ຕອນເຊົ້າວັນທີ 11 ພຶດສະພາ 2022 ນີ້ ຢູ່ທີ່ຫ້ອງປະຊຸມຄະນະປະຈຳສະພາປະຊາຊົນ ແຂວງ ຫົວພັນ ຄະນະກຳມະການຍຸຕິທຳ ແລະ ປ້ອງກັນຊາດ – ປ້ອງກັນຄວາມສະຫງົບ ສະພາປະຊາຊົນແຂວງ ໄດ້ຈັດກອງປະຊຸມ ຮ່ວມກັບຄະນະປະສານງານທີ່ຖືກແຕ່ງຈາກກອງບັນຊາການທະຫານແຂວງ,ກອງບັນຊາການປ້ອງກັນຄວາມສະຫງົບແຂວງ, ອົງການໄອຍະການປະຊາຊົນແຂວງ, ສານປະຊາຊົນແຂວງ ແລະ ພະແນກຍຸຕິທຳແຂວງ, ໂດຍການເປັນປະທານ ຂອງ ທ່ານ ພັທ ທອງພັນ ພັດທະວົງ ກຳມະການຄະນະປະຈຳ ປະທານ ຄະນະກຳມະການຍຸຕິທຳ ແລະ ປ້ອງກັນຊາດ – ປ້ອງກັນຄວາມສະຫງົບສະພາປະຊາຊົນແຂວງ ຕະຫລອດຮອດພະນັກງານເສນາທິການຂະແໜງຍຸຕິທຳ ແລະ ປກຊ-ປກສ ເຂົ້າຮ່ວມນຳ.

ຈຸດປະສົງ ຂອງກອງປະຊຸມຄັ້ງນີ້ ແມ່ນປຶກສາຫາລືຄົ້ນຄວ້າເອກພາບກັນກ່ຽວກັບການນຳເອົາບົດບັນທຶກຂອດການປະສານງານທີ່ເຊັນແລ້ວນັ້ນນຳໄປຈັດຕັ້ງຜັນຂະຫຍາຍເຂົ້າສູ່ໜ້າທີ່ວຽກງານ ຂອງກົມກອງຕົນເອງ, ໃນການປະສານງານເຊິ່ງກັນ ແລະ ກັນ, ການສະໜອງຂໍ້ມູນທີ່ສຳຄັນຕ່າງໆທີ່ຈຳເປັນ ໃນຂົງເຂດວຽກງານປ້ອງກັນຊາດ, ປ້ອງກັນຄວາມສະຫງົບ, ອົງການໄອຍະການປະຊາຊົນ,  ສານປະຊາຊົນ ແລະ ພະແນກຍຸຕິທຳ ໃຫ້ແກ່ຄະນະກຳມະການຍຸຕິທຳ ແລະ ປ້ອງກັນຊາດ – ປ້ອງກັນຄວາມສະຫງົບສະພາປະຊາຊົນແຂວງ

ຕອນທ້າຍ ຂອງກອງປະຊຸມ ທ່ານ ປະທານກອງປະຊຸມຍັງໄດ້ເໜັ້ນໜັກໃຫ້ຜູ້ທີ່ຖືກແຕ່ງຕັ້ງ ດັ່ງກ່າວ ຈົ່ງນຳເອົາເນື້ອໃນຈິດໃຈ ທີ່ກອງປະຊຸມ ເອກະພາບຮ່ວມກັນນັ້ນນຳໄປຈັດຕັ້ງຜັນຂະຫຍາຍໃຫ້ຖືກຕ້ອງຕາມສິດ ແລະ ພາລະບົດບາດ ຂອງຕົນ ເພີ່ມທະວີໃນຂອດການປະສານງານໃຫ້ວ່ອງໄວ ແລະ ມີຜົນສຳເລັດ.