(ສພຊ) ໃນລະຫວ່າງວັນທີ 27-29 ຕຸລາ 2021 ທີ່ສະພາແຫ່ງຊາດ ໄດ້ມີກອງປະຊຸມຄະນະປະຈຳສະພາແຫ່ງຊາດ (ຄປຈ.ສພຊ) ປະຈຳເດືອນຕຸລາ 2021 ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ປະທານ ຄປຈ.ສພຊ, ປະທານສະພາແຫ່ງຊາດ ເຂົ້າຮ່ວມມີບັນດາຮອງປະທານ ຄປຈ.ສພຊ, ກຳມະການ ຄປຈ.ສພຊ, ຕາງໜ້າຈາກບັນດາກະຊວງ, ອົງການ ແລະ ແຂກຖືກເຊີນ.

ກອງປະຊຸມ ໄດ້ຮັບຟັງການລາຍງານກ່ຽວກັບບັນດາເອກະສານຂອງລັດຖະບານທີ່ຈະນໍາເຂົ້າລາຍງານໃນກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ແລະ ຮັບຟັງການລາຍງານວຽກງານຂອງບັນດາກະຊວງທີ່ກ່ຽວຂ້ອງ ແລະ ຂອງບັນດາກໍາມາທິການຂອງສະພາແຫ່ງຊາດ ເປັນຕົ້ນກໍາມາທິການຍຸຕິທໍາ, ກໍາມາທິການກົດໝາຍ, ຄະນະເລຂາທິການສະພາແຫ່ງຊາດ, ກໍາມາທິການວຽກງານສະມາຊິກສະພາແຫ່ງຊາດ, ກໍາມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ, ກໍາມາທິການປ້ອງກັນຊາດ-ປ້ອງກັນຄວາມສະຫງົບ ແລະ ກໍາມາທິການແຜນການ ການເງິນ ແລະ ການກວດສອບ; ຈາກນັ້ນ, ບັນດາທ່ານຄະນະປະຈຳໄດ້ສຸມໃສ່ຄົ້ນຄວ້າປະກອບຄໍາເຫັນຢ່າງມີຈຸດສຸມ-ເຂົ້າສູ່ບັນຫາໃສ່ບັນດາບົດລາຍງານຕ່າງໆທີ່ນໍາມາລາຍງານໃນກອງປະຊຸມໃນຄັ້ງນີ້ ເພື່ອຮັບປະ ກັນການຕົກລົງບັນຫາຢ່າງມີຄວາມເປັນເອກະພາບ, ສາມາດເປັນບ່ອນອີງໃນການຈັດຕັ້ງປະຕິບັດໄດ້ ແລະ ນໍາຜົນປະໂຫຍດລວມມາສູ່ປະເທດຊາດ ແລະ ປະຊາຊົນບັນດາເຜົ່າຢ່າງແທ້ຈິງ.

(ພາບ ແລະ ຂ່າວ: ສອນສັກ ວັນວິໄຊ)