(ສພຊ) – ວັນທີ 23 ທັນວານີ້ ທີ່ຫ້ອງປະຊຸມຫ້ອງວ່າການແຂວງໄຊຍະບູລີ ໄດ້ມີກອງປະຊຸມຄົບຄະນະປະຈໍາປີ 2024 ຂອງຄະນະສະມາຊິກສະພາແຫ່ງຊາດ (ຄສຊ) ປະຈໍາເຂດເລືອກຕັ້ງທີ 7 ແຂວງໄຊຍະບູລີ ໂດຍການເປັນປະ ທານຂອງທ່ານ ເພັງນິລັນ ຄໍາພັນເພັງ ຮອງເລຂາພັກແຂວງ, ປະທານ ຄສຊ ປະຈໍາເຂດເລືອກຕັ້ງທີ 7; ເຂົ້າຮ່ວມມີທ່ານ ພົທ. ສຸວອນ ເລືອງບຸນມີ ກຳມະການສູນກາງພັກ, ຮອງປະທານສະພາແຫ່ງຊາດ, ສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 7, ບັນດາທ່ານຮອງເຈົ້າແຂວງ, ເຈົ້າເມືອງ-ຮອງເຈົ້າເມືອງ, ຫົວໜ້າ-ຮອງພະແນກການການ, ອົງການ, ກົມກອງ ແລະ ແຂກຖືກເຊີນ.
ທ່ານ ເພັງນິລັນ ຄໍາພັນເພັງ ກ່າວໃນພິທີເປີດວ່າ: ບັນດາເນື້ອໃນຂອງກອງປະຊຸມຄັ້ງນີ້ ລ້ວນແຕ່ເປັນເນື້ອໃນທີ່ສໍາຄັນ ເຊິ່ງເປັນໜ້າທີ່ ແລະ ຄວາມຮັບຜິດຊອບໃນການຕິດຕາມກວດກາລະຫວ່າງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ກັບ ອົງການປົກຄອງແຂວງ ແລະ ພາກສ່ວນກ່ຽວຂ້ອງ ເພື່ອເຮັດໃຫ້ການຈັດຕັ້ງການເຄື່ອນໄຫວວຽກງານ ມີປະສິດທິພາບ ແລະ ປະສິດທິຜົນດີຂຶ້ນເປັນກ້າວໆ; ພ້ອມນັ້ນ, ຍັງເນັ້ນໜັກໃຫ້ຜູ້ແທນກອງປະຊຸມ ຈົ່ງຍົກສູງຄວາມຮັບຜິດຊອບໃນການລາຍງານ, ຊີ້ແຈງ ແລະ ປະກອບຄໍາເຫັນຢ່າງເລິກເຊິ່ງ, ພາວະວິໄສ ແນໃສຮັບປະກັນເນື້ອໃນທີ່ນໍາມາຄົ້ນຄວ້າພິຈາລະນາຄັ້ງນີ້ ໄດ້ຖືກຮັບຮອງ ເພື່ອເປັນພື້ນຖານໃນການຈັດຕັ້ງປະຕິບັດຂັ້ນຕໍ່ໄປ.
ຜູ້ແທນກອງປະຊຸມໄດ້ສຸມໃສ່ຄົ້ນຄວ້າ, ພິຈາລະນາ ແລະ ປະກອບຄໍາເຫັນໃສ່ບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ປະຈຳປີ 2024 ແລະ ທິດທາງແຜນການປະຈຳປີ 2025; ການຈັດຕັ້ງປະຕິບັດໂຄງການລົງທຶນຂອງລັດ, ເອກະຊົນພາຍໃນ ແລະ ຕ່າງປະເທດ ທີ່ສູນກາງຄຸ້ມຄອງ ຈັດຕັ້ງປະຕິບັດຢູ່ແຂວງໄຊຍະບູລີ ປະຈໍາປີ 2024 ແລະ ທິດທາງແຜນ ການປີ 2025; ການຈັດຕັ້ງປະຕິບັດລາຍຮັບພູດສູນກາງຄຸ້ມຄອງ ທີ່ຈັດຕັ້ງປະຕິບັດຢູ່ແຂວງໄຊຍະບູລີ ປະຈໍາປີ 2024 ແລະ ທິດທາງແຜນການປີ 2025; ການປະກອບຄໍາເຫັນຂອງຕາງໜ້າ ຄສຊ ປະຈໍາເຂດເລືອກຕັ້ງທີ 7 ຕໍ່ 3 ບົດລາຍງານດັ່ງກ່າວຂອງອົງການປົກຄອງແຂວງ; ການຊີ້ແຈງກ່ຽວກັບການແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ ຕິດພັນກັບມາດຕະການຈັດຕັ້ງປະຕິບັດໂຄງການລົງທຶນຂອງລັດ, ທຶນຊ່ວຍເຫຼືອລ້າ ແລະ ກູ້ຢືມ, ການລົງທຶນເອກະຊົນພາຍໃນ ແລະ ຕ່າງປະເທດ ທີ່ສູນກາງຄຸ້ມຄອງ ປະຈຳປີ 2024; ກົນໄກ, ມາດຕະການຈັດຕັ້ງປະຕິບັດລາຍຮັບພູດສູນກາງຢູ່ແຂວງ ປີ 2024; ການຈັດຕັ້ງປະຕິບັດໂຄງການລົງທຶນຂອງລັດ ແລະ ODA ທີ່ສູນກາງຄຸ້ມຄອງຢູ່ແຂວງໄຊຍະບູລີ ໃນໄລຍະຜ່ານມາ ປະຈຳປີ 2024 ແລະ ທິດທາງແຜນການປະຈຳປີ 2025; ການຈັດຕັ້ງປະຕິບັດແຜນການເຄື່ອນ ໄຫວວຽກງານປະຈໍາປີ 2024 ແລະ ທິດທາງແຜນການປີ 2025 ຂອງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 7.
ໃນຕອນທ້າຍ, ກອງປະຊຸມໄດ້ຮັບຮອງເອົາມະຕິກອງປະຊຸມ ວ່າດ້ວຍການຮັບຮອງເອົາບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2024 ແລະ ທິດທາງແຜນການປະຈໍາປີ 2025 ຂອງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 7 ແລະ ມະຕິກອງປະຊຸມວ່າດ້ວຍການຮັບຮອງເອົາບົດລາຍງານຂອງອົງການປົກ ຄອງແຂວງ ກ່ຽວກັບການຈັດຕັ້ງປະຕິບັດໂຄງການລົງທຶນຂອງລັດ, ເອກະຊົນ ທີ່ສູນກາງຄຸ້ມຄອງ; ລາຍຮັບພູດສູນກາງຄຸ້ມຄອງ ຢູ່ແຂວງໄຊຍະບູລີ ປະຈໍາປີ 2024 ແລະ ທິດທາງແຜນການປະຈໍາປີ 2025.
(ນາງ ອາລິນ ສຸພິມມະປະດິດ)