ຕອນເຊົ້າ ວັນທີ 15 ກໍລະກົດ 2022 ນີ້, ທ່ານ ທອງພັນ ພັດທະວົງ ກຳມະການຄະນະປະຈຳ, ປະທານຄະນະກຳມະການ ຍຸຕິທຳ, ປ້ອງກັນຊາດ ແລະ ປ້ອງກັນຄວາມສະຫງົບ ສະພາປະຊາຊົນແຂວງ ທັງເປັນສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງຊຳເໜືອ, ພ້ອມດ້ວຍທີມງານ ຕາງໜ້າສະພາປະຊາຊົນແຂວງ ລົງມອບເຄື່ອງຊ່ວຍເຫລືອ ໃຫ້ຄອບຄົວ ທ່ານ ນູຍີ່ຢ່າງ ອາຍຸ 50 ປີ ອາຊີບ ປະຊາຊົນ, ພາຍໃນຄອບຄົວ ມີສະມາຊິກທັງໝົດ 6 ຄົນ ຍິງ 3 ຄົນ ຢູ່ບ້ານ ພູຫລວງ ເມືອງ ຊຳເໜືອ ແຂວງ ຫົວພັນ ທີ່ຖືກເຄາະຮ້າຍໄຟໄໝ້ເຮືອນ ໃນຕອນແລງ ຂອງວັນທີ 7 ກໍລະກົດ 2022 ສາເຫດໄຟຟ້າລັດວົງຈອນ, ເຮັດໃຫ້ເກີດໄຟໄໝ້ເຮືອນ 1 ຫລັງ ແລະ ເຄື່ອງໃຊ້, ວັດຖຸພາຍໃນເຮືອນ ລວມມູນຄ່າເສຍຫາຍທັງໝົດ 60 ລ້ານກວ່າກີບ. ເຄື່ອງທີ່ນຳໄປຊ່ວຍເຫລືອ ມີ ເຄື່ອງນຸ່ງຫົ່ມ ແລະ ອຸປະກອນຮັບໃຊ້ຄົວເຮືອນ ລວມມູນຄ່າທັງໝົດ 1.600.000 ກວ່າກີບ. ການມອບເຄື່ອງຊ່ວຍເຫລືອຄັ້ງນີ້ ຍັງມີນາຍບ້ານ ພ້ອມດ້ວຍສະມາຊິກພາຍໃນຄອບຄົວ ເຂົ້າຮ່ວມເປັນສັກຂີພິຍານນຳ.

ໂອກາດນີ້, ທ່ານ ຍັງໄດ້ສະແດງຄວາມເສຍໃຈຕໍ່ເຫດການທີ່ເກີດຂຶ້ນ ແລະ ຮຽກຮ້ອງມາຍັງຄອບຄົວທີ່ຖືກຜົນກະທົບ ຈົ່ງມີສະຕິໃນການນຳໃຊ້ໄຟ ເຂົ້້າໃນການຮັບໃຊ້ຊີວິດປະຈຳວັນໃຫ້ດີຂຶ້ນກວ່າເກົ່າ ເພື່ອບໍ່ໃຫ້ເຫດການດັ່ງກ່າວເກີດຂຶ້ນໃນຕໍ່ໜ້າ, ພ້ອມກັນເປັນເຈົ້າການ ເອົາໃຈໃສ່ສ້າງເສດຖະກິດຄອບຄົວ ໃຫ້ນັບມື້ດີຂຶ້ນ.

ພາບ ແລະ ຂ່າວໂດຍ ນັກຂ່າວ ສພຂ ຫົວພັນ.