(ສພຊ) ເພື່ອເປັນການສະຫຼຸບຕີລາຄາການເຄື່ອນໄຫວວຽກງານກວດກາ ປະຈໍາປີ 2022 ຂອງຄະນະກວດກາພັກ-ລັດສະພາແຫ່ງຊາດ; ເຜີຍແຜ່ຜົນສໍາເລັດກອງປະຊຸມວຽກງານກວດກາທົ່ວປະເທດ ປະຈໍາປີ 2022 ແລະ ປາຖະກະຖາວັນສ້າງຕັ້ງອົງການກວດກາພັກ-ລັດ ຄົບຮອບ 41 ປີ (16/02/1982-16/02/2023) ທີ່ສະພາແຫ່ງຊາດ ຄະນະກວດກາພັກ-ລັດ ສະພາແຫ່ງຊາດ ໄດ້ຈັດກອງປະຊຸມສະຫຼຸບຕີລາຄາການເຄື່ອນໄຫວວຽກງານກວດກາ ປະຈໍາປີ 2022 ໂດຍການເປັນປະທານຂອງສະຫາຍ ຄໍາໃບ ດໍາລັດ ກໍາມະການສູນກາງພັກ, ປະທານກວດກາພັກ-ລັດ ສະພາແຫ່ງຊາດ, ຮອງປະທານສະພາແຫ່ງຊາດ; ໂດຍການເຂົ້າຮ່ວມຂອງສະຫາຍ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງເລຂາຄະນະບໍລິຫານງານພັກສະພາແຫ່ງຊາດ, ຮອງປະທານສະພາແຫ່ງຊາດ, ມີບັນດາສະຫາຍເລຂາ-ຮອງເລຂາ, ປະທານ-ຮອງປະທານກວດກາ ແລະ ກໍາມະການໜ່ວຍພັກຮາກຖານ, ຄະນະພັກຮາກຖານ, ຜູ້ກວດກາໜ່ວຍພັກທີ່ຂຶ້ນກັບຄະນະພັກຮາກຖານ ແລະ 3 ອົງການຈັດຕັ້ງມະຫາຊົນ ພາຍໃນສະພາແຫ່ງຊາດ ແລະ ແຂກຖືກເຊີນ.

ກອງປະຊຸມໄດ້ຮັບຟັງການປາຖະກະຖາມູນເຊື້ອວັນສ້າງຕັ້ງອົງການກວດກາ ພັກ-ລັດ ຄົບຮອບ 41 ປີ (16/02/1982-16/02/2023); ການເຜີຍແຜ່ຜົນສໍາເລັດກອງປະຊຸມວຽກງານກວດກາທົ່ວປະເທດ ປະຈໍາປີ 2022, ທິດທາງຄາດໝາຍສູ້ຊົນວຽກງານກວດກາ ປະຈໍາປີ 2023 ຂອງຄະນະກວດກາສູນກາງພັກ ແລະ ອົງການກວດກາແຫ່ງລັດ; ເຜີຍແຜ່ບົດສະຫຼຸບການເຄື່ອນໄຫວວຽກງານກວດກາ ປະຈໍາປີ 2022 ແລະ ທິດທາງແຜນການເຄື່ອນໄຫວວຽກງານ ປະຈໍາປີ 2023 ຂອງຄະນະກວດກາພັກ-ລັດສະພາແຫ່ງຊາດ; ຮັບຟັງການປະກອບຄໍາຄິດຄໍາເຫັນຈາກບັນດາສະຫາຍທີ່ເຂົ້າຮ່ວມກອງປະຊຸມ ໃສ່ບົດສະຫຼຸບດັ່ງກ່າວ. ຈາກນັ້ນ ກອງປະຊຸມ ກໍໄດ້ຮັບຟັງການໂອ້ລົມຂອງສະຫາຍ ຮອງເລຂາຄະນະບໍລິຫານງານພັກສະພາແຫ່ງຊາດ.

(ພາບ ແລະ ຂ່າວ: ສອນສັກ ວັນວິໄຊ)