ໃນລະຫວ່າງວັນທີ 16-23 ທັນວາ 2024, ທ່ານ ນາງ ບັງອອນ ໄຊຍະສິດ ກຳມະການປະຈໍາພັກແຂວງ ຮອງປະທານ ຄະນະປະຈຳສະພາປະຊາຊົນແຂວງຄຳມ່ວນ ( ຮອງປະທານ ຄປຈ ສພຂ ຄຳມ່ວນ ), ພ້ອມດ້ວຍ ບັນດາທ່ານກຳມະການຄະນະປະຈໍາສະພາປະຊາຊົນແຂວງຄໍາມ່ວນ ແລະສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງເມືອງ, ໄດ້ເຄື່ອນໄຫວຕິດຕາມ, ກວດກາ ແລະ ຊຸກຍູ້ການຈັດຕັ້ງປະຕິບັດມະຕິກອງປະຊຸມສະໄໝສາມັນ ເທື່ອທີ 6-7 ຂອງສະພາປະຊາຊົນແຂວງຄໍາມ່ວນ ຕິດພັນກັບການແກ້ໄຂຄໍາຮ້ອງ-ຄໍາສະເໜີຂອງປະຊາຊົນ, ຢູ່ 5 ເມືອງຄື: ເມືອງຫີນບູນ, ຄູນຄໍາ, ນາກາຍ, ຍົມມະລາດ ແລະ ເມືອງມະຫາໄຊ, ໂດຍໃຫ້ກຽດຕ້ອນຮັບ ແລະ ເຂົ້າຮ່ວມເຮັດວຽກຂອງບັນດາທ່ານເຈົ້າເມືອງ, ຮອງເຈົ້າເມືອງ, ຄະນະປະຈໍາພັກເມືອງ, ກຳມະການພັກເມືອງ, ຫົວໜ້າ/ຮອງຫົວໜ້າຫ້ອງການ ແລະຂະແໜງການທີ່ກ່ຽວຂ້ອງເຂົ້າຮ່ວມ.

ການ ເຄື່ອນໄຫວຕິດຕາມ, ກວດກາ ແລະຊຸກຍູ້ວຽກງານຄັ້ງນີ້, ຄະນະໄດ້ຮັບຟັງການລາຍງານຂອງບັນດາເມືອງກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະ ແຜນງົບປະມານປະຈໍາ 11 ເດືອນ 2024; ຮັບຟັງການລາຍງານການຈັດຕັ້ງປະຕິບັດວຽກງານຂອງບັນດາຫ້ອງການທີ່ກ່ຽວຂ້ອງ, ວຽກງານໃນຂົງເຂດຍຸຕິທຳ ແລະທິດທາງແຜນການຈັດຕັ້ງປະຕິບັດວຽກງານ ຕໍ່ໜ້າ, ຈາກນັ້ນ, ທ່ານ ນາງ ບັງອອນ ໄຊຍະສິດ, ຄະນະປະຈຳສະພາປະຊາຊົນຂັ້ນແຂວງ ແລະ ສະມາຊິກສະພາປະຊາຊົນຂັ້ນແຂວງປະຈຳເຂດເລືອກຕັ້ງເມືອງ ໄດ້ມີຄໍາຊັກຖາມເຈາະຈີ້ມບາງບັນຫາທີ່ມີຄວາມສົນໃຈ ໃນການຈັດຕັ້ງປະຕິບັດວຽກງານ, ພ້ອມນັ້ນ, ບັນດາຜູ້ເຂົ້າຮ່ວມ, ໄດ້ພ້ອມກັນແລກປ່ຽນຄໍາຄິດຄໍາເຫັນ ແລະ ຕອບຂໍ້ຊັກຖາມຢ່າງກົງໄປກົງມາ ແລະ ພາວະວິໃສຕາມຄໍາຖາມເຈາະຈີ້ມ, ທັງນີ້ກໍ່ເພື່ອເປັນຂໍ້ມູນເບື້ອງຕົ້ນໃຫ້ແກ່ຄະນະປະຈໍາສະພາປະຊາຊົນແຂວງຄໍາມ່ວນ, ສະມາຊິກສະພາປະຊາຊົນຂັ້ນແຂວງ ນຳມາວິເຄາະ, ວິໄຈ ແລະ ເປັນຂໍ້ມູນພື້ນຖານໃນການຄົ້ນຄວ້າປະກອບຄໍາເຫັນ ຕໍ່ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງຄໍາມ່ວນ ຊຸດທີ II ທີ່ຈະໄດ້ໄຂຂຶ້ນໃນຕໍ່ໜ້ານີ້ ແລະ ເພື່ອບັນລຸເປົ້າໝາຍໃນການຈັດຕັ້ງປະຕິບັດໜ້າທີວຽກງານ ມີຄວາມໂປ່ງໃສ, ເປັນທຳ ແລະ ຖືກຕ້ອງຕາມກົດໝາຍ, ເພື່ອເຮັດໃຫ້ວຽກງານຕິດຕາມກວດກາ ແລະ ແກ້ໄຂຄໍາຮ້ອງທຸກຂອງປະຊາຊົນ ໃຫ້ມີປະສິດທິພາບຍິ່ງຂຶ້ນ.

ໂອກາດເຄື່ອນໄຫວຢ້ຽມຢາມ ແລະ ເຮັດວຽກຢູ່ບັນດາເມືອງຄັ້ງນີ້, ທ່ານ ນາງ ບັງອອນ ໄຊຍະສິດ ຮອງປະທານ ຄະນະປະຈຳສະພາປະຊາຊົນແຂວງຄຳມ່ວນ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນຳ ເຊິ່ງກ່ອນອຶ່ນ ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານໃນການຈັດຕັ້ງປະຕິບັດວຽກງານໄລຍະຜ່ານມາ ແລະ ຕີລາຄາສູງຕໍ່ຜົນງານທີ່ຄະນະນຳຂອງເມືອງ ແລະ ຂະແໜງການຍາດມາໄດ້, ພ້ອມດຽວກັນນັ້ນ, ທ່ານໄດ້ເນັ້ນໜັກໃຫ້ທິດຊີ້ນຳຕໍ່ອົງການປົກຄອງເມືອງ ແລະ ພາກສ່ວນທີ່ກ່ຽວຂ້ອງ ໃຫ້ສືບຕໍ່ຊີ້ນຳທຸກຂະແໜງການ ຢູ່ຂັ້ນເມືອງຂອງຕົນໃນການເຄື່ອນໄຫວ ປະຕິບັດພາລະບົດບາດ ເປັນຕົ້ນແມ່ນການຄຸ້ມຄອງເກັບລາຍຮັບ ຂອງຖານລາຍຮັບ ຢູ່ພາຍໃນເມືອງ ໃຫ້ລະອຽດ ຈະແຈ້ງ ແລະ ຄົບຖ້ວນ ເພື່ອເຮັດໃຫ້ລາຍຮັບງົບປະມານຂອງເມືອງເພີ່ມສູງຂຶ້ນຕາມລະດັບຄາດໝາຍ ແລະໃຫ້ເອົາໃຈໃສ່ປົກປ້ອງສິດຜົນປະໂຫຍດຂອງລັດ, ຂອງສັງຄົມ, ຜົນປະໂຫຍດອັນຊອບທຳຂອງປະຊາຊົນ, ເປັນເຈົ້າການໃນການປະຕິບັດ ລັດຖະທຳມະນູນ, ກົດໝາຍ ແລະ ວຽກງານຍຸຕິທຳຕັ້ງໜ້າໂຄສະນາເຜີຍແຜ່ກົດໝາຍ, ສຶກສາອົບຮົມແກ່ພົນລະເມືອງຮັບຮູ້ເຂົ້າໃຈ, ມີສະຕິເຄົາລົບກົດໝາຍສູງຂຶ້ນ.

ນອກນັ້ນ, ຄະນະຍັງໄດ້ລົງເຄື່ອນໄຫວຕິດຕາມ, ກວດກາ ແລະ ຊຸກຍູ້ວຽກງານຢູ່ພາກສະໜາມຂອງແຕ່ລະຈຸດຄື: ທີ່ຄາຍຄຸມຂັງຂອງບັນດາເມືອງ, ໂຮງໝໍນ້ອຍ, ໂຮງຮຽນ, ເຂດບໍລິສັດທີ່ເຊົ່າສຳປະທານ ແລະໂຄງການລົງທຶນຕ່າງໆ.

• ງົບປະມານການເຄື່ອນໄຫວ ວຽກງານຄັ້ງນີ້ໄດ້ຮັບການສະໜັບສະໜູນໂດຍ: ໂຄງການຂອງມູນນິທິເວສມິນສະເຕີ ເພື່ອປະຊາທິປະໄຕ (WFD Laos).

ໂດຍ: ເອື້ອ ມະໂນສິງ