ສີປະເສີດ