(ສພຊ) – ໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ (ສພຊ) ຊຸດທີ IX ວັນທີ 29 ພະຈິກ 2024, ທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ ຕາງໜ້າໃຫ້ແກ່ຄະນະກຳມະການລະດັບຊາດປັບປຸງລັດຖະທຳມະນູນ ແຫ່ງ ສປປລາວ ສະບັບປີ 2015 (ຄລຊ) ໄດ້ລາຍງານຄວາມຄືບໜ້າໃນການປັບປຸງລັດຖະທໍາມະນູນ ເຊິ່ງທ່ານໃຫ້ຮູ້ວ່າ ນັບແຕ່ມື້ ຄລຊ ໄດ້ລາຍງານການກະກຽມວຽກງານຮອບດ້ານໃນການປັບປຸງລັດຖະທໍາມະນູນ ຕໍ່ກອງປະຊຸມສະໄໝສາມັນເທື່ອທີ 7 ຂອງ ສພຊ ຊຸດທີ IX ໃນວັນທີ 17 ມິຖຸນາ 2024 ເປັນຕົ້ນມາ, ຄະນະກໍາມະການລະດັບຊາດ ໄດ້ປະສານສົມທົບກັບພາກສ່ວນທີ່ກ່ຽວຂ້ອງທັງຢູ່ສູນກາງ ແລະ ທ້ອງຖິ່ນ ຈັດຕັ້ງປະຕິບັດບັນດາວຽກງານຈຸດສຸມ (15 ວຽກງານ) ໃນການປັບປຸງ ທີ່ໄດ້ສະເໜີຕໍ່ກອງປະຊຸມສະໄໝສາມັນເທື່ອ 7 ສໍາເລັດເປັນສ່ວນໃຫຍ່ ເຊິ່ງສະແດງອອກຄື:

1. ດໍາເນີນກອງປະຊຸມການປະເມີນຜົນການຈັດຕັ້ງປະຕິບັດລັດຖະທໍາມະນູນປີ 2015 ໃນຂອບເຂດທົ່ວປະເທດເປັນຄັ້ງທຳອິດ ເຊິ່ງມີພະນັກງານນໍາພາ-ຄຸ້ມຄອງຂັ້ນກະຊວງ-ອົງການ ຢູ່ຂັ້ນສູນກາງ, ຂັ້ນແຂວງ ແລະ ຂັ້ນເມືອງ ກໍຄືມະຫາວິທະຍາໄລຕ່າງໆ, ບັນດາວິທະຍາຄານຂອງກະຊວງປ້ອງກັນປະເທດ ແລະ ກະຊວງປ້ອງກັນຄວາມສະ ຫງົບ, ສະພາການຄ້າ ແລະ ອຸດສາຫະກໍາ ເຂົ້າຮ່ວມທັງໝົດ 13,039 ທ່ານ, ຍິງ 2,290 ທ່ານ ເຊິ່ງເປັນບັ້ນໃຫຍ່ບັ້ນໜຶ່ງໃນການປັບ ປຸງຄວາມຮັບຮູ້, ຄວາມເຂົ້າໃຈຕໍ່ລັດຖະທໍາມະນູນ ແລະ ກວດກາຕີລາຄາການຈັດຕັ້ງປະຕິບັດລັດຖະທໍາມະນູນໃນທົ່ວລະບົບການເມືອງ; ໃນບັ້ນນີ້, ບັນດາທ່ານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ກໍຄືຄະນະປະຈຳສະພາປະຊາຊົນຂັ້ນແຂວງ ໂດຍສະເພາະບັນດາທ່ານປະທານ, ຮອງປະທານສະພາປະຊາຊົນຂັ້ນແຂວງ ໄດ້ເປັນເຈົ້າການ ແລະ ຍົກສູງຄວາມຮັບຜິດຊອບໃນການນຳພາ-ຊີ້ນຳການດໍາເນີນກອງປະຊຸມປະເມີນຜົນການຈັດຕັ້ງປະຕິບັດລັດຖະທຳມະນູນດັ່ງກ່າວ ຢູ່ແຂວງຂອງຕົນ ແລະ ນະຄອນຫຼວງວຽງຈັນ ສຳເລັດຜົນເປັນຢ່າງດີ.

2. ເປີດໂອກາດໃຫ້ມີການປະກອບຄໍາເຫັນຢ່າງກວ້າງຂວາງຂອງບຸກຄົນ, ນິຕິບຸກຄົນ ແລະ ການຈັດຕັ້ງ ຜ່ານທາງສື່ຕ່າງໆ ເປັນຕົ້ນຜ່ານທາງອີເມວຂອງຄະນະກໍາມະການລະດັບຊາດປັບປຸງລັດຖະທໍາມະນູນ ແລະ ເວັບໄຊຂອງສະພາແຫ່ງຊາດ ໂດຍຕິດພັນກັບການຈັດຕັ້ງປາຖະກະຖາ, ໂຄສະນາເຜີຍແຜ່ ແລະ ສະເຫຼີມສະຫຼອງວັນລັດຖະທຳ ມະນູນແຫ່ງຊາດ ຄົບຮອບ 33 ປີ ເຊິ່ງໄດ້ສ້າງໂອກາດໃຫ້ປະຊາຊົນບັນດາຊັ້ນຄົນ ແລະ ເຜົ່າຕ່າງໆ ໄດ້ຫວນຄືນເຖິງລັດຖະທຳມະນູນ ຂອງ ສາທາລະນະລັດ ປະຊາທິປະໄຕ ປະຊາຊົນລາວ ຕື່ມອີກເທື່ອໜຶ່ງ.

3. ຄົ້ນຄວ້າ ແລະ ຍາດແຍ່ງເອົາບົດຮຽນການປັບປຸງລັດຖະທຳມະນູນຈາກປະເທດຕ່າງໆຈໍານວນໜຶ່ງ ເປັນຕົ້ນບັນດາປະເທດເພື່ອນມິດຍຸດທະສາດ ໃນນີ້, ໄດ້ເຊື້ອເຊີນຄະນະຜູ້ແທນຂັ້ນສູງຈາກສະພາແຫ່ງຊາດ ສສ.ຫວຽດນາມ ມາສຳມະນາວິທະຍາສາດຮ່ວມກັບສະພາແຫ່ງຊາດ ສປປລາວ ກ່ຽວກັບແນວຄິດຊີ້ນຳຂອງພັກກອມມູນິດຫວຽດນາມ ແລະ ແນວຄິດຊີ້ນຳຂອງປະທານ ໄກສອນ ພົມວິຫານ ຕໍ່ກັບການສ້າງ ແລະ ປັບປຸງລັດຖະທໍາມະນູນ ໂດຍໄດ້ແລກປ່ຽນບົດຮຽນເຊິ່ງກັນແລະກັນ ກ່ຽວກັບການປັບປຸງລັດຖະທຳມະນູນຂອງທັງສອງປະເທດ.

4. ສະຫຼຸບຕີລາຄາຜົນການປະເມີນການຈັດຕັ້ງປະຕິບັດລັດຖະທຳມະນູນ ແລະ ສັງລວມຂໍ້ສະເໜີຕ່າງໆໃນທົ່ວປະເທດ ຕໍ່ການປັບປຸງເນື້ອໃນຂອງລັດຖະທໍາມະນູນ; ດຳເນີນການຄົ້ນຄວ້າ, ວິໄຈ ແລະ ປັບປຸງເນື້ອໃນຂອງລັດຖະທຳມະນູນສະບັບຮ່າງເບື້ອງຕົ້ນ ແລ້ວນໍາສະເໜີຂໍທິດຊີ້ນຳຈາກກອງປະຊຸມຄະນະປະຈຳສະພາແຫ່ງຊາດ 2 ຄັ້ງ, ກອງປະຊຸມກົມການເມືອງ ຮ່ວມກັບຄະນະເລຂາທິການສູນກາງພັກ 2 ຄັ້ງ ເຊິ່ງໃນແຕ່ລະຄັ້ງ ກໍໄດ້ປັບປຸງຮ່າງລັດຖະທໍາມະນູນ ແລ້ວຈຶ່ງນໍາສະເໜີຂໍທິດຊີ້ນໍາຕໍ່ກອງປະຊຸມຄົບຄະນະບໍລິຫານງານສູນກາງພັກປະຊາຊົນປະຕິວັດລາວ ຄັ້ງທີ 9 ສະໄໝທີ XI ໃນວັນທີ 01 ພະຈິກຜ່ານມາ. ຜ່ານການຄົ້ນຄວ້າ ແລະ ປະກອບຄວາມເຫັນຢ່າງຫຼາກຫຼາຍຂອງກອງປະຊຸມດັ່ງກ່າວ, ສູນກາງພັກໄດ້ມີທິດຊີ້ນໍາຕໍ່ການປັບປຸງລັດຖະທໍາມະນູນປີ 2015 ດັ່ງນີ້:

1) ແນໃສ່ການປັບປຸງລະບົບອຳນາດແຫ່ງລັດ ໃຫ້ມີປະສິດທິພາບສູງ, ສ້າງບາດລ້ຽວໃໝ່ໃຫ້ແກ່ການປົກປັກຮັກສາ ແລະ ສ້າງສາປະເທດຊາດ, ການເຊື່ອມໂຍງເສດ ຖະກິດພາກພື້ນ ແລະ ສາກົນ ແນໃສ່ສ້າງພື້ນຖານທາງດ້ານກົດໝາຍ ກໍຄືນິຕິກຳທີ່ຈະວາງອອກໃນຕໍ່ໜ້າ ໃຫ້ຮັບປະກັນແນວທາງການເມືອງຂອງພັກ, ການຄຸ້ມຄອງ-ບໍລິຫານລັດໃນໄລຍະໃໝ່.

2) ການປັບປຸງລັດຖະທຳມະນູນຄັ້ງນີ້ ຕົ້ນຕໍແມ່ນສຸມໃສ່ປັບປຸງບາງໝວດ, ບາງມາດຕາ ເພື່ອຮັບປະກັນ ຫຼື ຮອງຮັບແນວທາງການເມືອງຂອງພັກ ແລະ ແນວທາງການຈັດຕັ້ງ, ການຄຸ້ມຄອງ-ບໍລິຫານລັດໃນໄລຍະໃໝ່ ກໍຄືແນວທາງປ່ຽນແປງໃໝ່ໃນຊຸມປີຕໍ່ໜ້າ ໂດຍສະເພາະໃນສະໄໝທີ XII ຂອງພັກ ຫາກບໍ່ແມ່ນການປັບປຸງທັງໝົດເນື້ອໃນຂອງລັດຖະທຳມະນູນ; ໝາຍວ່າ ອັນໃດທີ່ເຂົ້າໃຈເປັນເອກະພາບ, ປະຕິບັດມີປະສິດທິຜົນ, ບໍ່ມີຄວາມສັບສົນ ຫຼື ເປັນບັນຫາຫຍຸ້ງຍາກໃນການຈັດຕັ້ງປະຕິບັດ ກໍບໍ່ຈຳເປັນຕ້ອງປັບປຸງຕື່ມອີກ.

3) ການປັບປຸງລັດຖະທຳມະນູນ ຕ້ອງມີເນື້ອໃນສອດຄ່ອງກັບບັນດາເນື້ອໃນຂອງໂຄງການການເມືອງຂອງພັກ ສະບັບທີ 3,​ ຮ່າງລາຍງານການເມືອງທີ່ຈະສະເໜີຕໍ່ກອງປະຊຸມໃຫຍ່ສະໄໝທີ XII ຂອງພັກ, ມະຕິ 05/ຄບສພ, ມະຕິ 04/ກມສພ ແລະ ຄໍາສັ່ງຂອງຄະນະເລຂາທິການສູນກາງພັກ ເລກທີ 173/ຄລສພ ໂດຍສະເພາະບັນຫາບົດບາດພັກເປັນແກນນໍາ, ບັນຫາຈຸດໝາຍສັງຄົມນິຍົມ, ບັນຫາເສດຖະກິດເອກະລາດເປັນເຈົ້າຕົນເອງ, ບັນຫາການແບ່ງຂັ້ນຄຸ້ມຄອງ, ການກໍານົດຊື່ເອີ້ນຕ່າງໆ ຕ້ອງປັບປຸງໄປລວງດຽວກັນ.

ສຳລັບທິດທາງວຽກງານໃນຕໍ່ໜ້າ, ສືບຕໍ່ປັບປຸງຮ່າງລັດຖະທຳມະນູນຕາມຄຳເຫັນຂອງກອງປະຊຸມສະໄໝສາມັນເທື່ອທີ 8 ຂອງ ສພຊ ຊຸດທີ IX ແລ້ວນຳເອົາຮ່າງດັ່ງກ່າວລົງທາບທາມຄຳເຫັນທາງກວ້າງ ແລະ ທາງເລິກ; ປັບປຸງ, ຮຽບຮຽງເນື້ອໃນຂອງຮ່າງລັດຖະທຳມະນູນໃຫ້ເປັນສະບັບສົມບູນ ເພື່ອນໍາສະເໜີຂໍທິດຊີ້ນຳຂອງຄະນະປະຈຳສະພາແຫ່ງຊາດ ແລະ ກົມການເມືອງສູນກາງພັກ; ນຳສະເໜີຕໍ່ກອງປະຊຸມສະໄໝວິສາມັນເທື່ອທີ 2 ຂອງ ສພຊ ຊຸດທີ IX ພິຈາລະນາຮັບຮອງເອົາ ແລະ ປະກາດໃຊ້ (ສະເໜີໃຫ້ມີກອງປະຊຸມສະໄໝວິສາມັນເທື່ອທີ 2 ໃນທ້າຍເດືອນມີນາ ຫຼື ຕົ້ນເດືອນເມສາ 2025 ພິຈາລະນາຮັບຮອງລັດຖະທໍາມະນູນ ແລະ ບາງກົດໝາຍທີ່ມີຄວາມຈໍາເປັນ ແລະ ຮີບດ່ວນ).